ភ្នំពេញ៖ ល្បែងឆ្នោតកត់កន្ទុយលេខ និងភ្នាល់បាល់ មួយកន្លែង នៅក្បែរសាលាបឋមសិក្សាខ្មែរអាមេរិកាំង ។ ល្បែងឆ្នោត កត់កន្ទុយលេខ និងបាល់កើតមានពេញបន្ទុកក្នុងសង្កាត់ស្ទឹងមានជ័យ ហើយអ្នកញៀនល្បែងទាំងនោះ តែងតែមកចាក់ និង ភ្នាល់បាល់ជារៀងរាល់ថ្ងៃ ផ្ទុយទៅនឹងគោលនយោបាយភូមិ-ឃុំ សង្កាត់មានសុវត្ថិភាព បានធ្វើឱ្យកើតមានចោរប្លន់ ឆក់ និង អំពើហិង្សាដល់គ្រួសារ ។
មេឆ្នោតកន្ទុយលេខ និងបាល់បានគេស្គាល់ឈ្មោះយ៉ាងច្បាស់ថា គឺឈ្មោះ ផាត ដែលមានសំយាបសំគាល់ ឈ្មោះ មាន សុខ ឃៀង ដែលផ្ទះគ្មានលេខ ផ្លូវមុន្នីរ៉េត សង្កាត់ស្ទឹងមានជ័យ ខណ្ឌមានជ័យ ហើយមេឆ្នោតកន្ទុយលេខ និងបាល់ទាំងនេះ តែង តែអួតប្រាប់គេឯងថា ខ្លួនមិនខ្លាចសមត្ថកិច្ចមកបង្ក្រាបនោះទេ ពីព្រោះគេបានដោះស្រាយ ជូនអស់លោកសមត្ថកិច្ចរួច រាល់ អស់ហើយ តាំងពីថ្នាក់ក្រោមរហូតទៅដល់ថ្នាក់លើ ហើយក៏មានខ្នងបង្អែក ពីលោកម្នាក់ដោយមិនអាច បញ្ចោញឈ្មោះ នៅ ការិយាល័យក្រុង ដែលមានរហស្សនាម គឺលោក ០៥ ដែលជាខ្នងបង្អែករបស់គេ ។
ប្រជាពលរដ្ឋរស់នៅក្បែរបានប្រាប់អ្នកយកព័ត៌មានឱ្យដឹងថា ក្នុងមួយថ្ងៃៗផ្ទះមេឆ្នោតមួយកន្លែងនេះតែង តែបង្កចលាចល ជា រៀង រាល់ថ្ងៃហើយបង្កអសន្តិសុខដល់សង្គមជាតិទៀតផង ។
លោកអភិបាល គួច ចំរើន កំពុងតែល្បីល្បាញឈ្មោះជាអ្នកដឹកនាំខ្លាំងក្លាមួយរូបផ្នែកខាងបង្ក្រាបបទល្មើសផ្សេងៗ ផ្ទុយទៅវិញ បង្កើតឱ្យមានបនល្បែងស៊ីសងគ្រប់ប្រភេទយ៉ាងដូច្នេះ ។
ប្រភពពីប្រជាពលរដ្ឋយល់ឃើញថា នយោបាយភូមិ-ឃុំ សង្កាត់មានសុវត្ថិភាពត្រូវលោក គួច ចំរើន អភិបាលខណ្ឌមានជ័យ រុញចូលទឹកលូសំអុយអស់ហើយ ។ ប្រជាពលរដ្ឋដដែលរស់នៅជិតខាងសំណូមពរឱ្យ លោក ប៉ា សុជាតិវង្ស អភិបាល នៃ គណៈអភិបាលរាជធានីភ្នំពេញ ដែលទើបឡើងកាន់តំណែងជិតមួយឆ្នាំនេះ ប្រហែលជាមិនបានដឹងឮ ឬជ្រាបហើយធ្វើមិនដឹង ៕