ភ្នំពេញ: សេចក្តីជូនដំណឹង របស់ សាលា រាជធានីភ្នំពេញ បង្ហាញថា ផ្លូវចោមចៅ ឬផ្លូវវេងស្រេង ចាប់ពីសួនចោមចៅ ដល់សួន ច្រមុះ ជ្រូកផ្លូវជើងឯក ( អតីតវិទ្យុជាតិ ស្ទឹងមានជ័យ សព្វថ្ងៃ ជាផ្ទះល្វែង ) មានប្រវែង ប្រមាណ ៦.៥០០ ម៉ែត្រ នឹងត្រូវ ពង្រីក ឲ្យមាន ទទឹងផ្លូវ រហូត ដល់ទំហំ ២៨ ម៉ែត្រ។
ប្រជាពលរដ្ឋ ទាំងអ្នករស់ នៅ អមសង្ខាង ផ្លូវវេងស្រេង និងទាំង អ្នកធ្វើដំណើរ ឆ្លងកាត់ផ្លូវ ដ៏មហាលំបាក នោះ បានសម្តែង ការសាទរ ចំពោះដំណឹង ដែល សាលារាជធានីភ្នំពេញ ប្រកាសពីគម្រោងសាងសង់ ពង្រីកផ្លូវវេងស្រេង ពីរង្វង់មូល ចោមចៅ ទៅ ចម្រុះជ្រូក ស្ទឹងមានជ័យ ដើម្បីធ្វើចរាចរណ៍ឲ្យល្អ ទោះបីជាត្រូវដាក់ជាផ្លូវបង់លុយក៏ដោយ។
ជាការកត់សម្គាល់ ក្នុងប៉ុន្មានឆ្នាំចុងក្រោយនេះ ផ្លូវវេងស្រេង ដែលត្រូវបានវិនិយោគឲ្យក្រុមហ៊ុនឯកជន ដាក់ប៉ុស្តិ៍យកលុយ ពីឡាន ដឹកជំនិញ និងឡានកុងតឺន័រ បានរងការខូចខាតយ៉ាងធ្ងន់ធ្ងរ។ ឡានកុងតឺន័រធំៗ បើកឆ្លងកាត់។ ផ្លូវក៏តូច ចង្អៀត ហើយ អ្នកលក់ដូរ ពិសេស នៅមុខរោងចក្រកាត់ដេរ លក់នៅលើផ្លូវ បង្កការកកស្ទះគ្រប់ពេល ស្ទើរតែកើតមានចរាចរជារៀង រាល់ថ្ងៃ ។
នៅពេលរដូវភ្លៀង ផ្លូវនោះ ត្រូវលិចលង់ និងមានជង្ហុក ហើយបើគ្មានភ្លៀងវិញ គឺហ៊ុយទ្រលោម រកតែមើលអ្វីមិនឃើញ។
ផ្លូវតូចចង្អៀត និងមានជង្ហុក ហើយហ៊ុយដីទ្រលោម នៅផ្លូវវេងស្រេង បានបង្កគ្រោះថ្នាក់ជាញឹកញាប់ រហូតបណ្តាល ឲ្យអ្នក ដំណើរ និងកម្មករកាត់ដេរ ស្លាប់ជាច្រើននាក់ ។
សេចក្តីជូនដំណឹងបានបន្តទៀតថា ផ្លូវវេងស្រេង នឹងត្រូវពង្រីកទទឹងសាច់ទ្រូងផ្លូវ ឲ្យបានប្រវែង ១៩,៥ ម៉ែត្រ សួនកណ្ដាល ២,៥ ម៉ែត្រ និងចិញ្ចើមផ្លូវ ៣ ម៉ែត្រ សងខាង ព្រមទាំងដាក់លូ ១,៥ ម៉ែត្រ អមសងខាងផ្លូវផងដែរ។ ក្រោយពីស្ថាបនា រួចរាល់ នៅក្នុងពេល ឆាប់ៗនោះ កំណាត់ផ្លូវនេះ នឹងអាចឲ្យរថយន្តធ្វើដំណើរបាន ៣ជួរទៅ ៣ជួរមកបាន ។
គម្រោង ពង្រីកផ្លូវនោះ មិនទាន់កំណត់ពេលបើកការដ្ឋានទេ តែសាលារាជធានី ប្រកាសថា នឹងចាត់ក្រុមការងារមួយក្រុម ឲ្យ ចុះទៅ វាស់ ដើម្បីបាញ់ថ្នាំ សម្គាល់ពីការពង្រីកផ្លូវវេងស្រេងនោះ និងកំណត់ពីផលប៉ះពាល់ ៕