ភ្នំពេញ ៖ កិច្ចចរចារវាង គណបក្សសង្គ្រោះជាតិ និងគណបក្សប្រជាជន កម្ពុជា មិនទាន់ ត្រូវបាន បង្ហាញលទ្ធផល ជា សាធារណៈ ដល់អ្នកសារព័ត៌មានបានដឹង នៅឡើយទេនៅថ្ងៃទី៥ វិច្ឆិកា ដោយគ្រាន់តែបញ្ជាក់ថា ការចរចាផ្ដោត អំពីការ ធ្វើ កំណែទម្រង់ការបោះឆ្នោត ។ភាពជាប់គាំងនយោបាយរបស់គណបក្សជាប់ឆ្នោតទាំងពីរ មិនអាចរកដំណោះស្រាយ បាន នៅ ឡើយទេនៅក្នុងការកំណត់ជួបចរចារវាង អ្នកបច្ចេកទេសនៃគណបក្សទាំងពីរ ដែលមានភាគីចរចាម្ខាង ៥រូប ធ្វើឡើងនៅ មន្ទីរ រដ្ឋសភា នៅព្រឹកថ្ងៃទី៥ ខែវិច្ឆិកា។
ក្រោយពីជួបជុំគ្នាចរចាអស់រយៈពេលជាង ៣ម៉ោងនៅព្រឹកថ្ងៃទី៥ វិច្ឆិកា នេះ តំណាងគណបក្សទាំងពីរដែលមានម្ខាង ៥ រូប នោះ ឈរនៅចំពោះមុខអ្នកសារព័ត៌មានទាំងអស់គ្នា ដោយគណបក្សសង្គ្រោះជាតិដឹកនាំដោយលោក សុន ឆ័យ ជាបេក្ខជន តំណាងរាស្ត្រគណបក្សសង្គ្រោះជាតិមណ្ឌលភ្នំពេញ។ រីឯគណបក្សប្រជាជនកម្ពុជា ដឹកនាំដោយលោក ព្រំ សុខា ជារដ្ឋលេខា ធិការ ក្រសួងមហាផ្ទៃ។ គណបក្សទាំងពីរមិនបានធ្វើសេចក្ដីថ្លែងការណ៍រួមអំពីលទ្ធផលនៃកិច្ច ចរចានេះទេ។
គណបក្សប្រតិភូទាំងពីរបានឆ្លើយប្រាប់អ្នកកាសែតដោយភាពលាក់លៀម និងស្រពិចស្រពិលអំពីលទ្ធផលនៃការចរចា ដោយ សន្យាថា លទ្ធផលចរចានឹងទម្លាយឲ្យដឹងនៅកិច្ចចរចាលើកក្រោយទៀត បន្ទាប់ពីពួកគាត់ យកខ្លឹមសារ នៃកិច្ចប្រជុំ ទៅដាក់ ជូន ថ្នាក់ដឹកនាំ កំពូលគណបក្សសម្រេច។
មន្ត្រីជាន់ខ្ពស់គណបក្សប្រជាជនកម្ពុជា លោក ព្រំ សុខា ដែលជាអ្នកដឹកនាំកិច្ចប្រជុំតំណាងឲ្យគណបក្សប្រជាជនកម្ពុជា មិន បាននិយាយឲ្យបានក្បោះក្បាយអំពីលទ្ធផលកិច្ចប្រជុំនោះទេនៅ ក្នុងសន្និសីទសារព័ត៌មាន បន្ទាប់ពីបើកកិច្ចប្រជុំជាង ៣ ម៉ោង ជាមួយគណបក្សសង្គ្រោះជាតិ។ លោកគ្រាន់តែបញ្ជាក់ថា កិច្ចចរចានេះ គឺពិភាក្សាបន្តអំពីអ្វីដែលគណបក្ស ទាំងពីរបាន ព្រម ព្រៀងគ្នានៅ ក្នុងកិច្ចចរចារវាងថ្នាក់ដឹកនាំកំពូលកាលពីថ្ងៃទី១៦ កញ្ញា ឆ្នាំ២០១៣។
មន្ត្រីជាន់ខ្ពស់គណបក្សសង្គ្រោះជាតិ និងជាអ្នកនាំពាក្យ លោក យឹម សុវណ្ណ មានប្រសាសន៍ នៅក្នុងសន្និសីទកាសែត នោះ ដែរថា គណបក្សសង្គ្រោះជាតិបានលើកពីរបៀបវារៈបីចំណុចដែលគណបក្សរបស់លោក បានដាក់មុនកិច្ចចរចានេះដែរ ប៉ុន្តែ លទ្ធផល យ៉ាងណានោះ លោក យឹម សុវណ្ណ ក៏មិនបានបកស្រាយលម្អិតដែរ។
គណបក្សសង្គ្រោះជាតិ នៅមុនពេលកំណត់ថ្ងៃជួបគ្នាចរចានេះ បានដាក់របៀបវារៈបី គឺទី១ ទាមទារឲ្យស៊ើបអង្កេតភាពមិន ប្រក្រតី ធ្ងន់ធ្ងរនៃលទ្ធផលបោះឆ្នោត ទី២ ទាមទារឲ្យថ្នាក់ដឹកនាំកំពូល គ.ជ.ប លាលែងពីតួនាទី និងទី៣ ទាមទារឲ្យយក អនុ សាសន៍របស់អង្គការសហប្រជាជាតិ និងអង្គការសង្គមស៊ីវិលជាតិ និងអន្តរជាតិមកអនុវត្តនៅក្នុងការកែទម្រង់នានា របស់រដ្ឋាភិ បាល។
រីឯលោក យឹម សុវណ្ណ វិញ បញ្ជាក់ថា បេក្ខជនតំណាងរាស្ត្រនៅតែរក្សាជំហរមិនចូលស្បថចូលប្រជុំសភា ដរាបណាគ្មាន ដំណោះ ស្រាយសមស្របអំពីកិច្ចចរចាទេនោះ ៕
