ភ្នំពេញ ៖ កាលពីព្រឹកថ្ងៃចន្ទ ទី៤ ខែតុលា ឆ្នាំ២០១៣ ម្សិលមិញ បានបើកសវនាការ ប្រកាស សាលដីកា លើសំណុំរឿង លោក ឈូក បណ្ឌិត អតីតអភិបាល ក្រុងបាវិត ខេត្ត ស្វាយរៀង ដែលជាប់ចោទ ពីបទបាញ់ ប្រហារកម្មការិនី ចំនួន ៣ នាក់ឲ្យ រងរបួស។
សាលាឧទ្ធរណ៍ បានសម្រេច តម្កល់សាលក្រម សាលាដំបូង ខេត្តស្វាយរៀង ទុកជាបានការ កំបាំងមុខ ដោយផ្តន្ទាទោសជន ជាប់ចោទឈ្មោះ ឈូក បណ្ឌិត ឲ្យជាប់ ពន្ធនាគារ រយៈពេល ១៨ ខែ រាប់ចាប់ តាំងពីថ្ងៃចាប់ខ្លួនបាន ។
លោក តាំង ស៊ុនឡាយ ប្រធានចៅក្រម ជំនុំជម្រះ សាលាឧទ្ធរណ៍ បានអានសាលដីកា កាលពីម្សិលមិញថា ៖សាលា ឧទ្ធរណ៍ សម្រេចតម្កល់សាលក្រមសាលាដំបូង ខេត្តស្វាយរៀង ទុកជាបានការដដែល ហើយ បង្គាប់ឲ្យចាប់ខ្លួនជនជាប់ចោទ ឈ្មោះ ឈូក បណ្ឌិត ដើម្បីនាំខ្លួនមកផ្តន្ទាទោស ។
ដោយឡែក កាលពីម្សិលមិញ កាលពីម្សិលមិញ លោកចៅក្រម ក៏បានតម្កល់ទោស ជនជាប់ចោទឈ្មោះ សរ ចន្ថា អធិការរង នគរបាលក្រុងបាវិតដែលជាប់ពាក់ព័ន្ធក្នុងករណីនេះដែរ ដោយផ្តន្ទាទោសគាត់ឲ្យជាប់ពន្ធនាគាររយៈពេល៦ខែ ពីបទ «ប្រើ ប្រាស់ អាវុធខុសច្បាប់»ផងដែរ ។
លោកចៅក្រម តាំង ស៊ុនឡាយ បាន មានប្រសាសន៍ថាៈ« បើកសិទ្ធិឲ្យជនជាប់ ចោទ ប្តឹងសារទុក្ខ ទៅតុលាការកំពូលក្នុង រយៈ ពេល១ខែ តាមកំណត់ច្បាប់»។
លោកបានបន្ថែមថា៖ ការប្រកាសសាលដីកានាពេលនេះ ត្រូវបានធ្វើឡើងបន្ទាប់ពីសំណុំរឿងរបស់ឈ្មោះ ឈូក បណ្ឌិត ខាង លើនេះ បានត្រូវសភាព្រហ្មទណ្ឌ នៃ សាលាឧទ្ធរណ៍បានលើកយកមកបើកសវនាការ កាលពីរសៀលថ្ងៃទី៣១ តុលា ២០១៣ កន្លងទៅនេះ។
លោក អំ សំអាត អ្នកគ្រប់គ្រងបច្ចេកទេស ស៊ើបអង្កេតនៃអង្គការលីកាដូ(LICADHO) បានសាទរចំពោះ សេចក្តី សម្រេច របស់ តុលាការឧទ្ធរណ៍ខាងលើក៏ប៉ុន្តែលោក បានរិះគន់ថា៖ ទាំងសេចក្តីសម្រេចការចោទ ប្រកាន់ និងការពិន័យពីតុលាការ ចំពោះ ទណ្ទិតឈ្មោះ ឈូក បណ្ឌិតនេះគឺមិនសម ល្មមនឹងទង្វើ ឬការប្រព្រឹត្តរបស់គាត់នោះឡើយ។
លោកបានមានប្រសាសន៍ឲ្យទៀតថា ៖ «ដើម្បី លុបបំបាត់ ឬកាត់បន្ថយ នូវអំពើនិរទណ្ឌភាព នៅកម្ពុជាគឺត្រូវ តែមាន ការ កែទម្រង់ ប្រព័ន្ធតុលាការបច្ចុប្បន្ននេះខ្ញុំសូមជំរុញឲ្យសមត្ថកិច្ចនគរបាល ត្រូវមានតម្លាភាព និង ស្វែងរកចាប់ខ្លួនឈ្មោះ ឈូក បណ្ឌិត នាំ ខ្លួនមកផ្តន្ទាទោសឲ្យខានតែបាន»។
គួរបញ្ជាក់ថា សំណុំរឿងឈ្មោះ ឈូក បណ្ឌិត នេះ លោក លាង សួរ ប្រធាន ចៅក្រមប្រឹក្សានៃសាលាដំបូង ខេត្តស្វាយរៀង កាលពីថ្ងៃទី២៥ មិថុនា ២០១៣ បានប្រកាសសាលក្រមជាសាធារណៈផ្តន្ទាទោសលោក ឈូក បណ្ឌិតឲ្យជាប់ពន្ធនាគារ រយៈ ពេល១៨ខែ ពី«បទបង្ករបួសស្នាមដោយអចេតនា» តាមមាត្រា២៣៦នៃច្បាប់ ព្រហ្មទណ្ឌ ទៅលើកម្មការិនីចំនួន ៣ នាក់ ឲ្យរង របួស ដែលបានប្រព្រឹត្ត កាលពីថ្ងៃទី២០ កុម្ភៈ ២០១២ នៅរោងចក្រកាត់ស្បែកជើង កៅវ៉េស្ថិត ក្នុងតំបន់សេដ្ឋកិច្ច ពិសេស មេនហាត ធេន ស្ថិតក្នុងភូមិតាពៅ សង្កាត់បាវិត ក្រុងបាវិត ។
លោកចៅក្រមក៏បានចេញដីកាបង្គាប់ឲ្យតាមចាប់ខ្លួនលោក ឈូក បណ្ឌិត ដើម្បីយកមកដាក់គុក និងបង្គាប់ឲ្យសងសំណង រដ្ឋ ប្បវេណីជូនទៅជនរងគ្រោះទាំង៣នាក់ក្នុងនោះ ទី១ៈ អ្នកស្រី ប៊ុន ចិន្តា ២០លានរៀល ទី២ កញ្ញា នុត សាខន ១០ លាន រៀល និងទី៣ កញ្ញា កែវ នា ចំនួន៨ លានរៀល។ ចំណែកលោក សរ ចន្ថា អធិការរង នគរបាលក្រុងបាវិត ដែលជាប់ចោទដែរ នោះ ត្រូវផ្តន្ទាទោសឲ្យ ជាប់ពន្ធនាគារ ចំនួន៦ខែពីបទប្រើប្រាស់អាវុធខុសច្បាប់ និងពិន័យជា ប្រាក់ចំនួន ១ លាន រៀលបង់ ចូលថវិការដ្ឋ ៕
