បន្ទាប់បញ្ចប់ការចូលគាល់ព្រះករុណា ព្រះមហាក្សត្រ នៃព្រះរាជាណាចក្រកម្ពុជា នៅម៉ោង៥និង៣០នាទីនៅពេលចេញមកវិញ លោកសម រង្ស៊ី មានប្រសាសន៍ខ្លីពីលើរថយន្តបើកកញ្ចក់និងបរសន្សឹមៗប្រាប់ អ្នកសារព័ត៌មានថា ៖ មានបរិយាកាសល្អ សង្ឃឹមច្រើន ព្រះករុណាលោកបានប្រទានពរជ័យឲ្យជោគជ័យ ។
ជាមួយគ្នានោះដែរ លោកកឹម សុខា អនុប្រធានគណបក្ស ក៏បានមានប្រសាសន៍នៅលើរថយន្តដោយឡែកមួយទៀត បានបញ្ជាក់ថា ព្រះករុណាព្រះអង្គគាំទ្រកិច្ចព្រមព្រៀងនៃគណបក្សទាំងពីរ (កិច្ចព្រមព្រៀងស្តីពី ដំណោះស្រាយនយោបាយ រវាងគណបក្សប្រជាជនកម្ពុជា និងគណបក្សសង្គ្រោះជាតិ ២២កក្កដា ២០១៤ នៅវិមានព្រឹទ្ធសភា) និងនៅចំពោះព្រះភ័ក្ត្រ ព្រះករុណា នារសៀលថ្ងៃនោះដែរ ក៏មានការពិភាក្សាអំពីការដាក់ឈ្មោះលោកសម រង្ស៊ី ចូលជា សមាជិកសភានីតិកាលទី៥នេះផងដែរ។
ថ្នាក់ដឹកនាំកំពូលគណបក្សប្រជាជនកម្ពុជា និងសង្គ្រោះជាតិ ដែលមានសមាសភាពម្ខាង ៣ រូប ដឹកនាំដោយសម្តេច ហ៊ុន សែន និងលោកសមរង្ស៊ី បានចូលក្រាបបង្គំទូលថ្វាយព្រះមហាក្សត្រ ពីលទ្ធផលកិច្ចព្រមព្រៀងបញ្ចប់វិបត្តិនយោបាយ កាលពីម៉ោង ៤ រសៀល ថ្ងៃទី២៤កក្កដានេះ។ រហូតដល់ម៉ោង ៥ និង ៣០ នាទី ថ្នាក់ដឹកនាំកំពូលទាំងពីរ បានចាកចេញពីព្រះបរមរាជវាំងវិញហើយ។ ចំណែកក្រុមអ្នកកាសែតជាច្រើននាក់ បានរង់ចាំនៅក្រៅរបងព្រះបរមរាជវាំង ដើម្បីយកព័ត៌មាន ៕