នៅព្រហស្បតិ៍ ទី៣១ ខែកក្កដា ឆ្នាំ២០១៤ អាជ្ញាធររាជធានីភ្នំពេញ នឹងរៀបចំពិធីសម្ពោធដាក់ឲ្យប្រើប្រាស់ នូវស្ពានអាកាសស្ទឹងមានជ័យ តម្លៃ ១៧ លានដុល្លារ។ ពិធីបើកសម្ពោធនោះ នឹងប្រារព្ធឡើងក្រោមអធិបតីភាពដ៏ខ្ពង់ខ្ពស់ របស់សម្តេចនាយករដ្ឋមន្ត្រី ហ៊ុន សែន។ នេះបើតាមការបញ្ជាក់របស់លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ។
ស្ពានអាកាសស្ទឹងមានជ័យ ត្រូវបានបើកការដ្ឋានសាងសង់ កាលពីថ្ងៃទី២៦ ខែវិច្ឆិកា ឆ្នាំ២០១២។ ស្ពានអាកាសស្ទឹងមានជ័យ ត្រូវបានសាងសង់ឡើង ដើម្បីឆ្លើយតបនឹងតម្រូវការអភិវឌ្ឍរាជធានីភ្នំពេញ និងដើម្បីដោះស្រាយបញ្ហាកកស្ទះចរាចរជាប្រចាំ ដែលបណ្តាលមកពីការ កើនឡើងនៃយានយន្តគ្រប់ប្រភេទនៅទីតាំងស្តុបស្ទឹងមានជ័យ នៃព្រំប្រទល់ខណ្ឌ ទួលគោក ខណ្ឌចំការមន និងខណ្ឌមានជ័យ។
សូមរម្លឹកថា នៅភ្នំពេញ សព្វថ្ងៃ មានស្ពានអាកាស ៣ កន្លែងហើយ។ ទី១-ស្ពានអាកាសក្បាលថ្នល់ ប្រវែងជាង ៣០០ ម៉ែត្រ ចំណាយជិត ៧ លានដុល្លារ បើកដំណើរការ កាលពីថ្ងៃទី២៤មិថុនា ឆ្នាំ២០១០។ ទី២-ស្ពានអាកាស៧មករា នៅស្តុបពេទ្យលោកសង្ឃ ប្រវែង ៣៤៥ ម៉ែត្រ ចំណាយជាង ៨,៧ លានដុល្លារ បើកដំណើរការ កាលពីថ្ងៃទី៦ ខែមករា ឆ្នាំ២០១២។ ទី៣-ស្ពានអាកាសស្ទឹងមានជ័យ ចំណាយប្រមាណ ១៧ លានដុល្លារ គ្រោងនឹងបើកសម្ពោធដាក់ឲ្យដំណើរការ នៅថ្ងៃទី៣១ ខែកក្កដា ឆ្នាំ២០១៤៕