ភ្នំពេញ៖ កម្លាំងគណៈបញ្ជាការឯក ភាពខណ្ឌឬស្សីកែវ ដឹកនាំដោយលោក ឯក ឃុនឌឿន អភិបាលខណ្ឌ បានចុះបង្ក្រាបនិងឃាត់ខ្លួនអ្នកញៀនល្បែងជល់មាន់ និងអាប៉ោងចំនួន៤ នាក់ ដកហូតមាន់ចំនួន ១៦ក្បាល ព្រមទាំងឧបករណ៍សម្រាប់បាញ់អាប៉ោងមួយចំនួនទៀត។
ប្រតិបត្តិការចុះបង្ក្រាបទីតាំងសង្វៀន ជល់មាន់ខាងលើនេះ គឺធ្វើឡើងកាលពីវេលាម៉ោង ៣និង០០នាទីរសៀលថ្ងៃទី ១៤ ខែមិថុនា ឆ្នាំ២០២២ ដែលស្ថិតនៅចំណុចក្នុងដីឡូតិ៍ មួយកន្លែង ភូមិទួលថ្ងាន់ សង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ។
លោក ឯក ឃុនឌឿន បានបន្តថា ខណៈពេលកំពុងចុះបង្ក្រាបទីតាំងសង្វៀនជល់មាន់ខាងលើនេះ ឃើញមានក្រុមអ្នកលេងល្បែងជាច្រើននាក់បានប្រមូលផ្តុំគ្នា កំពុងតែភ្នាល់មាន់ និងខ្លះទៀត បានចោមរោមចាក់និងភ្នាល់យ៉ាងច្រើនកុះករ។ ភ្លាមៗនោះ កម្លាំងសមត្ថកិច្ចចម្រុះខណ្ឌ បានធ្វើការបង្ក្រាបក្រុមអ្នកញៀនល្បែងទាំងនោះ តែពេលនោះ ក្រុមអ្នកញៀនល្បែងបាននាំគ្នារត់ប្រសាចយកតែរួចខ្លួនចោលមាន់, ចោលចានអាប៉ោង និងម៉ូតូរបស់ខ្លួន ក្នុងនោះ ត្រូវបានកម្លាំង សមត្ថកិច្ចឃាត់ខ្លួនបានចំនួន ៤នាក់តែប៉ុណ្ណោះ។
កម្លាំងសមត្ថកិច្ចជំនាញបានឲ្យដឹងថា ក្នុងប្រតិបត្តិការនេះ គឺសមត្ថកិច្ចយើងបានឃាត់មនុស្សចំនួន ៤នាក់ ព្រមទាំងដកហូតដូចជា៖ មាន់ចំនួន ១៦ ក្បាល.រថយន្តចំនួន ២គ្រឿង.ម៉ូតូកង់ បីចំនួន ២គ្រឿង.ម៉ូតូចំនួន ៩ គ្រឿង. សម្ភារៈបាញ់អាប៉ោងព្រមទាំងកៅអី និងទ្រុង មាន់មួយចំនួនទៀតផងដែរ។
ក្រោយពីធ្វើការឃាត់ខ្លួនក្រុមអ្នក ញៀនល្បែងទាំង ៤នាក់ និងវត្ថុតាងខាងលើ ត្រូវបានបញ្ជូន ទៅកាន់អធិការដ្ឋាននគរបាលខណ្ឌឬស្សីកែវ ដើម្បីចាត់ការតាមនីតិវិធីច្បាប់៕