ប្រភពពីប្រជាពលរដ្ឋនៅក្នុងឃុំព្រះឃ្លាំង ស្រុកត្បែង មានជ័យ ខេត្តព្រះ វិហារ បានបង្ហើបអោយដឹងថា ឈ្មួញម្នាក់ឈ្មោះ សិច នៅតែធ្វើសកម្មភាព ដឹកជញ្ជូនឈើចេញពីតំបន់ព្រៃព្រះរកា ក្នុងស្រុកត្បែងមានជ័យនិងពីតំបន់ព្រៃ ឡង់ក្នុងស្រុកជ័យសែន មករក្សាទុកក្នុងដេប៉ូរបស់ខ្លួននៅចំណុចអូរទីទុយ ឃុំព្រះឃ្លាំង យ៉ាងរលូន។
បើតាមប្រភពពីមន្ត្រីអង្គការក្រៅរដ្ឋាភិ បាលដែលឃ្លាំមើលបទល្មើសព្រៃឈើក្នុងខេត្តព្រះវិហារ បានបន្តអោយដឹង ថា បើគ្មានការបើកដៃពីមន្ត្រីបរិស្ថាននៅតំបន់ព្រៃឡង់ និងព្រៃព្រះរកា នោះទេ គឺឈ្មួញឈ្មោះ សិច មិនអាចដឹកជញ្ជូនឈើចេញពីព្រៃចូលមកដេប៉ូរបស់ខ្លួនបានទេ។ បញ្ហានេះលោក សាយ សំអាល់ រដ្ឋមន្ត្រីក្រសួងបរិ ស្ថាន គួរពិនិត្យឡើងវិញខ្លះផង ព្រោះ អីលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ តែង តែបើកដៃអោយមន្ត្រីបរិស្ថាន ប្រចាំតំបន់ព្រៃឡង់ និងព្រៃព្រះរកា ធ្វើអ្វីៗតាមអំពើចិត្តមិនខ្វល់ពីការរិះគន់អ្វីទាំងអស់។
មន្ត្រីអង្គការក្រៅរដ្ឋាភិបាលបានបន្ថែមអោយដឹងទៀតថា ឈ្មួញឈ្មោះ សិច បានប្រើប្រាស់រថយន្តសាំយ៉ុង និងរថយន្តកែច្នៃជាច្រើនគ្រឿងដឹកជញ្ជូន ឈើចេញ ពីព្រៃព្រះរកា និងព្រៃឡង់ ចូលមកដេប៉ូរបស់ខ្លួននៅចំណុចអូរទីទុយ ឃុំព្រះឃ្លាំង ស្រុកត្បែងមាន ជ័យ យ៉ាងសុខស្រួល។ សមត្ថកិច្ចអាវុធហត្ថខេត្ត ព្រះវិហារ មិនហ៊ានប៉ះ ពាល់ឈ្មួញឈ្មោះ សិច នោះទេហើយកម្លាំងនគរ បាលប្រឆាំងបទល្មើសសេដ្ឋកិច្ចខេត្តព្រះវិហារ ក៏មិនហ៊ានប៉ះពាល់ឈ្មួញម្នាក់នេះដែរ។ ដូច្នេះហើយទើបឈ្មួញឈ្មោះ សិច នៅអាចបន្តសកម្មភាពកាប់ឈើដឹកជញ្ជូនឈើចេញពីតំបន់ព្រៃឡង់ និងតំបន់ព្រៃព្រះរកា ខេត្តព្រះវិហារ យ៉ាងគឃ្លើន ហើយមិនប្រឈមនឹងការបង្ក្រាម្តង ណាឡើយ។
មហាជនក៍ដូចជាប្រជាពលរដ្ឋបាន កត់សម្គាល់ថា ថ្មីៗកន្លងទៅនេះសមត្ថកិច្ចអាវុធហត្ថក្រោមការបញ្ជារបស់លោក កង សៅគុណ មេបញ្ជាការកងរាជអាវុធ ហត្ថខេត្តព្រះវិហារ បានចាត់វិធានការបង្ក្រាបបទ ល្មើសព្រៃឈើនៅស្រុកជ័យសែន ស្រុកឆែប ស្រុកត្បែងមានជ័យ ជាបន្តបន្ទាប់។ ប៉ុន្តែចំពោះឈ្មួញឈ្មោះ សិច ដែលធ្វើសកម្ម ភាពដឹកជញ្ជូនឈើពីតំបន់ព្រៃព្រះរកា និងព្រៃឡង់ ចូលមកដេប៉ូរបស់ខ្លួននៅចំណុចអូរទីទុយ ឃុំព្រះ ឃ្លាំង ស្រុកត្បែងមានជ័យ មិនទាន់ឃើញមន្ត្រីបរិស្ថាន មន្ត្រីរដ្ឋបាលព្រៃ ឈើ សមត្ថកិច្ចអាវុធហត្ថឬសមត្ថកិច្ចនគរបាលចាត់វិធានការបង្ក្រាបឡើយ។ ជាក់ស្តែងលោក សុង ច័ន្ទសុជាតិ ប្រធានមន្ទីរបរិស្ថានខេត្តព្រះវិហារ និងលោក ពឹង ទ្រីដា ប្រធានមន្ទីរកសិកម្មខេត្ត ព្រះវិហារ ព្រមទាំងលោក នួន សុខុម នាយខណ្ឌរដ្ឋបាលព្រៃឈើខេត្តព្រះ វិហារ នាំគ្នាសម្ងំដេកលក់អស់ហើយ ៕
