លោកជំទាវ ម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងរដ្ឋសភាព្រឹទ្ធសភានិង អធិការកិច្ចបានជំរុញឲ្យមន្ត្រីអធិការកិច្ចទាំងអស់បន្តប្រឹងប្រែង អនុវត្តការងារប្រកបដោយប្រសិទ្ធភាពនិងគុណភាព។ ម្យ៉ាងទៀត ដើម្បីសម្រេចឲ្យបាននូវគោលដៅ កំណែទម្រង់ស៊ីជម្រៅរបស់រាជរដ្ឋាភិបាល ក្នុងអាណត្តិទី៥នេះ មន្ត្រីអធិការកិច្ច ត្រូវបន្តអនុវត្ដន៍ពង្រឹងសកម្មភាពអធិការកិច្ច សកម្មភាពទទួល និងដោះស្រាយបណ្ដឹងរបស់ប្រជាពលរដ្ឋ ឲ្យកាន់តែមានប្រសិទ្ធភាព ដើម្បីរួមចំណែក ក្នុងការប្រឆាំងនឹងអំពើពុករលួយ ការរំលោភបំពាន ដោយអំណាច និងបាតុភាពអសកម្មនានា នៅតាមបណ្ដាក្រសួងរដ្ឋលេខាធិការដ្ឋាន ស្ថាប័ន នានាស្របតាមភារកិច្ច ដែលរាជរដ្ឋាភិបាលប្រគល់ជូន ។
ថ្លែងបែបនេះខណ លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនង រដ្ឋសភា ព្រឹទ្ធសភា និងអធិការកិច្ច ក្នុង ឱកាស បិទសន្និបាតបូកសរុបលទ្ធផលការងារឆ្នាំ ២០១៣ និងទិសដៅការងារ ២០១៤ របស់ក្រសួងទំនាក់ទំនងជាមួយរដ្ឋសភា នៅទីស្ដីការក្រសួង កាលព្រឹកថ្ងៃទី០៨ ខែមេសា ឆ្នាំ២០១៤ កន្លងមកថ្មីៗនេះ។
លោកជំទាវ ម៉ែន សំអន បានមានប្រសាសន៍ថា ក្រសួងទំនាក់ទំនងជាមួយរដ្ឋសភា និងអធិការកិច្ចមាន ភារកិច្ច ដឹកនាំ និងគ្រប់គ្រង រាល់កិច្ចការសម្របសម្រួល ធ្វើការទំនាក់ទំនងជាមួយរដ្ឋសភា ព្រឹទ្ធសភា និងធ្វើអធិការកិច្ច លើគ្រប់វិស័យ នៅក្នុងព្រះរាជាណាចក្រកម្ពុជា សំដៅប្រឆាំង នឹងអំពើពុករលួយ ការរំលោភ បំពានដោយអំណាច និងបាតុភាពអសកម្ម នានា។
លោកជំទាវ ឧបនាយករដ្ឋមន្ត្រី បន្ដថា ភារកិច្ចដ៏សំខាន់នេះ ទាមទារឲ្យយើងទាំងអស់គ្នា ត្រូវខិតខំបង្កើន ប្រសិទ្ធភាព ក្នុងការបំពេញតួនាទីភារកិច្ច ដើម្បីឆ្លើយតបបាននូវក្នុងការ ផ្ដល់សេវា សាធារណៈ ឲ្យកាន់តែមានគុណភាព ក៏ដូចជាជួយជំរុញយន្តការ នៃយុទ្ធសាស្ត្រ ចតុកោណ របស់រាជរដ្ឋាភិបាល ដែលមានអភិបាលកិច្ចល្អជាស្នូល ដោយឈរលើសសរស្ដម្ភ ៤ គឺ កំណើន ការងារ សមធម៌ និងប្រសិទ្ធភាពឲ្យសម្រេច បានជោគជ័យ។
ដើម្បី សម្រេចឱ្យបាននូវបេសកកម្មនេះលោកជំទាវឧបនាយករដ្ឋមន្ត្រីបានបញ្ជាក់ ថា រាជរដ្ឋាភិបាល បានប្រគល់ភារកិច្ចឱ្យគ្រប់ស្ថាប័ន អង្គភាព ពាក់ព័ន្ធទាំងអស់ត្រូវតែបន្តភារកិច្ចរបស់ខ្លួនដើម្បី បំពេញភារកិច្ច សំដៅពង្រឹង ប្រសិទ្ធភាព ការងារ វិន័យការងារ និងទទួលខុសត្រូវ របស់អង្គភាព នីមួយៗ និងបុគ្គល ដែលជា មន្ត្រីរាជការម្នាក់ៗ ។
លោកជំទាវម៉ែន សំអនបានបន្ដថា៖ តាមសិក្ខាសាលានេះ អាចចាត់ទុកថា ជាការអនុវត្ដនូវអភិក្រម ការងារថ្មី ៤យ៉ាងរបស់ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាគឺឆ្លុះកញ្ចក់ ងូតទឹក ដុសក្អែល និង ព្យាបាល។
រាជរដ្ឋាភិបាល កម្ពុជាបានដាក់ចេញ នូវយុទ្ធសាស្ត្រចតុកោណ ដំណាក់កាលទី៣ដើម្បី កំណើន ការងារ សមធម៌ និងប្រសិទ្ធភាព ដែលជា របៀបវរៈ គោលនយោបាយសង្គម សេដ្ឋកិច្ច នៃកម្មវិធីនយោបាយ របស់រាជរដ្ឋាភិបាលនីតិកាលទី៥ នៃរដ្ឋសភា ។