ភ្នំពេញ ៖ នៅរសៀលថ្ងៃទី២៦ ខែមីនា ឆ្នាំ២០១៤ លោក ប៉ា សុជាតិវង្ស បានបើកកិច្ចប្រជុំ ស្តីពីការងារ ត្រួតពិនិត្យ វាយតម្លៃលើ គោលការណ៍កំណត់ចំណីផ្លូវ ប្រឡាយ និងផលប៉ះពាល់ នៅក្នុងគម្រោងចុះបញ្ជីដីធ្លី ជាលក្ខណ: ប្រព័ន្ធ LMAP នៅក្នុងរាជធានីភ្នំពេញ និងគោលការណ៍ដោះស្រាយ ។ កិច្ចប្រជុំនេះ មានពីអភិបាល ខណ្ឌទាំង៩ និងប្រធានមន្ទីរសុរិយោដី រាជធានីភ្នំពេញ ព្រមទាំងមន្រ្តី ពាក់ព័ន្ធជាច្រើន ។
គោលបំណងនៃកិច្ចប្រជុំ គឺចង់ឲ្យមន្ទីរសុរិយោដី ចុះធ្វើប្លង់មេ ដើម្បីកាត់បន្ថយទំនាស់ជាមួយប្រជាជន ដោយហេតុ ថា កន្លងមកការចុះបញ្ជីដីធ្លី និងដោះស្រាយកន្លងមកច្រើនមាន បញ្ហាកើតឡើងដោយសារ មានបងប្អូនប្រជាពល រដ្ឋ ខ្លះ មានដីតូច ត្រូវកាត់ចំណីផ្លូវអស់រលីង ប៉ុន្តែអ្នកខ្លះមានដីធំ បែរជាអត់បាត់ដី សូម្បីតែមួយចំអាមណាទេ។ ហើយអ្នកខ្លះទៀត មានដីតែ អត់ប័ណ្ណកម្មសិទ្ធកាន់កាប់ អ្នកខ្លះមានប័ណ្ណ កម្មសិទ្ធកាន់កាប់ បែរជាអត់ដីទៅវិញ ។
ប្រធានមន្ទីរសុរិយោដី រាជធានីភ្នំពេញ បានបញ្ជាក់ជូនគណ:អភិបាលរាជធានីភ្នំពេញថា កន្លងមកខាងមន្ទីរបានចុះ ធ្វើបញ្ជីដីធ្លីជាលក្ខណ: ប្រព័ន្ធបានចំនួន ៥៧ សង្កាត់ ក្នុងចំណោមសង្កាត់ទាំង ៩៦។ ដោយសង្កាត់ ដែលកំពុងមាន បញ្ហា ដោះស្រាយ ប្រមាណ ៧សង្កាត់ ។
ពាក់ព័ន្ធនិងកាត់ចំណីផ្លូវ ដោះស្រាយផលប៉ះពាល់ ជូនប្រជាពលរដ្ឋ លោក ប៉ា សុជាតិវង្ស បានស្នើដល់មន្រ្តី LMAP សូមជួយសម្របសម្រួលរាល់បញ្ហា ដែលប្រទាំងប្រទើសជាមួយ បងប្អូនប្រជាពលរដ្ឋ និងចុះ សិក្សា តំបន់ដែលរង ផលប៉ះពាល់ ទៅតាមគោលការណ៍ របស់រាជរដ្ឋាភិបាល ។
លោក ប៉ា សុជាតិវង្ស បានលើកឡើងថា ការអភិវឌ្ឍន៍នៅជួបបញ្ហាមួយចំនួន ខណ:ការយល់ដឹង របស់បងប្អូន ប្រ ជាពលរដ្ឋ នៅមានកម្រិតខុសៗគ្នា ។ លោកអភិបាលរាជធានីភ្នំពេញ ប៉ា សុជាតិវង្ស បានមានប្រសាសន៍ទៀតថា គោលបំណងរបស់ សាលា រាជធានីភ្នំពេញ គឺធ្វើយ៉ាងណាដោះស្រាយជូនប្រជាពលរដ្ឋ អោយទទួលយកបាន ក៏ប៉ុន្តែការដោះស្រាយ កន្លងមកតែងជួបបញ្ហា ដោយហេតុថា អ្នកខ្លះទទួល យកបាន អ្នកខ្លះបាត់បង់ទាំងស្រុង ៕
