ខេត្ដក្រចេះ ៖ ទោះបីជាការដឹកជញ្ជូនឈើ របស់ក្រុមឈ្មួញ នាពេលបច្ចុប្បន្ន នេះកំពុងតែធ្វើឡើងគ្រប់រូបភាព ដែល ជាកត្ដាធ្វើឱ្យ ជំនាញមានភាពស្មុគស្មាញ លើការចុះបង្ក្រាបយ៉ាងណាក៏ ដោយ ក៏នាយផ្នែករដ្ឋបាល ព្រៃឈើ ក្រចេះលោក ព្រាប សុទ្ធារ៉ា បានឱ្យដឹងថា កម្លាំង របស់លោកនៅតែបន្ដ សហការជាមួយ ស្ថាប័នពាក់ព័ន្ធ មួយ ចំនួន ដើម្បីបន្ដ ស្រាវ ជ្រាវចាប់បង្ក្រាបក្នុងដែនសមត្ថកិច្ច របស់លោកបន្ដទៀតឱ្យមានប្រសិទ្ធភាព។
ជាក់ស្ដែង នៅល្ងាចថ្ងៃទី២៤ ខែមីនា ឆ្នាំ២០១៤ កម្លាំងជំនាញផ្នែករដ្ឋបាល ព្រៃឈើក្រចេះ ក្រោមការសម្រប សម្រួល ពីលោក ព្រាប សុទ្ធារ៉ា ក្នុងការចុះចាប់ ឃាត់ឈើប្រណីតបានជាង១០០កំណាត់ ដែលក្រុមឈ្មួញ ដឹកយក ទៅលាក់ទុកក្នុង ព្រៃមួយកន្លែងជាប់ក្រុមហ៊ុនវិនិយោគ ព្រៃសម្បទានមួយនៅក្នុងឃុំក្បាលដំរី ស្រុកសំបូរ ខេត្ដ ក្រចេះ ។
ក្រោយពី ការចាប់ឃាត់និងដឹកជញ្ជូន មករក្សាទុកបានរយៈពេល១ថ្ងៃរួចមក មេព្រៃផ្នែករដ្ឋបាលព្រៃឈើក្រចេះ កាល ពីរសៀលថ្ងៃទី២៥ ខែមីនា បានវាស់វែង លើចំនួនឈើប្រណីតប្រភេទធ្នង់ នាង នួន និងបេងទាំងជាង ១ រយ កំណាត់តូចធំ ទាំងនេះគឺរកឃើញថា មានបរិមាណ ជាង១៧ម៉ែត្រគូប ។
មន្ដ្រី ផ្នែករដ្ឋបាលព្រៃឈើក្រចេះបានឱ្យដឹងថា ឈើប្រណីតទាំងនោះមានឈើ ធ្នង់ នាងនួន និងបេង ចំនួនជាង ១០០ កំណាត់ត្រូវកម្លាំងសមត្ថកិច្ចចុះបង្ក្រាបបានកាលពីថ្ងៃ២៤ ខែមីនា ឆ្នាំ២០១៤ ក្រោយពីឈើទាំងនេះ ឈ្មួញ ដឹក ចេញពី ព្រៃក្នុងខេត្ដមណ្ឌលគីរី យកទៅលាក់ទុក ក្នុងព្រៃមួយកន្លែងជាប់ក្រុមហ៊ុនវិនិយោគ ព្រៃសម្បទាន នៅ ក្នុង ឃុំក្បាលដំរី ស្រុក សំបូរខេត្ដក្រចេះ ។
មន្ដ្រី រដ្ឋបាលព្រៃឈើបានឱ្យដឹងទៀតថា ជាមួយគ្នានេះកម្លាំងសមត្ថកិច្ច ជំនាញក៏បានស្ទាក់ចាប់ឃាត់បានរថយន្ដ សាំងយ៉ុងមួយគ្រឿងទៀតនៅក្នុងសង្កាត់អូរឫស្សី ក្រុងក្រចេះកាលពីយប់ថ្ងៃទី២៥ ខែមីនា ខណៈដែលរថយន្ដមួយ នេះកំពុង តែរត់ពន្ធឈើប្រណីតខុសច្បាប់ ។
ករណីឃាត់ រថយន្ដសាំងយ៉ុង១គ្រឿង នេះកម្លាំងសមត្ថកិច្ចបានរឹបអូសយក រថយន្ដនិងដកហូតបានឈើប្រណីត ប្រភេទធ្នង់និងនាងនួនជាង១០កំណាត់ តូចធំហើយបាននាំទៅរក្សាទុកនៅថ្នាលបណ្ដុះកូនឈើក្សារក្នុងស្រុក ចិត្របុរី ។
តែអ្វី ដែលគួរឱ្យកត់សម្គាល់គឺអ្នក ឃ្លាំមើលលើបញ្ហាបទល្មើសព្រៃឈើ បានសង្កេតឃើញថា បច្ចុប្បន្ននេះអ្នករក ស៊ីដឹកជញ្ជូនឈើខុសប្បាប់ត្រូវគេរក ឃើញថា ភាគច្រើនជាកម្លាំងប្រដាប់ អាវុធតែម្ដង ។ មិនតែប៉ុណ្ណោះគេបានរក ឃើញទៀតថា រាល់ការចាប់បង្ក្រាបសកម្ម ភាពដឹកជញ្ជូនឈើខុសច្បាប់និងការ លាក់ស្ដុកឈើ ខុសច្បាប់របស់ សមត្ថ កិច្ចគ្រប់ជំនាញស្ថាប័នពាក់ព័ន្ធគឺពុំដែលចាប់បានជនល្មើសលើករណី ជំនួញឈើ ខុសច្បាប់ ឬស្រាវជ្រាវ ចាប់ខ្លួន ជនល្មើសជាម្ចាស់ឈើមកផ្ដន្ទាទោសនោះ ទេ ។ បញ្ហានេះហើយ ដែលធ្វើឱ្យក្រុមឈ្មួញនៅតែអាចបន្ដ សកម្ម ភាព ដឹកជញ្ជូន ឈើខុសច្បាប់ដដែល ។
នាយផ្នែក រដ្ឋបាលព្រៃឈើក្រចេះលោក ព្រាប សុទ្ធារ៉ា បានបញ្ជាក់ឱ្យដឹងនៅថ្ងៃទី២៦ ខែមីនាថា ករណីលាក់ និង ស្ដុកឈើ ខុសច្បាប់ព្រមទាំងដឹកជញ្ជូនឈើខុស ច្បាប់ដែលសមត្ថកិច្ចបានបង្ក្រាបនេះគឺ កម្លាំងសមត្ថកិច្ច បាន កសាងសំណុំរឿង និងស្រាវរកមុខជនជាម្ចាស់ឈើដើម្បី ចាត់វិធានការតាមច្បាប់ស្ដីពីព្រៃឈើ ៕
