ភ្នំេពញ ៖ នៅព្រឹកថ្ងៃសុក្រទី២០ខែធ្នូឆ្នាំ២០១៣ សម្តេចតេជោ ហ៊ុន សែន បាន បដិសេធចំពោះការទាមទាររបស់គណបក្សសង្គ្រោះជាតិ លើការបោះឆ្នោតឡើងវិញ។ សម្តេចបានប្រាប់ក្រុមអ្នកកាសែតនៅក្រៅកិច្ចប្រជុំរដ្ឋសភា នៅព្រឹកនេះថា សម្តេចក៏មិនចុះចេញពីដំណែងតាមការទាមទារបាតុកម្មរបស់គណបក្ស សង្គ្រោះជាតិដែរ។
ចំពោះការបោះឆ្នោតឡើងវិញ សម្តេចបញ្ជាក់ថា គ្មានការបោះឆ្នោតឡើងវិញទេ ព្រោះថា គ្មានការរំលាយរដ្ឋសភា ហើយក៏មិនមានចែងនៅក្នុងរដ្ឋធម្មនុញ្ញ។ ការបោះឆ្នោតធ្វើទៅបានរៀងរាល់៥ឆ្នាំម្តងដូចអ្វីដែលមានកំណត់ក្នុង រដ្ឋធម្មនុញ្ញ។
សម្តេចនាយករដ្ឋមន្ត្រីបានបន្តទៀតថា ទាំងសម្តេចជានាយករដ្ឋមន្ត្រី ទាំងព្រះមហាក្សត្រ ទាំងរដ្ឋសភា គឺមិនមានសិទ្ធិក្នុងការរំលាយរដ្ឋសភាទេ ។ ចំពោះការចុះចេញពីតំណែង សម្តេចបានលើកឡើងថា សម្តេចមិនបានធ្វើខុសអ្វី ហើយសភាក៏មិនបានទម្លាក់សម្តេចនោះទេ។ សម្តេចឡើងធ្វើជានាយករដ្ឋមន្ត្រីគឺតាមរដ្ឋធម្មនុញ្ញ ហើយបើចុះគឺចុះតាមរដ្ឋធម្មនុញ្ញ។
ជាមួយនឹងការលើកឡើងខាងលើ សម្តេចនាយករដ្ឋមន្ត្រី ក៏បានព្រមានទៅគណបក្សសង្គ្រោះជាតិដែលចង់ធ្វើបាតុកម្មបិទផ្លូវនោះ ។ សម្តេចលើកឡើងថា ប្រសិនបើបាតុកម្មឈានដល់ការបិទផ្លូវ គឺការខុសច្បាប់ ហើយរដ្ឋាភិបាលនឹងឆ្លើយតបតាមវិធានការផ្លូវច្បាប់។ ក្នុងនោះសម្តេចបានគូសបញ្ជាក់ថា បាតុកម្មបិទផ្លូវគឺជាការបិទឈាមខ្លួនឯង។ សម្តេចបានព្រមានថានឹងប្រើកម្លាំងបង្ក្រាបហើយជាមួយគ្នានោះសម្តេច ក៏បានអំពាវនាវទៅកាន់បក្សប្រឆាំងឲ្យមានការប្រុងប្រយ័ត្នចំពោះបាតដៃ ទីបី ទាក់ទងទៅនឹងបាតុកម្មរបស់គណបក្សប្រឆាំងនៅពេលនេះ ៕