ប្រភពពីមន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្ត ស្ទឹងត្រែងបានឲ្យដឹងថាឈ្មោះសុខជាដែលជាមេការគ្រប់គ្រងរបស់ក្រុមហ៊ុនស៊ីបាយអូថេកបានដឹកនាំកម្មករក្រុមហ៊ុននិងប្រជាពលរដ្ឋក្នុងមូលដ្ឋានមួយចំនួនឲ្យចូលព្រៃឡង់កាប់ឈើអារច្រៀកឈើដឹកចេញយ៉ាងគគ្រឹកគគ្រេង។ ប្រភពបានឲ្យដឹងទៀតថារយៈពេលប្រមាណជាង១សប្ដាហ៍ដើមខែមករាឆ្នាំ២០១៩នេះក្រុមហ៊ុនស៊ីបាយអូថេកបានបំផ្លាញដើមឈើផលិតជ័រទឹករបស់ជនជាតិដើមភាគតិចអស់រាប់រយដើមហើយគ្មានមន្ត្រីអាជ្ញាធរមន្ត្រីបរិស្ថានឬសមត្ថកិច្ចពាក់ ព័ន្ធណាចាត់វិធានការទប់ស្កាត់ឡើយ។ ក្រុមហ៊ុនស៊ីបាយអូថេកបានប្រើប្រាស់អាជ្ញាប័ណ្ណដីសម្បទានរបស់ខ្លួន ហើយបំពានកាប់ឈើក្នុងព្រៃឡង់នៅឃុំសៀមបូកស្រុកសៀមបូក ខេត្តស្ទឹងត្រែងយ៉ាងពេញបន្ទុកព្រោះមានមន្ត្រីបរិស្ថានមន្ត្រីរដ្ឋបាលព្រៃឈើនិងសមត្ថកិច្ចពាក់ព័ន្ធជាអ្នកសម្របសម្រួលដើម្បីផលប្រយោជន៍។
ប្រជាសហគមន៍ការពារព្រៃឈើនៅឃុំសៀមបូកស្រុកសៀមបូកខេត្ត ស្ទឹងត្រែងបានឲ្យដឹងថាមួយរយៈចុងក្រោយនេះក្រុមហ៊ុនស៊ីបាយអូថេក (Ci-Biotech Co., Ltd) ធ្វើសកម្មភាពបំផ្លាញព្រៃ ឡង់នៅចំណុចអូរគ្រាក់យ៉ាងមហន្តរាយ។ ប្រភពបានឲ្យដឹង ទៀតថាមន្ត្រីបរិស្ថានមន្ត្រីរដ្ឋបាលព្រៃឈើមន្ត្រីអាជ្ញាធរគឺជាអ្នកឃុប ឃិតឲ្យក្រុមហ៊ុនស៊ីបាយអូថេកកាប់ឈើអារច្រៀកឈើនិងដឹកជញ្ជូនឈើចេញពីព្រៃឡង់យ៉ាងរលូនដើម្បីជាថ្នូរនឹងផលប្រយោជន៍។ ចំណែកលោកម៉ុមសារឿនអភិបាលខេត្តស្ទឹងត្រែងក៏ដូចជាប្រធានមន្ទីរបរិស្ថានខេត្តស្ទឹងត្រែងកំពុងនាំគ្នារក្សាភាពស្ងៀមស្ងាត់បណ្ដោយឲ្យក្រុមហ៊ុនស៊ីបាយអូថេកធ្វើសកម្មភាពបំផ្លាញព្រៃឡង់យ៉ាងពេញ បន្ទុកហើយសូម្បីតែដើមច្បោះជ័ររបស់ជនជាតិដើមភាគតិចក៏ត្រូវក្រុមហ៊ុនស៊ីបាយអូថេកកាត់រំលំអារច្រៀកដឹកជញ្ជូនចេញពីព្រៃឡង់តាមអំពើចិត្តដែរ។បើតាមប្រភពពីមន្ត្រីអាជ្ញាធរមូលដ្ឋានក្នុងឃុំសៀមបូកស្រុកសៀមបូកខេត្តស្ទឹងត្រែងបានឲ្យដឹងថាក្រុមហ៊ុនស៊ីបាយអូថេកទទួលបានដីសម្បទានសេដ្ឋកិច្ចទំហំ៣៤០០៧ហិកតា កាលពីខែមិថុនាឆ្នាំ២០១២នៅក្នុងតំបន់ព្រំប្រទល់រវាងស្រុកសំបូរ ខេត្តក្រចេះ និងស្រុកសៀមបូក ខេត្តស្ទឹងត្រែង។ ក៏ប៉ុន្តែជាក់ស្ដែងក្រុមហ៊ុនស៊ីបាយអូថេកមិនបានអនុវត្តន៍ឲ្យបានត្រឹម ត្រូវតាមកិច្ចសន្យាវិនិយោគនោះទេហើយបែរជាបំពានកាប់ឈើក្នុងតំបន់ព្រៃឡង់នៅឃុំសៀមបូកស្រុកសៀមបូកខេត្តស្ទឹងត្រែងរួចអារច្រៀកដឹកជញ្ជូនចេញទៅស្រុកយួនយ៉ាងរលូនដោយគ្មានញញើតអ្វីទាំងអស់។ ប្រជាសហគមន៍ការពារព្រៃឡង់ក្នុងឃុំសៀមបូកស្រុកសៀមបូកខេត្ត ស្ទឹងត្រែងបានអំពាវនាវឲ្យលោកសាយសំអាល់រដ្ឋមន្ត្រីក្រសួងបរិស្ថាន និងលោកវេងសុខុនរដ្ឋមន្រ្តីក្រសួងកសិកម្មរុក្ខាប្រមាញ់និងនេសាទសូម មេត្តាពិនិត្យឡើងវិញអំពីបញ្ហានេះហើយចាត់វិធានការទប់ស្កាត់បទល្មើសបំផ្លាញព្រៃឡង់ក្នុងឃុំសៀមបូកស្រុកសៀមបូកប្រកបដោយប្រសិទ្ធភាពផង៕