ប្រភពពីមន្ត្រីនិងភ្នាក់ងារគយក្នុងខេត្តបន្ទាយមានជ័យបានបង្ហើបឲ្យដឹងថាបច្ចុប្បន្នលោកសាំងណនមេគយចល័តផ្ទៃប្រទេសប្រចាំប៉ុស្ដិ៍ ជជុះចំណុចភូមិកូនដំរីកំពុងបង្កើនសកម្មភាពគៀបយកលុយពីឈ្មួញតាមតូចតាម ធំស្រេចតែអំពើចិត្ត របស់ខ្លួន។ ប្រភពបានបង្ហើបឲ្យដឹងទៀតថាការដែលលោកសាំងណននិងបក្ខ ពួកហ៊ានធ្វើអ្វីៗតាមអំពើចិត្តគឺដោយសារមានការឃុបឃិតបើកដៃ ពីសំណាក់មេគយធំៗក្នុងខេត្តបន្ទាយមានជ័យផងដែរទើបអ្វីៗអាចប្រព្រឹត្តទៅដោយរលូន ។ ប្រភពដដែលបានបង្ហើបថាលោកសាំងណនឃុបឃិតឲ្យឈ្មួញធំៗដឹកជញ្ជូនទំនិញគេចពន្ធនិងទំនិញបង់ពន្ធមិនគ្រប់ពីច្រកប៉ោយប៉ែត ចូលខេត្តបន្ទាយមានជ័យនិងចេញទៅរាជធានីភ្នំពេញយ៉ាងរលូនដោយមិនចាត់វិធានការបង្ក្រាបឡើយ។
ក្រុមឈ្មួញនិងអាជីវករដឹកជញ្ជូនទំនិញពីច្រកប៉ោយប៉ែតចូលមកខេត្ត បន្ទាយមានជ័យបានឲ្យដឹងថាបច្ចុប្បន្នលោកសាំងណនមេគយចល័តផ្ទៃប្រទេសប្រចាំប៉ុស្ដិ៍ជជុះចំណុចកូនដំរីផ្លូវជាតិលេខ៥សង្កាត់និមិត្ត ក្រុងប៉ោយប៉ែតខេត្តបន្ទាយមានជ័យកំពុងប្រើអំណាចប្រមូលលុយ តាម របៀបពុករលួយដោយគ្មានញញើតអ្វីទាំងអស់។ ប្រភពបានឲ្យដឹងទៀតថាទោះបីឈ្មួញនិងអាជីវករដឹកជញ្ជូនទំនិញដែលបង់ពន្ធត្រឹមត្រូវយ៉ាងណាក៏ដោយក៏ចៀសមិនផុតពីបង់លុយលើតុក្រោមតុលុយថ្លៃបាយថ្លៃទឹកសម្រាប់លោកសាំងណនមេគយចល័តផ្ទៃប្រទេសប្រចាំប៉ុស្ដិ៍ជជុះនៅចំណុចភូមិកូនដំរីនោះទេ។ ជាងនេះទៅទៀតលុយដែលឈ្មួញនិងក្រុមអាជីវករបង់ឲ្យលោកសាំង ណននិងបក្ខពួកគឺមិនដែលទទួលបានវិក្កយបត្រឬបង្កាន់ដៃទាល់ តែសោះហេតុនេះហើយទើបមានការសង្ស័យថាលុយទាំងនោះចូល ទៅក្នុងហោប៉ៅលោក សាំងណននិងបក្ខពួកយ៉ាងងាញបំផុត។
ប្រភពដែលស្និទ្ធនឹងលោកសាំងណនបានឲ្យដឹងថាក្នុងតួនាទីជាមេគយចល័តផ្ទៃប្រទេសក្រុងប៉ោយប៉ែតឈរជើងនៅចំណុចភូមិកូនដំរី សង្កាត់និមិត្តគឺលោកសាំងណនមិនដែលចាត់វិធានការបង្ក្រាបក្រុមឈ្មួញធំៗដែលដឹកជញ្ជូនទំនិញគេចពន្ធទំនិញបង់ពន្ធមិនគ្រប់និងទំនិញខុសច្បាប់យ៉ាងគគ្រឹកគគ្រេងនោះទេ។ ផ្ទុយទៅវិញលោកសាំងណនមានតែឃុបឃិតឲ្យឈ្មួញទាំងនោះដឹក ជញ្ជូនទំនិញទៅដល់គោលដៅយ៉ាងរលូនដើម្បីជាថ្នូរនឹងផលប្រយោជន៍ ហេតុនេះហើយទើបឈ្មួញអាចដឹកជញ្ជូនទំនិញពីច្រកប៉ោយប៉ែត ចូលទៅរាជធានីភ្នំពេញ យ៉ាងរលូន។ ទន្ទឹមនឹងនេះនៅពេលឈ្មួញតូចតាចនាំចូលទំនិញគេចពន្ធឬទំនិញបង់ពន្ធមិនគ្រប់បន្តិចបន្តួចគឺត្រូវលោកសាំងណនប្រើអំណាចគៀប យកលុយយ៉ាងសប្បាយតែម្តង។
ក្រុមឈ្មួញនិងអាជីវករមួយចំនួនបានអំពាវនាវដល់លោកអូនព័ន្ធមុ នីរ័ត្នរដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុក៏ដូចជាលោកគុណញឹម អគ្គនាយកនៃអគ្គនាយកដ្ឋានគយនិងរដ្ឋាករកម្ពុជាគួរលោកចាត់វិធាន ការទប់ស្កាត់ទង្វើដែលមិនប្រក្រតីនិងអំពើពុករលួយរបស់លោកសាំង ណន មេគយចល័តផ្ទៃប្រទេសនៅក្រុងប៉ោយប៉ែត ខ្លះផង។ ដោយហេតុថាមួយរយៈចុងក្រោយនេះលោកសាំងណនព្រមទាំងបក្ខ ពួកគៀបយកលុយពីឈ្មួញនិងអាជីវករកាន់តែច្រើនឡើងៗហើយសូម្បីតែឈ្មួញនាំចូលទំនិញស្របច្បាប់ក៏ចៀសមិនផុតពីបង់លុយលើតុក្រោមតុឲ្យលោកសាំងណនដែលកំពុងល្បីល្បាញខាងពុករលួយនោះដែរ។សូមរម្លឹកថាកាលពីរកន្លងទៅប្រភពបានឲ្យដឹងថាលោកសាំងណន ធ្លាប់បានចាប់ឡានអាជីវករម្នាក់ឲ្យបង់លុយមួយលានរៀលដោយ គ្មានវិក័យប័ត្រផងដែរ។ពាក់ព័ន្ធការរិះគន់ខាងលើគេហទំព័រ(www.enn-tv.com)យើងមិនអាចសុំការពន្យល់បកស្រាយពីលោកសាំងណនមេគយ ចល័តផ្ទៃប្រទេសប្រចាំប៉ុស្តិ៍ជជុះចំណុចកូនដំរីបាននោះទេ៕
