ភ្នំពេញ ៖ លោក សម រង្ស៊ី ប្រធានគណបក្សសង្គ្រោះជាតិ នៅព្រឹកថ្ងៃអង្គារទី ១០ ធ្នូ ឆ្នាំ ២០១៣ នេះ ដឹកនាំបាតុករជាង២ពាន់នាក់ ហែរចេញពីស្នាក់ការបក្ស សង្កាត់ចាក់អង្រែលើឆ្ពោះទៅកាន់ទីលានប្រជាធិបតេយ្យ ដើម្បីទាមទារឲ្យមានការគោរពសិទ្ធិមនុស្ស និងរកយុត្តិធម៌ជូនម្ចាស់ឆ្នោត។
នៅព្រឹកនេះ គណបក្សសង្គ្រោះជាតិ រៀបចំដង្ហែក្បួនបីកន្លែងផ្សេងគ្នា នៅរាជធានីភ្នំពេញ ឆ្ពោះទៅជួបគ្នានៅទីលានប្រជាធិបតេយ្យ គឺក្រុមទី១ ដឹកនាំដោយលោកសម រង្ស៊ី ចេញពីស្នាក់ការនៅសង្កាត់ចាក់អង្រែលើ ក្រុមទី២ដឹកនាំដោយ លោកកឹមសុខា ចេញពីស្នាក់ការបក្សនៅខណ្ឌទួលគោក និងក្រុមទី៣ដឹកនាំដោយលោកស្រី មូរ សុខហួ ចេញចំណុចឃ្លាំងសាំងផ្លូវជាតិលេខ៥ ខណ្ឌឫស្សីកែវ ។
ក្បួនដង្ហែដែលដឹកនាំដោយ លោក សម រង្ស៊ី ចាប់ចេញជាង៨ព្រឹកនេះ មានអ្នកចូលរួមជាង២ពាន់នាក់ មានកាន់បដា ទង់ជាតិ និងទង់គណបក្សសង្គ្រោះជាតិ។ ក្បួនដង្ហែ ដល់ក្បែរស្ពានអាកាសក្បាលថ្នល់នៅម៉ោង៨ និង៣០នាទីព្រឹកនេះ មិនមានការរារាំងពីសមត្ថកិច្ចទេ ៕