ប្រភពពីមន្ត្រីអង្គការក្រៅរដ្ឋាភិបាលនិងសកម្មជនព្រៃឈើក្នុងខេត្ត មណ្ឌលគិរី បានឲ្យដឹងថាបច្ចុប្បន្ននេះមន្ត្រីរដ្ឋបាលព្រៃឈើមន្ត្រីបរិស្ថាន និងសមត្ថកិច្ចពាក់ព័ន្ធកំពុងឃុបឃិតឲ្យឧកញ៉ា តុប វីដាដែលជាឧត្តមសេនីយ៍យោធាផងនោះបន្តសកម្មភាពបំផ្លាញព្រៃឈើក្នុងស្រុកកោះញែក យ៉ាងមហន្តរាយ។ ប្រភពបានឲ្យដឹងទៀតថាកាលពីថ្ងៃទី២៨ខែវិច្ឆិកាឆ្នាំ២០១៨កម្លាំងនគរបាលខេត្តមណ្ឌលគិរីបានស្ទាក់ចាប់រថយន្តយីឌុបមួយគ្រឿងដឹកឈើមូលពេញប្រៀបរបស់ឧកញ៉ាតុបវីដានៅចំណុចផ្លូវលំជិតស្នាក់ការរបៀងភូមិមេមុំ ឃុំរយ៉ ស្រុកកោះញែក ខេត្តមណ្ឌលគិរី។ ក៏ប៉ុន្តែចំណាត់ការរបស់សមត្ថកិច្ចនគរបាលខេត្តមណ្ឌលគិរីមិន បានធ្វើឲ្យមជ្ឈដ្ឋាននានាមានការជឿជាក់នោះទេ ព្រោះឧកញ៉ា តុប វីដាដែលល្បីល្បាញខាងបំផ្លាញព្រៃឈើច្រើនឆ្នាំមកហើយនោះនៅតែអាចគេចផុតពីសំណាញ់ច្បាប់យ៉ាងក្រអឺតក្រទម។
តាមប្រភពពីមន្ត្រីអាជ្ញាធរនិងសមត្ថកិច្ចមូលដ្ឋានក្នុងឃុំរយ៉ស្រុកកោះញែកបានឲ្យដឹងថារថយន្តយីឌុបដឹកឈើដែលត្រូវសមត្ថកិច្ចនគរបាលខេត្តមណ្ឌលគិរី បង្ក្រាបនោះម៉ាកហ៊ីយ៉ាន់ដាយ ពណ៌ត្រេអ៊ីក្បាលពណ៌ស ពាក់ស្លាកលេខស្វាយរៀង3A-7788 ផ្ទុកឈើមូលប្រភេទសុក្រំចំនួន៣៧កំណាត់ធំៗ។ ប្រភពបានឲ្យដឹងទៀតថា ឈើទាំងនោះត្រូវគេកាប់នៅក្នុងតំបន់អភិរក្សឃុំរយ៉ដឹកចូលស្នាក់ការឃ្លាំងក្រុមហ៊ុនយីនីហ្គ្រីនដែលគេដឹងច្បាស់ថាជាក្រុមហ៊ុនរបស់ឧកញ៉ា តុប វីដា ក្នុងឃុំស្រែសង្គម ស្រុកកោះញែក ខេត្តមណ្ឌលគិរី។ ចំណែកប្រភពដែលស្និទ្ធនឹងមេឈ្មួញ តុប វីដា បានឲ្យដឹងថា មានមេការម្នាក់ឈ្មោះ ផាន់ណា ត្រូវជាប្អូនប្រុសរបស់ឧកញ៉ាតុបវីដាគឺជាអ្នកចាត់ចែងបន្តសកម្ម ភាពបំផ្លាញព្រៃឈើក្នុងស្រុកកោះញែក តាមអំពើចិត្ត។
ប្រភពពីមន្ត្រីអាជ្ញាធរនិងសមត្ថកិច្ចមូលដ្ឋានក្នុងស្រុកកោះញែក បានឲ្យដឹងថារហូតមកដល់ពេលនេះឧកញ៉ាតុបវីដានិងបក្ខពួកនៅតែបន្តកាប់ឈើដឹកជញ្ជូនឈើចេញពីតំបន់ព្រៃការពារ ព្រៃអភិរក្សក្នុងស្រុកកោះញែកយ៉ាងពេញបន្ទុកព្រោះគ្មានមន្ត្រីអាជ្ញា ធរ មន្ត្រីរដ្ឋបាលព្រៃឈើ មន្ត្រីបរិស្ថានឬសមត្ថកិច្ចពាក់ព័ន្ធណាចាត់វិធានការបង្ក្រាបនៅឡើយទេ។ ជាការពិតលោក ស្វាយ សំអ៊ាង ចៅហ្វាយខេត្តមណ្ឌលគិរី លោក អ៊ុំវណ្ណសុភគ៌នាយខណ្ឌរដ្ឋបាលព្រៃឈើខេត្តមណ្ឌលគិរី លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានរក្សាភាពស្ងៀមស្ងាត់ធ្វើមិនដឹងមិនឮអ្វីទាំងអស់ក្នុងខណៈដែលឧកញ៉ា តុប វីដា បន្តបំផ្លាញព្រៃឈើយ៉ាងរាលដាល។ ប្រភពពីសមត្ថកិច្ចពាក់ព័ន្ធបានឲ្យដឹងថាមកដល់ពេលនេះឧកញ៉ា តុបវីដាបន្តសកម្មភាពដឹកជញ្ជូនឈើតាមរថយន្តយីឌុបធំៗពីស្រុកកោះញែកខេត្តមណ្ឌលគិរីចេញទៅស្រុកយួនតាមច្រកព្រំដែនក្នុង ស្រុកមេមត់ ខេត្តត្បូងឃ្មុំ យ៉ាងពេញបន្ទុក។ មានសេចក្ដីរាយការណ៍ខ្លះបានឲ្យដឹងថាករណីសមត្ថកិច្ចនគរបាលខេត្តមណ្ឌលគិរីបង្ក្រាបរថយន្តដឹកឈើរបស់ឧកញ៉ាតុបវីដាកាលពីថ្ងៃទី២៨ខែវិច្ឆិកាឆ្នាំ២០១៨គឺអាចទាក់ទងនឹងទំនាស់ផលប្រយោជន៍ទើបគេធ្វើឲ្យល្អមើលតែម្តងទៅ៕