ភ្នំពេញ៖ព្រះករុណាព្រះមហាក្សត្រសម្តេចព្រះបរមនាថនរោត្តម សីហមុនីអមព្រះរាជដំណើរដោយឥស្សរជនថ្នាក់ដឹកនាំកំពូលៗ មន្ត្រីរាជការនិងមហាជនសិស្សនិស្សិតនឹងយាងនិងអញ្ជើញចូល រួមក្នុងព្រះរាជពិធីពន្លត់ភ្លើងជ័យនៅវិមានឯករាជ្យក្នុងរាជធានីភ្នំពេញ។ភ្លើងជ័យត្រូវបានព្រះករុណាព្រះមហាក្សត្រប្រទានដុតបំភ្លឺក្នុងព្រះរាជពិធីរម្លឹកខួប៦៥ឆ្នាំនៃទិវាបុណ្យឯករាជ្យជាតិថ្ងៃទី០៩ខែវិច្ឆិកា។
កម្មវិធីពន្លត់ភ្លើងជ័យនៅរសៀលថ្ងៃអាទិត្យទី១១ខែវិច្ឆិកាឆ្នាំ២០១៨ នឹងផ្សាយផ្ទាល់តាមទូរទស្សន៍ជាតិកម្ពុជាទ.ទ.ក.ព្រមទាំង តាមហ្វេសប៊ុកក្នុងនោះសារព័ត៌មានក៏នឹងផ្សាយបន្តផ្ទាល់ផងដែរ។
ភ្លើងជ័យត្រូវបានរក្សាទុករយៈពេល៣ថ្ងៃដោយមានកងកម្លាំង៤រូប ឈរប្រចាំការយាមនៅទិសទាំង៤នៅកណ្តាលវិមានឯករាជ្យទាំងយប់ទាំងថ្ងៃគឺ២៤ម៉ោងក្នុង១ថ្ងៃ។
សូមរម្លឹកថាកាលពីព្រឹកថ្ងៃសុក្រទី០៩ខែវិច្ឆិកាឆ្នាំ២០១៨កម្ពុជាបាន រៀបចំពិធីជួបជុំអបអរសាទររម្លឹកខួប៦៥ឆ្នាំនៃទិវាបុណ្យឯករាជ្យជាតិ ថ្ងៃទី០៩ ខែវិច្ឆិកាឆ្នាំ១៩៥៣។ ពិធីជួបជុំទ្រង់ទ្រាយធំខុសពីឆ្នាំមុនៗត្រូវបានធ្វើឡើងនៅវិមានឯករាជ្យ និងរៀបចំមិទ្ទិញមហាជននៅមុខព្រះបរមរាជវាំងក្រោមព្រះរាជាធិប តីភាពដ៏ខ្ពង់ខ្ពស់របស់ព្រះករុណាព្រះមហាក្សត្រសម្តេចព្រះបរមនាថ នរោត្តម សីហមុនី។ នៅចំពោះព្រះភក្ត្រព្រះមហាក្សត្រមន្ត្រីរាជការកងកម្លាំងប្រដាប់អាវុធ និងមហាជនប្រមាណជាង២ម៉ឺននាក់កាលពីព្រឹកថ្ងៃទី០៩វិច្ឆិកាក្នុងមិទ្ទិញអបអរទិវាបុណ្យឯករាជ្យជាតិខួបលើកទី៦៥ឆ្នាំក្រៅពីលើក ឡើងពីព្រះរាជបូជនីយកិច្ចរបស់ព្រះករុណាសម្តេចព្រះបរមរតនកោដ្ ឋសម្តេចព្រះនរោត្តមសីហនុក្នុងការទាមទារឯករាជ្យពីបារាំងសម្តេចតេជោហ៊ុនសែនបានបង្ហាញជំហរយ៉ាងមុតមាំជាថ្មីម្តងទៀតក្នុងការការពារឯករាជ្យភាពជាតិប្រឆាំងដាច់ខាតការជ្រៀតជ្រែករបស់បរទេស ដោយយកលំអានតាមសម្តេចព្រះបរមរតនកោដ្ឋនរោត្តមសីហនុដែលព្រះអង្គបានបំពេញព្រះរាជបូជនីយកិច្ចដ៏ឧត្តុងឧត្តមជាច្រើនដើម្បីជាតិនិងមាតុភូមិពិសេសការតស៊ូទាមទារឯករាជ្យជាតិនិងសិទ្ធិសេរីភាពរបស់ប្រជាពលរដ្ឋខ្មែរពីនឹមអាណានិគមបារាំងកាលពីឆ្នាំ១៩៥៣។
ចំណែកព្រះករុណាព្រះមហាក្សត្រក៏បានប្រកាសឲ្យពលរដ្ឋខ្មែរគ្រប់មជ្ឈដ្ឋានរួបរួមសាមគ្គីគ្នាជាធ្លុងមួយក្រោមដំបូលរដ្ឋធម្មនុញ្ញកម្ពុជាតែមួយដើម្បីការពារឯករាជ្យជាតិបូរណភាពទឹកដីដែលកម្ពុជាពុំអនុញ្ញាតឲ្យសត្រូវណាមួយរំលោភបំពានបានឡើយ៕