ខេត្តក្រចេះ៖យោងតាមប្រភពបានឲ្យដឹងថាចាប់តាំងពីពេលបោះឆ្នោតហើយភ្លាមការដឹកជញ្ជូនឈើខុសច្បាប់ឆ្លងដែននៅតែបន្តកើតមានជាប្រចាំតាមច្រករបៀងដេ៣និងដេ៤ដែលជាកម្មសិទ្ទិឯកជនផ្តាច់មុខរបស់ឧកញ៉ាគង់ក្រឹងដ៏ល្បីឈ្មោះប្រចាំស្រុកស្នួលខេត្តក្រចេះនិងពូកែខាងសម្តែងតួជាសប្បុរសជនតាមរយៈលុយកាក់ដែលប្រមូលបានពីមុខរបរទុច្ចរឹតកាប់បំផ្លាញព្រៃឈើ។
ប្រភពបានឲ្យដឹងទៀតថាក្នុងមួយប់ៗឈើគ្រប់ប្រភេទដូចជាឈើប្រណីតប្រភេទឈើធ្នង់ស្រឡៅសុក្រំកកោះនិងឈើឈ្លីករាប់រយម៉ែត្រគូបដឹកតាមរថយន្តសាមយ៉ុងនិងម៉ូតូមកស្តុកទុកក្បែផ្ទះចំនុចភូមិត្រពាំងស្រែរួចបន្ត ដឹកជញ្ជូនឆ្លងដែនយកទៅលក់នៅប្រទេសវៀតណាមតាមច្រករបៀងដេ៣និងដេ៤ដោយមានកម្លាំងប្រដាប់អាវុធក្រោមឱវាទលោកឧកញ៉ាគង់ក្រឹង ចាំកាងការពារសុវត្ថិភាពឲ្យទៀតផង។
ឈើទាំងនេះត្រូវបានក្រុមឈ្មួញដឹកតាមប្រភេទយីឌុបប្រភេទរថយន្តវេអង រថយន្តសាំយ៉ុងនិងមួយចំនួនទៀតដឹកតាមម៉ូតូរាប់រយគ្រឿងមកលក់ឲ្យឈ្មួញជនជាតិយួនក្រោយបន្ទាយយោធាវរៈសេនាតូចលេខ២០៤ដោយប្រេីកេរ្តិ៍ឈ្មោះឧកញ៉ាគង់ក្រឹងចាំកាងការពារជាចំហនិងចាំដកតុងយកលុយបង់ឲ្យសមត្ថកិច្ចគ្រប់ជំនាញនិងអ្នកមានអំណាចរហូតដល់ថ្នាក់ជាតិទៀតផង។
ក្រុមអ្នកឃ្លាំមើលបទល្មើសព្រៃឈើបានឲ្យដឹងថាបន្ទាប់ពីទទួលបានគោរម្យងារជាឧកញ៉ាឥឡូវងារជាទីប្រឹក្សាក្រសួងការពារជាតិបន្ថែមជំនួញឈើខុសច្បាប់ឆ្លងដែនទៅប្រទេសវៀតណាមរបស់ឧកញ៉ាគង់ក្រឹងកាន់តែរីកធំធាត់ជាលំដាប់ដោយមានឧត្តមសេនីយ៍ជឿនសុវណ្ណថាចាំកាងនិងកាន់តែមានអំណាចរហូតហ៊ានឈួសឆាយដីព្រៃរបស់រដ្ឋចាក់ដីក្រហមធ្វើផ្លូវកម្មសិទ្ធិឯកជនចំនួនពីរខ្សែសម្រាប់ឲ្យរថយន្តប្រភេទយីឌុបនិងប្រភេទវេអងអាចដឹក ឈើចំណុះពី៥៥ទៅ៦០ម៉ែត្រគូបឆ្លងដែនទៅប្រទេសវៀតណាមបានដោយរលូន គ្មានសមត្ថកិច្ចណាហ៊ានបង្ក្រាប។
តាមប្រភពពីអ្នករកស៊ីឈើបានលួចខ្សិបប្រាប់ថាឈើធ្នង់ត្រូវបង់ប្រាក់ចំនួន១៥០០រៀលក្នុងមួយគីឡូក្រាមឲ្យទៅឧកញ៉ាគង់ក្រឹងឯឈើប្រភេទផ្សេងទៀតត្រូវបង់ចាប់ពី៨០០០ដល់១២០០០ដុល្លារអាមេរិកក្នុងមួយរថយន្តយីឌុប ឫុរថយន្តវេអងទេីបអាចដឹកឈើឆ្លងដែនតាមច្រករបៀងដេ៣និងដេ៤បាន។ តាមតួលេខនេះបញ្ជាក់ថាឧកញ៉ាគង់ក្រឹងនឹងទទួលបានចំណូលរាប់ម៉ឺនដុល្លារក្នងមួយថ្ងៃៗពីក្រុមឈ្មួញរកស៊ីឈើខុសច្បាប់ដោយមិនទាន់គិតបញ្ចូលប្រាក់ ចំណេញពីឈើខុសច្បាប់ដែលឧកញ៉ារូបនេះប្រមូលទិញខ្លួនឯងទៀតផង។
ជាក់ស្តែងដោយសារអំណាចលុយដែលទទួលបានពីជំនួញឈើខុសច្បាប់យ៉ាងមហាសាលនេះនិងដោយមានបុគ្គលមានអំណាចងារឧត្តមសេនីយ៍ជាប់ឈ្មោះបញ្ជីខ្មៅអាមេរិចជាខ្នងបង្អែកយ៉ាងរឹងមាំផងនោះឧកញ៉ាគង់ក្រឹង ត្រូវបានគេរៀបចំឲ្យមានការជួបផ្ទាល់ជាមួយត្រកូលថ្នាក់ដឹកនាំកំពូលរបស់ជាតិ។ ហើយសកម្មភាពជំនួញឈើខុសច្បាប់ឆ្លងដែនទៅលក់នៅប្រទេសវៀតណាមរបស់ឧកញ៉ា គង់ ក្រឹង កាន់តែរឹងមាំនិងកាន់តែរីក ធំឡើងៗ។ ឯសមត្ថកិច្ចពាក់ព័ន្ធកាន់តែខ្លាចអំណាចមេឈ្មួញរូបនេះដោយសម្ងំសុខចាំទទួលតែលុយសំណូកជាថ្នូរនឹងការមិនអនុវត្តច្បាប់ទប់ស្កាត់និងបង្ក្រាបឡើយ។ ចំពោះសកម្មភាពផ្គើននឹងបទបញ្ជាលេខ០១របស់រដ្ឋាភិបាលពីសំណាក់ឧកញ៉ាគង់ក្រឹងដែលចូលចិត្តសម្តែងតួជាសប្បុរសជនគេមិនទាន់ដឹងថា ថ្នាក់ដឹកនាំជាតិបានដឹងពីរបរទុច្ចរឹតបំផ្លាញព្រៃឈើខ្មែរដែលឧកញ៉ារូបនេះ កំពុងធ្វើសកម្មភាពកក្រើកទូទាំងខេត្តក្រចេះនេះ។ ពាក់ព័ន្ធនិងព័ត៌មានខាងលើគេហទំព័រ(www.enn-tv.com ) យើងមិនអាចសុំការពន្យល់បកស្រាយ ពីអាជ្ញាធរស្រុក~ ខេត្តសមត្ថកិច្ចជំនាញបង្រ្កាបនិងលោកឧញ៉ាគង់ក្រឹងបាននោះទេ៕
