រាជធានីភ្នំពេញ ៖ ឈរលើជំហរ ស្វែងរកដំណោះស្រាយបញ្ហាជាប់គាំងនយោបាយ លោក សម រង្ស៊ី ប្រធានគណបក្សសង្គ្រោះជាតិ បានបញ្ជាក់ជាថ្មីអំពីជំហរខ្លួន ក្នុងការជួបចរចាជាមួយគណបក្សប្រជាជនកម្ពុជា ដោយផ្អែកលើដំណោះស្រាយដោយសន្តិវិធី ។ លោកបានមានប្រសាសន៍ដូចនេះ ក្នុងសន្និសីទសារព័ត៌មាននៅថ្ងៃទី៣១ តុលា ។
លោក សម រង្សី បានឲ្យដឹងថា គណបក្សសង្គ្រោះជាតិ ប្រកាន់ជំហរលើការជជែកពិភាក្សាជាមួយប្រជាជនកម្ពុជា ឈរលើស្មារតីស្មោះត្រង់ សច្ចធម៌ និងយុត្តិធម៌ ប្រកបដោយសេចក្ដីថ្លៃថ្នូរក្នុងការស្វែងរកដំណោះស្រាយនយោបាយរួម មួយ ។ លោកបាន ប្រ កាសនៅចំពោះមុខអ្នកសារព័ត៌មានជាតិ និងអន្តរជាតិថា នៅថ្ងៃទី៣១ តុលា លោកទាក់ទងទៅលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ដើម្បីកំណត់ថ្ងៃជួបគ្នាចរចា ។
មន្ត្រីនាំពាក្យគណបក្សសង្គ្រោះជាតិ លោក យឹម សុវណ្ណ បញ្ជាក់ថា លោក សម រង្ស៊ី បានទាក់ទងទៅលោកឧបនាយករដ្ឋមន្ត្រី ស ខេង ហើយ ប៉ុន្តែ លោក ស ខេង មិនទាន់បញ្ជាក់អំពីការកាលបរិច្ឆេទជួបប្រជុំគ្នាបានភ្លាមៗទេ នៅថ្ងៃទី៣១ តុលា នេះ។
ការប្រកាសជំហររបស់មេដឹកនាំគណបក្សសង្គ្រោះជាតិ អំពីការទាក់ទងទៅមន្ត្រីជាន់ខ្ពស់គណបក្សប្រជាជនកម្ពុជា នេះ នៅបន្ទាប់ ពីលោក ស ខេង បានឲ្យដឹងកាលពីថ្ងៃទី៣០ តុលា ថា លោកចង់ឲ្យមេដឹកនាំគណបក្សសង្គ្រោះជាតិ ជួបគ្នាផ្ទាល់ ដើម្បី ពិភាក្សា គ្នាអំពីការចរចារកដំណោះស្រាយនយោបាយនេះ។
លោក ស ខេង មានប្រសាសន៍ថា ប្រសិនបើគណបក្សសង្គ្រោះជាតិ មានបំណងជួបគ្នាចរចាឆាប់ៗ គឺលោក សម រង្ស៊ី អាចទាក់ទង លោកតាមទូរស័ព្ទដូចលើកមុន ដើម្បីពិភាក្សាគ្នាអំពីការចរចា។
អនុប្រធានគណបក្សសង្គ្រោះជាតិ លោក កឹម សុខា មានប្រសាសន៍ថា ការចរចាគ្នានៅពេលខាងមុខនោះ គឺគណបក្សសង្គ្រោះជាតិ មានរបៀបវារៈបី មិនមែនជាលក្ខខណ្ឌទេ។ ទី១ ទាមទារឲ្យមានការស៊ើបអង្កេតដោយតម្លាភាពចំពោះភាពមិនប្រក្រតីនៃ ការបោះ ឆ្នោត។ ទី២ ទាមទារឲ្យអ្នកដឹកនាំ គ.ជ.ប លាលែងពីតំណែងរបស់ខ្លួន និងទី៣ ទាមទារឲ្យកែទម្រង់ប្រព័ន្ធបោះឆ្នោត តាមអនុសាសន៍ របស់អង្គការ សហប្រជាជាតិ និងអង្គការសង្គមស៊ីវិល ។
លោក កឹម សុខា បញ្ជាក់ថា ការបើកទ្វារចរចានេះ មិនមែនគណបក្សសង្គ្រោះជាតិ បោះបង់ការតស៊ូមតិ ដូចជាការធ្វើបាតុកម្ម ការ ដាក់ញត្តិ ការទាមទារតាមការទូត រហូតដល់គោលដៅរបស់គណបក្សសង្គ្រោះជាតិ ទទួលបានយុត្តិធម៌។
គណបក្សសង្គ្រោះជាតិ កំពុងផ្ដិតមេដៃអ្នកគាំទ្របន្ថែមទៀត។ លោក សម រង្ស៊ី បញ្ជាក់ថា គណបក្សសង្រ្គោះជាតិ នឹងរកបានញត្តិ ស្នាមមេដៃ ៣លាន ៥សែននាក់ ដើម្បីដាក់ទៅអង្គការសហប្រជាជាតិ បន្ទាប់ពីគណបក្សនេះបានដាក់ញត្តិបានជាង ២ លាននាក់រួច ហើយ កាលពីថ្ងៃទី២៥ តុលា នោះ។
អ្នកជំនាញសេដ្ឋកិច្ច បានលើកឡើងថា ប្រសិនបើគណបក្សជាប់ឆ្នោតទាំងពីររកវិធីដោះស្រាយភាពជាប់គាំង នយោបាយរួមមិនបានទេ នោះ កម្ពុជា នឹងជួបវិបត្តិសេដ្ឋកិច្ចខ្លាំងនៅពេលខាងមុខ ៕