រាជធានីភ្នំពេញ ៖ ការបកស្រាយ ទៅលើសាលក្រមឆ្នាំ១៩៦២ ពាក់ព័ន្ធជម្លោះ តំបន់ប្រាសាទ ព្រះវិហារ នឹងត្រូវ តុលាការ យុត្តិធម៌ អន្តរជាតិ ចេញសេចក្ដី សម្រេចតបតាម សំណើ របស់កម្ពុជា ដែលស្នើសុំឲ្យតុលាការ កំពូលពិភពលោកនេះ បក ស្រាយ ។
សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណា ចក្រកម្ពុជា បានអំពាវនាវ តាមកញ្ចក់ ទូរទស្សន៍ជាតិ ទទក នៅថ្ងៃទី ៩ ខែវិច្ឆិកានេះ ស្នើសុំឲ្យគ្រប់ភាគីពាក់ព័ន្ធ ជាពិសេសកម្ពុជា-សៀម បន្តបញ្ចៀសការប្រើប្រាស់អាវុធ ដើម្បីដោះស្រាយបញ្ហា ។ សម្តេចមានប្រសាសន៍ថា ការប្រើប្រាស់កម្លាំងយោធាណាមួយប្រឆាំងលទ្ធផលដែលនឹងចេញជាផ្លូវការ នៅថ្ងៃទី១១ ដើម សប្ដាហ៍ ខាងមុខនេះ ពុំមែនជាជម្រើសល្អឡើយ។
សម្តេចតេជោ ហ៊ុន សែន បានចាត់ទុកថា ការស្នើសុំរបស់កម្ពុជា ឲ្យតុលាការយុត្តិធម៌ទីក្រុងឡាអេ បកស្រាយឡើងវិញ ចំពោះ សាលក្រមឆ្នាំ១៩៦២ ពាក់ព័ន្ធជម្លោះតំបន់ប្រាសាទព្រះវិហារ គឺដើម្បីកុំឲ្យមានភាពស្រពិចស្រពិល ដែលភាគីសៀម ប្រទាញ ប្រទង់ដីក្បែរប្រាសាទព្រះវិហារនោះ គឺពុំមានជាចេតនាបង្កជម្លោះឡើយ ។ សម្តេចមានប្រសាសន៍ថា ៖ «បើទោះបីសាលដីកា របស់តុលាការ យុត្តិធម៌អន្តរជាតិ នៅថ្ងៃទី១១ ខែវិច្ឆិកា ឆ្នាំ២០១៣ ខាងមុខនេះ ចេញមកបែបណាក៏ដោយ ក៏ប្រទេសទាំងពីរ គោរពតាមសេចក្ដីសម្រេច ហើយខិតខំរក្សាឲ្យខានតែបាននូវសន្តិភាព និងស្ថិរភាពនៅតាមព្រំដែន»។
ការអំពាវនាវរបស់សម្តេចតេជោនាយករដ្ឋមន្ត្រីនេះ ធ្វើឡើងស្របពេលដែលកងយោធា និងក្រុមជ្រុលនិយមថៃ បានបញ្ចេញ ព័ត៌មាន ចោទប្រកាន់កម្ពុជា ជាបន្តបន្ទាប់ ។ កាសែតបាងកកប៉ុស្តិ៍របស់សៀម បានចុះផ្សាយនៅលើគេហទំព័រ របស់ខ្លួនកាល ពីថ្ងៃទី៨ វិច្ឆិកា ថា ប្រទេសកម្ពុជា បានបញ្ជូនកងទ័ពបន្ថែមទៀតទៅកាន់តំបន់ព្រំដែនប្រាសាទព្រះវិហារ តាំងពីថ្ងៃសៅរ៍ សប្ដាហ៍ មុន នឹងបានចាត់ទុក សកម្មភាពនេះថា ជាការរំលោភលើកិច្ចព្រមព្រៀង ដែលប្រទេសទាំងពីរបានសម្រេចកន្លងមក។
ប្រតិកម្មតបភ្លាមៗ មន្ត្រីរដ្ឋាភិបាលកម្ពុជា បានច្រានចោល ចំពោះការចោទ ប្រកាន់នេះ និងបានអះអាងថា កម្ពុជា ពុំបានបញ្ជូន កងទ័ពបន្ថែម ឬចល័តទ័ពនៅតំបន់នោះឡើយ។
គួរបញ្ជាក់ថា ការស្នើសុំឲ្យតុលាការអន្តរជាតិក្រុងឡាអេ បកស្រាយឡើងវិញ លើសាលក្រមឆ្នាំ១៩៦២ ពាក់ព័ន្ធជម្លោះ តំបន់ ប្រាសាទព្រះវិហារ គឺដើម្បីបញ្ចប់នូវទំនាស់ ដែលភាគីសៀមតែងតែព្យាយាម ឈ្លានពានតំបន់ប្រាសាទព្រះវិហារ រហូតមក ៕
