ភ្នំពេញ: អាជ្ញាធររាជធានីភ្នំពេញ បានចាប់ផ្តើមគ្រប់គ្រងកន្លែងផលិតស្រាស និងស្រាលាយគ្រប់ប្រភេទ ដែលកំពុងតាំងដាក់លក់នៅរាជធានីភ្នំពេញ ដើម្បីការពារសុខភាពអ្នកបរិភោគស្របពេលដែលអ្នកស្លាប់ដោយសារពុលស្រាកាន់តែមានចំនួនកើនឡើង ទាំងនៅក្នុងរាជធានី និងតាមបណ្តាខេត្ត។
អាជ្ញាធររាជធានីភ្នំពេញ ដាក់ផែនការឲ្យអាជ្ញាធរខណ្ឌទាំង១២ មន្ទីរពាក់ព័ន្ធចុះស្រង់ស្ថិតិទីតាំង សិប្បកម្មផលិតស្រាទាំងតូច ទាំងធំនៅក្នុងមូលដ្ឋានរបស់ខ្លួន ដើម្បីឈានទៅការគ្រប់គ្រងគុណភាពនិងសង្វាក់ផលិតកម្មឲ្យការផលិតកាន់តែល្អប្រសើរតាមបច្ចេកទេស មិនប៉ះពាល់ដល់សុខភាពអ្នកបរិភោគ។
លោក ប៊ុន សេរី អភិបាលរងរាជធានីភ្នំពេញ បានលើកឡើងក្នុងកិច្ចប្រជុំ ស្តីពីការត្រួតពិនិត្យការគ្រប់គ្រងផលិតផល និងការចែកចាយស្រាសនៅរាជធានីភ្នំពេញ កាលពីព្រឹកថ្ងៃទី៦ ខែមករានេះថា ចាប់ពីពេលនេះទៅ មន្ត្រីជំនាញពាក់ព័ន្ធ អាជ្ញធរខណ្ឌត្រូវសហការគ្នា ចុះស្រង់ទិន្នន័យកន្លែងផលិតស្រាសនៅគ្រប់ទីកន្លែងឲ្យបានច្បាស់លាស់ ព្រោះកន្លងមកនេះមានផ្ទុះករណីស្លាប់ដោយសារពុលស្រាជាច្រើននាក់នៅតាមបណ្តាខេត្តមួយចំនួន ហើយថ្មីៗនេះទៀត មានមនុស្សស្លាប់ចំនួន២នាក់ទៀតដោយសារពុលស្រាស្ថិតក្នុងស្កាត់ទួលស្វាយព្រៃក្នុងខណ្ឌចំការមន។
លោកបញ្ជាក់ថា បន្ទាប់ពីចុះស្រង់ស្ថិតិរួច សាលាក្រុងនឹងបង្កើតឲ្យមាន គណៈកម្មការចម្រុះមួយ ដើម្បីចុះត្រួតពិនិត្យគុណភាព ហើយជំរុញឲ្យម្ចាស់សិប្បកម្មទាំងនោះ វេចខ្ចប់ មានស្លាក់សញ្ញា លេខកូត ឈ្មោះ និងលេខទូរស័ព្ទត្រឹមត្រូវ ដើម្បីបានដឹង និងស្គាល់ប្រភពច្បាស់លាស់ ងាយទប់ស្កាត់បានទាន់ពេល នៅពេលមានបញ្ហាកើតឡើង។លោកអះអាងថាសព្វថ្ងៃស្រាស និងស្រាលាយជាច្រើន ត្រូវបានចរាចរណ៍ពេញរាជធានីភ្នំពេញ ដែលពុំបានដឹងប្រភពនិងមានរូបមន្តលាយបានច្បាស់លាស់នោះឡើយ ដែលធ្វើឲ្យអ្នកបរិភោគងាយប្រឈមពីបញ្ហាសុវត្ថិភាពទាំងនេះ។
លោកបានបញ្ជាក់ថា ដើម្បីគ្រប់ គ្រងផលិតផលស្រាសក្លែងក្លាយនៅរាជធានីភ្នំពេញឲ្យមានប្រសិទ្ធិភាព សុំឲ្យជំនាញបច្ចេកទេស មានមន្ទីរឧស្សាហកម្ម កាំកុងត្រូល មន្ទីរសុខាភិបាល ចុះស្រង់ស្ថិតិកន្លែងស្រាស ឲ្យបានច្បាស់លាល់ ដើម្បីចុះហត្ថលេខារួមគ្នាត្រួតពិនិត្យមូលដ្ឋានអាជីវកម្មលផលិតស្រាសនេះ។
លោក ធិប សុវង់ ប្រធានការិយាល័យ មន្ទីរឧស្សាហកម្មសិប្បកម្មរាជធានីភ្នំពេញ បានបញ្ជាក់ថា ការចុះត្រួតពិនិត្យគុណភាពច្ចេកទេសផលិតស្រាសនេះ មន្ទីរបានចុះរៀងរាល់៣ខែម្តង ដោយមិនមាន ចោទជាបញ្ហាអ្វីឡើយ ប៉ុន្តែ ការប្រឈមនោះ គឺការចែកចាយបន្ត ដែលឈ្មួញខ្លះចង់ចំណេញ យកទៅលាយសាធាតុបន្ថែម និងធ្វើជាស្រាកែច្នៃ ដែលនាំឲ្យស្រានោះខូចគុណភាព។
លោកបន្តថា ដើម្បីឲ្យការគ្រប់គ្រង និងការធ្វើអធិការកិច្ចផលិតផលស្រាទាំងនោះឲ្យទទួលបានជោគជ័យ ត្រូវបង្កើនកិច្ចសហការជាមួយគ្នាឲ្យបានល្អ រវាងមន្ត្រីជំនាញនិងអាជ្ញាធរដែនដី ត្រូវហានរាយការណ៍ឲ្យបានទាន់ពេលវេលានៅពេលមានករណីមិនប្រក្រតីណាមួយ កើតឡើងនៅមូលដ្ឋានរបស់ខ្លួន ដើម្បីមានវិធានការឆ្លើយតបបានទាន់ពេលវេលា។
យ៉ាងណាក៏ដោយមន្ត្រីសាលាក្រុងបានព្រមាននឹងដាក់ទោសទណ្ឌចំពោះម្ចាស់សិប្បកម្មនិងម្ចាស់អាជីវកម្មលក់ស្រាណាដែលផលិតមិនស្របតាមបច្ចេកទេសបង្កផលប៉ៈពាល់ដល់សុខភាពប្រជាពលរដ្ឋ ហើយការផលិតទាំងអស់ត្រូវ តែស្អាត មានអនាម័យខ្ពស់។
គួររំលឹកថា៖ ប៉ុន្មានឆ្នាំនេះ គេសង្កេតឃើញអ្នកពុលស្រាស បណ្តាលឲ្យស្លាប់ មាននៅខេត្តក្រចេះ ខេត្តពោធិសាត់ ត្បូងឃ្មុំ និងរាជធានីភ្នំពេញ៕
pasoch
