ភ្នំពេញ ៖ សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃបានចេញសេចក្ដីសម្រេចមួយ បង្កើតគណៈកម្មការស្រាវជ្រាវស៊ើបអង្កេតករណីបណ្ដឹងនានាពាក់ព័ន្ធជាមួយ លោកវរសេនីយ៍ទោផែង វណ្ណៈ នាយនគរបាលជាតិក្រសួងមហាផ្ទៃ ដែលមានសមាសភាពនាយឧត្ដមសេនីយ៍តេង សាវង្ស រដ្ឋលេខាធិការក្រសួងមហាផ្ទៃជាប្រធាន, លោកឧត្ដមសេនីយ៍ឯកឆៃ ស៊ីណារិទ្ធ អគ្គស្នងការរងនគរបាលជាតិ ជាអនុប្រធាន, លោកឧត្ដមសេនីយ៍ឯកឌី វិជ្ជា ប្រធាននាយកដ្ឋានកណ្ដាលសន្តិសុខ ជាអនុប្រធាន។
ទាក់ទងនឹងករណីលោកវរសេនីយ៍ទោ ផែង វណ្ណៈ កាលពីថ្ងៃទី២៥ ខែកញ្ញា ឆ្នាំ២០១៥ ក៏ត្រូវបានសម្ដេចក្រឡាហោម សខេង សម្រេចផ្ទេរភារកិច្ចពីនាយរងការិយាល័យប្រឆាំងបទល្មើសបច្ចេកវិទ្យា នៃនាយកដ្ឋានសន្តិសុខផ្ទៃក្នុងមកនាយកដ្ឋានបុគ្គលិកដើម្បីធ្វើការ ត្រួតពិនិត្យករណីល្មើសវិន័យបទបញ្ជាផ្ទៃក្នុងរបស់កងកម្លាំងនគរបាល ជាតិផងដែរ។
ទោះជាយ៉ាងណារហូតមកដល់ពេលនេះ មិនទាន់មានប្រភពណាមួយបញ្ជាក់ច្បាស់ថាលោកផែង វណ្ណៈជាប់ពាក់ព័ន្ធនឹងករណីអ្វីខ្លះនោះទេ ប៉ុន្តែហ្វេសប៊ុករបស់ផែង វណ្ណៈ កន្លងមកធ្លាប់បានសរសេរគំរាមបាញ់សម្លាប់លោកកឹម សុខា ដែលបច្ចុប្បន្នជាអនុប្រធានទី១ នៃរដ្ឋសភា ហើយថ្មីៗនេះទៀតលោកផែង វណ្ណៈ ក៏រងការប្ដឹងពីលោកស្រីកែវ ម៉ាលី សមាជិកព្រឹទ្ធសភាមកពីគណបក្សប្រជាជនផងដែរ៕
