ប្រភពថ្មីៗនេះមានសេចក្តីរាយការណ៍ពីស្រុកអណ្ដូងមាសអំពីករណីជីកកកាយរករ៉ែត្បូង ស្ថិតនៅក្នុងភូមិការណាត ឃុំតាឡាវ ស្រុក អណ្តូងមាស ខេត្តរតនគិរីយ៉ាងគគ្រឹកគគ្រេង រីឯមន្ត្រីអាជ្ញាធរមូលដ្ឋាន ស្រុកអណ្ដូងមាស និងស្ថាប័នជំនាញស្លៀកពាក់ ឯកសណ្ឋានជាមន្ត្រី នៃមន្ទីររ៉ែនិងថាមពលខេត្តរតនគិរី ត្រូវប្រជាពលរដ្ឋបង្ហើបប្រាប់ថា បានចុះមើលសកម្មភាពជីករ៉ែត្បូងនោះស្ទើរជារៀងរាល់ថ្ងៃ ប៉ុន្តែគ្មានវិធានការទប់ស្កាត់និងបង្ក្រាបនោះទេ!ព្រោះខ្លាចបុណ្យស័ក្តលោកឧកញ៉ាម្នាក់ដែលជាម្ចាស់ក្រុមហ៊ុននោះ។ មន្ត្រីដែលចុះ ទៅមើលដំណើរការជីករណ្ដៅរ៉ែត្បូងទាំងនោះមិនធានាចំពោះបញ្ហាប្រឈមតាមផ្លូវច្បាប់ទេ ប្រសិនបើថ្នាក់ដឹកនាំខេត្តឬ មន្ទីរចាត់វិធានការណាមួយ។
ប្រភពពីអ្នកភូមិបាននិយាយថា ពេលនេះមានករណីជីកយករ៉ែត្បូងយ៉ាងគគ្រឹកគគ្រេងភូមិការណាត ឃុំតាឡាវ ស្រុកអណ្តូងមាស ខេត្តរតនគិរី សកម្មភាពជីករ៉ែត្បូង ចាប់ផ្ដើមកាល ពីចុងខែមេសា កន្លងទៅរហូត មកដល់បច្ចុប្បន្ននេះ គេមិនទាន់ឃើញក្រុមមន្ត្រី អាជ្ញាធរឬស្ថាប័នជំនាញចុះមកសាកសួរ ឬមានវិធានការទប់ស្កាត់និងបង្រ្កាបនៅឡើយទេ? គេសង្កេតឃើញមានស្ថាប័នមន្ត្រីជំនាញមួយចំនួនដែលប្រព្រឹត្តអំពើពុករលួយ ចុះទៅអើតឈ្ងោកៗរបៀបលាក់លៀមដោយបង្គាប់យកលុយពីម្ចាស់ធ្វើអាជីវកម្មជីករ៉ែត្បូងរួចត្រឡប់មកវិញយ៉ាងស្ងៀមស្ងាត់បំផុត។ ជាមួយនេះក៏មានមន្ត្រីអាជ្ញាធរមូលដ្ឋានឃុំនិងស្រុក ទៅរកប្រយោជន៍ពីម្ចាស់អាជីវ កម្មរ៉ែត្បូងនោះផងដែរ។
ប្រភពបានរាយការណ៍ឲ្យដឹងទៀតថា សកម្មភាពរបស់អ្នកជីករ៉ែត្បូងទាំងនោះមិន អត់ប្រយោជន៍ទេ ពីព្រោះមានក្រុមអ្នកឈរចាំទិញនៅមាត់រណ្ដៅដោយសារតែមានអ្នក ឈរចាំទិញ នៅតាមមាត់រណ្ដៅនោះហើយ ទើបសកម្មភាពជីករ៉ែត្បូងកំពុងធ្វើឡើងយ៉ាងសកម្មយ៉ាងមមាញឹកបែបនេះ។
ប្រភពបានបន្ថែមទៀតថា មានកុងសែឈរចាំទិញត្បូងដែល គេជីកបានរ៉ែត្បូងភ្លាមៗដើម្បីយកទៅឲ្យឧកញ៉ាម្នាក់ទៀត ដែលមិនត្រូវបានគេប្រាប់ឈ្មោះនោះទេ! អ្នកភូមិនៅទីនោះបានរាប់ប្រាប់ថា មានការរៀបចំរចនាសម្ព័ន្ធត្រឹមត្រូវនៅ ក្នុងការជីករ៉ែត្បូងនៅទីនោះ។ សកម្មភាពជីកកកាយរ៉ែត្បូង នៅក្នុងតំបន់ខាងលើនេះធ្លាប់កើតជាញឹកញាប់ ហើយក៏ធ្លាប់ធ្លាយរឿងអាស្រូវពាក់ព័ន្ធនឹងមន្ត្រីរបស់លោក អ៊ុង ហួរ ប្រធានមន្ទីរ រ៉ែនិងថាមពលខេត្តរតនគិរីនោះផងដែរ។ទោះយ៉ាង ណាក៏ដោយគេរំពឹងថា ដំណើរការជីកក កាយរ៉ែត្បូង លើកនេះប្រព្រឹត្តទៅដោយរលូន ពីព្រោះមានឧកញ៉ាម្នាក់ ដែលគេសង្ស័យថា ជាអ្នកវិនិយោគជាមួយប្រជាពលរដ្ឋនៅក្នុងតំបន់នោះហើយទើបសកម្មភាពជីកកកាយរ៉ែត្បូងប្រព្រឹត្តទៅដោយសុខសុវត្ថិភាព ដែលមើលទៅហាក់ដូចជា គ្មានមន្ត្រីណាខ្វល់ ខ្វាយនិងចុះទៅត្រួតពិនិត្យទប់ស្កាត់និងបង្រ្កាបនូវសកម្មភាពជីកកាយរ៉ែត្បូងនោះឡើយ ។បឋម