ភ្នំពេញ៖ អាជ្ញាធររាជធានីភ្នំពេញ បានជំរុញឲ្យមន្ត្រីជំនាញពាក់ព័ន្ធ ខិតខំសំរុកជួសជុលកែលម្អ រមណីដ្ឋានវត្តភ្នំឲ្យបានលឿន ដើម្បីលើកកម្ពស់សោភ័ណ្ឌទីក្រុង ព្រោះរមណីដ្ឋានប្រវត្តសាស្ត្រមួយនេះ ជាបេះដូងរបស់រាជធានី និងជាកន្លែងស្នាក់ អាស្រ័យបណ្តោះអាសន្ន របស់ប្រជាពលរដ្ឋ មកពីបណ្តាខេត្តយកកូនចៅមកសំរាកព្យាបាលនៅមន្ទីរពេទ្យកន្ធបុប្ផា ពិសេស ភ្ញៀវទេសចរបរទេសមកទស្សនាជារៀងរាល់ថ្ងៃ។
លោក ប៉ា សុជាតិវង្ស អភិបាលរាជធានីភ្នំពេញ មានប្រសាសន៏លើកឡើង ក្នុងឱកាសចុះពិនិត្យមើល សកម្មភាព ជួសជុលរៀបចំដាក់ថ្មកំរាលក្រានិត និងដាក់របងចម្រឹងដែកព័ទ្ធជំវិញ រួមនិងផែនការមួយចំនួននៅ រមណីដ្ឋានវត្តភ្នំ កាលពីព្រឹកថ្ងៃទី ០៦ កក្តដាថា ដើម្បីលើកកម្ពស់សោភ័ណ្ឌភាពវត្តភ្នំឲ្យបានល្អស្អាត និងមានសណ្តាប់ធ្នាប់ លប់បំបាត់ភាពអនាធិបតេយ្យ ក៏ដូចបំពេញកន្លែងស្នាក់នៅបណ្តោះអាសន្នរបស់បងប្អូននាំកូនចៅ មកពីបណ្តាខេត្ត មកព្យាបាលនៅមន្ទីរពេទ្យគន្ធបុប្ផាទៀតដែរនោះ មន្ត្រីទទួលបន្ទក់ផ្នែកកែលម្អ និងជួសជុលត្រូវពន្លឿនការងារនេះឲ្យឆាប់។ មួយវិញទៀត ក៏ជាតម្រូវការចាំបាច់ដែរ សម្រាប់ភ្ញៀវបរទេសមកទស្សនា ព្រោះកាលណាគេមកឃើញទីតាំងវត្តភ្នំ ដែលធ្លាប់ល្អស្អាត និងមានឈ្មោះល្បី បែរជាមានភាពរញ៉េរញ៉ៃ និងគ្មានសណ្តាប់ធ្នាប់នោះ ពួកគេនឹងអាក់ខាង នាំឲ្យដាច់ភ្ញៀវនិងខាតបង់ចំនូលថវិកា ពិសេសភាពល្បីឈ្មោះ នៃរមណីដ្ឋានមួយនេះ។
លោកបន្តថា នៅពេលនេះ យើងកំពុងកែលំអកំរាលថ្មើរជើង ដោយដាក់ថ្មក្រានិត សំរាប់ថ្មើរជើងពេញផ្ទៃវត្តភ្នំ ទុកចន្លោះតែដើមឈើប៉ុណ្ណោះ មានន័យថា ធ្វើឲ្យមានគុណភាព និងសោភ័ណភាព ហើយក្រៅពីនេះ ផ្នែករចនាតុបតែងនឹងបន្តកែលំអ សួនវត្តភ្នំឲ្យកាន់តែមានភាពទាក់ទាញទ្វេឡើង ដើម្បីស្រូមទាញភ្ញៀវឲ្យបានកាន់តែច្រើន បន្ទាប់ពីកែលម្អរួច។ លោកអភិបាល បានណែនាំឲ្យមន្ត្រីជំនាញជ្រើសរើសយកបង្គោលភ្លើងភ្លោះប្រភេទLED យកទៅដាក់នៅជំវិញសួន នេះដែរ ដោយប្តូរអំពូលចាស់ចេញឲ្យអស់សម្រាប់បំភ្លឺនៅពេលយប់ ដើម្បីទាក់ទាញសម្រស់ល្អស្អាត និងជួយការពារសុវត្ថិភាពសន្តិសុខពេលយប់។ លោកបញ្ជាក់ថា ការងារនេះ ទោះបីយ៉ាងណា យើងនៅរក្សាទម្រង់ដើមដដែល ដោយគ្រាន់តែកែលំអថ្មី ចំណុចមួយចំនួនប៉ុណ្ណោះ ដូចជា កែដាក់របងដែកព័ទ្ធជុំវិញវត្តភ្នំ ដោយទុកឲ្យមានតែច្រកចូលខាងកើត ចំពីខាងមុខមួយច្រកប៉ុណ្ណោះ។ ការដាក់ របងព័ទ្ធជុំវិញនោះ ត្រូវបានមន្ត្រីសាលាក្រុង និយាយថា ក្នុងបំណងរៀបចំឲ្យមានសណ្តាប់ធ្នាប់ល្អ ជៀសវាងកុំឲ្យមានជនអនាថា មកស្នាក់នៅផ្តេសផ្តាស។ ព្រោះកន្លងធ្លាប់ ក៏ធ្លាប់មានករណីជនល្មើស ធ្វើសកម្មភាព ពីកន្លែងផ្សេងៗ រត់ចូលមកក្នុងរមណីយដ្ឋាននេះ ដើម្បីលាក់ខ្លួន ពិសេស មានស្ត្រីក្មេងៗ មករកស៊ីផ្លូវភេទ នៅទីនោះផងដែរ។
លោក សាំ ពិសិដ្ឋ ប្រធានមន្ទីរសាធារណការ និងដឹងជញ្ជូនរាជធានីភ្នំពេញបានបញ្ជាក់ថា រមណីយដ្ឋាននេះ បន្ទាប់ពីជួសជុលនិងកែលម្អរួចពិតជាមានការគាំទ្រពីមហាជនច្រើន ព្រោះថាបានជួយលើកសោភ័ណ្ឌភាពល្អស្រស់ស្អាតទាំងពេលថ្ងៃ និងពេលយប់ លប់បំបាត់ភាពអនាធិបតេយ្យ មានច្រកចេញចូលតែមួយ ដោយហ៊ុំព័ទ្ធចម្រឹងដែក ងាយស្រួលគ្រប់គ្រងផ្នែកសន្តិសុខការពារសុវត្ថិភាពជូនភ្ញៀវបរទេស ពិសេសឈាន ទៅលប់បំបាត់ទាំងស្រុងនូវរបររកស៊ីរបស់ស្ត្រីរកស៊ីផ្លូវភេទ ដែលកន្លងមកធ្វើឲ្យអាប់ឱនកេរិ៏ឈ្មោះនិងកិត្តយសសង្គម និងធ្វើមានការរិៈគន់ពីប្រជាពលរដ្ឋមកលើងថ្នាក់ដឹងនាំ ។
សូមបញ្ជាក់ថា៖ ការជួសជុល និងកែលំអមណីយដ្ឋានវត្តភ្នំនេះ បានដំណើរការជួសជុល អស់រយៈពេលជាង ២ខែមកហើយ ដែលមានមន្ត្រីជំនាញរបស់សាលារាជធានី និងក្រុមហ៊ុនចិន ៕
