ខេត្តរតនគិរី ៖ កម្លាំងជំនាញសហការជាមួយនិងកម្លាំងសមត្ថកិច្ចដឹកនាំដោយលោកម៉ម វណ្ណដា ព្រះរាជអាជ្ញារងអមសាលាដំបូងខេត្ត ចុះបង្ក្រាបទីតាំងស្តុកឈើមួយកន្លែងនៅកណ្តាលក្រុងបានលុង ខេត្តរតនគិរី។ សកម្មភាពចុះបង្ក្រាបទីតាំងស្តុកឈើមួយកន្លែងនោះនៅវេលាម៉ោង៨និង៣០នាទី ថ្ងៃទី២១ ខែឧសភា ឆ្នាំ២០១៥ ស្ថិតនៅចំណុចផ្ទះជួលមួយកន្លែងនៅភូមិអភិវឌ្ឍន៍ សង្កាត់ឡាបានសៀក ក្រុងបានលុង។
លោក ម៉ម វណ្ណដា ព្រះរាជអាជ្ញារងបានបញ្ជាក់ថា ការចុះបង្ក្រាបនិងដកហូតឈើប្រណិតប្រភេទធ្នុងដែលគេលាក់ទុកខុសច្បាប់នេះ គឺដោយសារការសហការជាមួយមន្ត្រីជំនាញមេព្រៃខេត្ត ទើបបង្ក្រាបបានទីតាំងស្តុកឈើមួយកន្លែងបានដោយជោគជ័យយ៉ាងនេះ។
បច្ចុប្បន្នឈើដែលស្តុកទុកខុសច្បាប់នោះមន្ត្រីជំនាញក៏បានដឹកយកទៅរក្សាទុកនៅខណ្ឌរដ្ឋបាលព្រៃឈើ រីឯម្ចាស់ឈើមន្ត្រីជំនាញកំពុងស្រាវជ្រាវរកមុខយកមកធ្វើកិច្ចសន្យាទៅតាមច្បាប់រដ្ឋបាលព្រៃឈើផងដែរ។
គួរបញ្ជាក់ផងដែរថា រោងសិប្បកម្មជាច្រើនកន្លែងដែលពុំមានច្បាប់នៅក្នុងក្រុងបានលុងសូមមន្ត្រីជំនាញគ្រប់ស្ថាប័នមេត្តាចុះបង្ក្រាបផង៕
គឹម នឿន