ភ្នំពេញ ៖ នៅវេលាម៉ោង១៧ល្ងាចថ្ងៃទី២១ ខែឧសភា ឆ្នាំ២០១៥នេះ សមត្ថកិច្ចនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃបានចាប់ខ្លួនស្ត្រីម្នាក់ពាក់ព័ន្ធនឹងនាំពលករទៅធ្វើការនៅម៉ាឡេស៊ីដោយខុសច្បាប់។
ស្ត្រីជាមេខ្យល់ ដែលត្រូវចាប់ខ្លួននោះ មានឈ្មោះត្រេន សុខចន្នី អាយុ២៧ឆ្នាំ និងមេខ្យល់ម្នាក់ទៀតឈ្មោះហេង សំណាង ភេទប្រុស អាយុ៣៦ឆ្នាំ មិនទាន់ត្រូវបានចាប់ខ្លួននៅឡើយ។
គួរបញ្ជាក់ថា កាលពីអំឡុងខែមេសា ដល់ខែឧសភា ឆ្នាំ២០១៥ ឈ្មោះហេង សំណាង និងស្ត្រីឈ្មោះ ត្រេន សុខចន្នី បានឃោសនាបោកបញ្ឆោតប្រជាពលរដ្ឋតាមវិទ្យុ ដោយធ្វើការប្រកាសជ្រើសរើសពលការិនីទៅបម្រើការងារនៅក្រុមហ៊ុនផ្នែកសំអាតតាមផ្ទះ នៅប្រទេសម៉ាឡេស៊ី។ ក្នុងពេលនោះពួកគេអូសទាញបានពលការិនីចំនួន៨នាក់ ហើយសន្យាថានឹងបានទទួលប្រាក់ឈ្នួលចំនួន៣២០ដុល្លារអាមេរិកក្នុងមួយខែ ឯការចំណាយលើបែបបទ និងការធ្វើដំណើរមេខ្យល់ជាអ្នកចេញទាំងអស់ តែត្រូវកាត់ពាក់កណ្ដាលនៃប្រាក់ឈ្នួល មានរយៈពេលដប់ខែ។
នៅថ្ងៃទី១ ខែឧសភា ឆ្នាំ២០១៥ ក្រោយពីរៀបចំបែបបទរួច មេខ្យល់ខាងលើបានបញ្ជូនពលការិនីទាំងនោះចេញពីប្រទេសកម្ពុជាតាមផ្លូវគោក ទៅកាន់ប្រទេសម៉ាឡេស៊ី ដោយឆ្លងកាត់ប្រទេសថៃ ប៉ុន្តែពេលឆ្លងកាត់ព្រំដែនថៃ-ម៉ាឡេស៊ី ពលការិនីឃើញលិខិតឆ្លងដែនរបស់ខ្លួនប្រើទិដ្ឋាការទេសចរណ៍ទៅវិញ ទើបដឹងថាត្រូវចាញ់បោកមេខ្យល់នាំទៅធ្វើការដោយខុសច្បាប់ ក្នុងនោះពលការិនី៦នាក់បានសម្រេចចិត្តមិនទៅតាមមេខ្យល់ ហើយបានទៅឲ្យសមត្ថកិច្ចម៉ាឡេស៊ីអន្តរាគមន៍ជួយសង្គ្រោះ រហូតដល់ថ្ងៃល្ងាចថ្ងៃនេះទើបសមត្ថកិច្ចនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ បានស្រាវជ្រាវឈានដល់ការចាប់ខ្លួនស្ត្រីម្នាក់នោះតែម្ដង៕ដូចករណីពេលថ្មីៗនេះដែរក័មានការចាញបោកក្រុមហ៊ុនដែលនាំពលករទៅធ្វើការប្រទេសជប៉ុនជាដើម ៕