ភ្នំពេញ ៖ នៅព្រឹកថ្ងៃ២០ ខែឧសភា ឆ្នាំ ២០១៥ ចៅក្រមតុលាការក្រុងភ្នំពេញនឹងបើកសវនាការជំនុំជម្រះទោសឪពុកម្តាយលោកឧកញ៉ាថោង សារ៉ាត់ ដែលត្រូវបានចោទប្រកាន់ពីបទរក្សាទុកអាវុធខុសច្បាប់ និងរារាំងសមត្ថកិច្ចសាធារណៈ។
តាមដីកាបង្គាប់របស់ព្រះរាជអាជ្ញាអមតុលាការត្រូវបានបញ្ជូនមកកាន់ពន្ធនាគារមណ្ឌលកែប្រែម១ និងមណ្ឌលកែប្រែម២ បានបង្គាប់ឲ្យអនុរក្សពន្ធនាគារនាំខ្លួនលោកថោង ចំរើន និងលោកស្រីកែវ សារី ជាឪពុកម្តាយលោកឧកញ៉ាថោងសារ៉ាត់ មកកាន់តុលាការនៅព្រឹកថ្ងៃទី២០ ខែឧសភា ដើម្បីបើកសវនាការជាសាធារណៈដោយមានលោកឃី ឆៃ ជាចៅក្រមជំនុំជម្រះ។
ករណីឪពុកម្តាយឧកញ៉ាថោង សារ៉ាត់ ត្រូវបានតុលាការពន្យារពេលបើកសវនាការម្តងរួចមកហើយ កាលពីចុងខែមេសាកន្លងទៅដោយសារតែមានការសុំពន្យារពេលរបស់មេធាវីជន ជាប់ចោទ។
រហូតមកដល់ពេលនេះលោកថោង ចំរើន និងលោកស្រីកែវ សារី មានមេធាវីការពារផ្លូវច្បាប់ចំនួន៥នាក់ដែលបានដាក់ពាក្យសុំចូល ការពារជនជាប់ចោទនៅតុលាការក្រុងភ្នំពេញ។ ចំណែកមេធាវី២នាក់ទៀតគឺលោកមេធាវីម៉ន កែវស៊ីវិន និងលោកមេធាវីកា សាវុធ ត្រូវបានជនជាប់ចោទបដិសេធមិនពឹងពាក់ឲ្យធ្វើជាមេធាវីការពារក្តីទៀតទេ។
លោកថោង ចំរើននិងលោកស្រីកែវ សារី ត្រូវបានចាប់ខ្លួននៅថ្ងៃទី០៣ ខែធ្នូ ឆ្នាំ២០១៤ក្រោយពេលដែលគាត់បានធ្វើសន្និសីទកាសែតការពារកូនប្រុសរបស់គាត់គឺលោកឧកញ៉ាថោង សារ៉ាត់ ដែលត្រូវបានជាប់ចោទថាជាមេខ្លោងនៅក្នុងអំពើឃាតកម្មបាញ់សម្លាប់ឧកញ៉ាអ៊ឹង ម៉េងជឺ កាលពីថ្ងៃទី២២ ខែវិច្ឆិកា ឆ្នាំ២០១៤នៅក្នុងខណ្ឌចំការមន។
នៅពេលសមត្ថកិច្ចធ្វើការឡោមព័ទ្ធលំនៅដ្ឋានច្រើនកន្លែងរបស់ឧកញ៉ាថោង សារ៉ាត់ លោកថោង ចំរើនជាឪពុកនិងលោកស្រីកែវ សារីជាម្តាយបានរារាំងសមត្ថកិច្ច ប៉ុន្តែនៅទី បំផុតសមត្ថកិច្ចបានរកឃើញអាវុធវែង-ខ្លីគ្រប់ ប្រភេទចំនួន១១ដើមនៅក្នុងផ្ទះរបស់គាត់ទើបឈានដល់ការចោទប្រកាន់លោកថោង ចំរើន និងលោកស្រីកែវ សារីពីបទរក្សាទុកអាវុធខុសច្បាប់ និងបទរារាំងសមត្ថកិច្ចសាធារណៈ ហើយតុលាការបានបិទការស៊ើបសួរក្រោយពេលសមត្ថកិច្ចបានចាប់ខ្លួនលោកឧកញ៉ថោង សារ៉ាត់នៅចំណុចព្រំដែនកម្ពុជា-វៀតណាម ហើយឧកញ៉ាថោង សារ៉ាត់បានឆ្លើយថាខ្លួនជាម្ចាស់កាំភ្លើងវែង-ខ្លីទាំងអស់នោះ និងឈានមកធ្វើការជំនុំជម្រះនៅថ្ងៃទី២០ឧសភា៕
