ភ្នំពេញ ៖ លោកជំទាវម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួង ទំនាក់ទំនងជាមួយរដ្ឋ សភា ព្រឹទ្ធសភា និងអធិការកិច្ច និងជាប្រធានក្រុមការងារថ្នាក់កណ្ដាលចុះជួយខេត្ដស្វាយរៀង និងមន្ត្រីថ្នាក់ខេត្ដ បាននាំយកអំណោយ សប្បុរសធម៌ ទៅចូលរួមរំលែកទុក្ខគ្រោះសារ កម្មករ រោងចក្រ ដែលជួបគ្រោះថ្នាក់ចរាចរណ៍ យ៉ាងក្រៀម ក្រំ នៅព្រឹកថ្ងៃទី១៩ ខែឧសភា ឆ្នាំ២០១៥នេះ ម៉ោង៦និង៤០នាទី តាមបណ្តោយផ្លូវជាតិលេខ១ ក្នុងស្រុកស្វាយទាបខេត្តស្វាយរៀង ដែលបង្ក ឡើងដោយរថយន្តក្រុង របស់ក្រុមហ៊ុនវៀតណាម បុកជាមួយរថយន្តទូរីស ដឹកកម្មករ ទៅធ្វើការចំនួន៣៩នាក់ ដែលកំពុង ធ្វើដំណើរទៅធ្វើការនៅក្រុងបាវិត។
អំណោយដែល លោកជំទាវម៉ែន សំអន នាំយកទៅចូលរួមរំលែកទុក្ខ អ្នកស្លាប់ចំនួន១៨ និងរងរបួសចំនួន២១នាក់ ជាថវិការបស់សម្ដេចតេជោហ៊ុនសែននិងសម្ដេចកិត្តិព្រឹទ្ធបណ្ឌិតចំពោះអ្នកស្លាប់ម្នាក់ៗ២លានរៀលនិងអ្នករបួស១ លានរៀលនិងសម្ដេចហេង សំរិន អ្នកស្លាប់ ក្នុងម្នាក់ៗ ១លានរៀល នាក់រងរបួស៥០ម៉ឺនរៀល លោកជំទាវ ម៉ែន សំអន ៥០ម៉ឺនរៀល ស្មើគ្នាជាមួយ លោកស្រីម៉ែន ភក្ដី ហុកឡងឌី នាក់ស្លាប់២០០ដុល្លារអ្នក រងរបួស៣០ម៉ឺនរៀល។ ជាមួយគ្នានេះដែរក្រសួងការងារថវិកា១លានរៀលចំពោះអ្នកស្លាប់និងរបួស៥០ម៉ឺនរឿល លោកនាយឧត្តមសេនីយ៍សៅ សុខា ទាំងអ្នកស្លាប់ និងអ្នករងរបួស១៥ម៉ឺនរៀល លោក គឹម ងួន ទាំងអ្នកស្លាប់ និងរងរបួស ចំនួន៥ម៉ឺនរៀល និងលោកយូ លឹម ទាំងអ្នកស្លាប់ និងរងរបួស៥ម៉ឺនរៀល។
លោកជំទាវម៉ែន សំអន លោកស្រីបានបញ្ជាក់ថា តាមការកត់សម្គាល់លោកស្រីតែងតែ រំលឹក គ្រោះថ្នាក់ចរាចរណ៍ តែងតែកើតមានឡើង ជាញឹកញាប់នៅតាមបណ្តោយផ្លូវជាតិលេខ ១ ចាប់ពីចំណុចទីរួមខេត្តស្វាយរៀង រហូតមកដល់ ក្រុងបាវិត ដែលជាតំបន់សំបូរទៅដោយរោងចក្រសហគ្រាសមានកម្មករ និយោជិតប្រមាណជា ៣០០០០ នាក់កំពុងបំរើការងារសព្វថ្ងៃ។ ទាក់ទងនិងបញ្ហាគ្រោះថ្នាក់ ចរាចរណ៍ក្នុងខេត្តស្វាយរៀងនេះ លោកជំទាវម៉ែន សំអន សូមស្នើឲ្យថ្នាក់ដឹកនាំខេត្ត គ្រប់លំដាប់ថ្នាក់រៀបចំឲ្យមានកិច្ចប្រជុំបន្ទាន់មួយ ដោយមានការ ចូលរួមពីភាគីពាក់ព័ន្ធដូចជា ក្រុមអ្នកបើកបរថយន្តដឹកកម្មករ ក្រុមហ៊ុនឯកជនដឹកអ្នកដំណើរនានា និងតំណាងសហជីពកម្មករ និយោជិតដើម្បីទប់ស្កាត់ នូវការកើតឡើង នៃគ្រោះថ្នាក់ចរាចរណ៍ ក្នុងខេត្តនេះ។ លោកជំទាវក៏ បានស្នើផងដែរ ដល់សប្បុរសជន នានា សូមមេត្ដាផ្ដល់អំណោយដល់ជនរងគ្រោះឲ្យបានទាន់ពេលវេលាសម្រាប់ ពួកគាត់យកមកចាត់ចែង ធ្វើបុណ្យតាមប្រពៃណីនិងក្នុងនាមរាជរដ្ឋាភិបាលសូមចូលរួមរំលែកទុក្ខជាមួយគ្រួសារសពនិងអ្នករបួសទាំងអស់ ៕
