ក្រចេះ ៖ មន្ត្រីគយចល័ត និងកងរាជអាវុធហត្ថលើផ្ទៃប្រទេស មួយក្រុមដឹកនាំដោយលោក ព្រាប គារ៉ាត់ ប្រធានការិយាល័យបង្ក្រាបអំពើរត់ពន្ធ បានបើកប្រតិបត្តិការបង្ក្រាបអំពើរត់ពន្ធឈើ ទៅលើក្បួនរថយន្តដឹកឈើជាច្រើនគ្រឿងរបស់មន្ត្រីយោធាវរការពារ ព្រំដែនកាបី (K3) ស្រុកស្នួល ខេត្តក្រចេះ និងឈានទៅដល់ការផ្ទុះអាវុធជាច្រើនរយគ្រាប់។
ជាលទ្ធផល ក្នុងប្រតិបត្តិការបង្ក្រាបរបស់ក្រុមគយចល័ត ចាប់បានរថយន្តដឹកឈើមួយគ្រឿង និងបុរសជនជាតិវៀតណាមបីនាក់ ក្នុងចំណោមរថយន្តប្រមាណ ២០ គ្រឿង ដែលបើកគេចឆ្លងដែនចូលទៅក្នុងទឹកដីប្រទេសវៀតណាមបាត់អស់ទៅ។
សេចក្តីរាយការណ៍ បាននិយាយថា បន្ទាបពីទទួលព័ត៌មាន ក្នុងសកម្មភាពអំពើរត់ពន្ធឈើ ពីសំណាក់ក្រុមឈ្មួញធំៗ នៅតំបន់ច្រកព្រំដែនខាងលើ លោក កើត សុធារ៉ា ប្រធាននាយកដ្ឋានបង្ការបង្ក្រាបអំពើរត់ពន្ធ ក៏បានចាត់តាំងក្រុមមន្ត្រីគយចល័តដឹកនាំដោយលោក ព្រាម គារ៉ាត់ សហការជាមួយកងរាជអាវុធហត្ថលើផ្ទៃប្រទេស ដើម្បីធ្វើការស្រាវជ្រាវនូវបទល្មើសព្រៃឈើទាំងនោះ។
សេចក្តីរាយការណ៍ដដែល បានបន្ថែមថា ពេលដែលកម្លាំងគយចល័តចុះច្បាមមុខសញ្ញាបទល្មើសព្រៃឈើបានហើយនោះ ក៏មានភាពតានតឹង ក្នុងការចុះទប់ស្កាត់បទល្មើសព្រៃឈើឆ្លងដែនផងដែរ។ នៅយប់ថ្ងៃទី២ ខែឧសភា ឆ្នាំ២០១៥ សមត្ថកិច្ចចម្រុះ បានចុះទៅចំណុចគីឡូម៉ែត្រលេខ១២៩ ស្ថិតក្នុងភូមិសាស្ត្រព្រំប្រទល់រវាងខេត្តក្រចេះ និងខេត្តមណ្ឌគិរី ក្នុងភូមិត្រពាំងគ្រញូង ឃុំ២ធ្នូ ស្រុកស្នួល ខេត្តក្រចេះ បានជួបនឹងក្បួនរថយន្តធុនធំដឹកឈើប្រមាណ ២០ គ្រឿង បំណងនាំឈើលោតឆ័ត ទៅប្រទេសវៀតណាម ហើយក្រុមមន្ត្រីគយចល័ត និងប៉េអឹមផ្ទៃប្រទេស ក៏បានធ្វើការឃាត់ទុក ឈានដល់ការកើតមានរឿងយ៉ាងក្តៅគគុក ដែលមានឈ្មួញម្ចាស់ឈើ ឈ្មោះ ណាក់ និងឈ្មោះ នីន ជានាយទាហានវរការពារព្រំដែន២០៤ (កាបី) ធ្វើការបាញ់រះផ្ទុះអាវុធជាច្រើនគ្រាប់ ដើម្បីរំដោះក្បួនរថយន្តដឹកឈើរបស់គេ ចូលទៅប្រទេសវៀតណាម។
ក្នុងប្រតិបត្តិការដ៏ក្តៅគគុកនាយប់នោះ សមត្ថកិច្ចគយចាប់ឃាត់បានរថយន្តកូរ៉េដឹកឈើមួយគ្រឿង ដែលគេដឹងថា មានផ្ទុកសុទ្ធតែជាឈើលេខ១ ប្រភេទសុក្រំ ប្រមាណជាង ២០ ម៉ែត្រគូប និងឃាត់ខ្លួនបុរសជនជាតិវៀតណាម ៣ នាក់ ដែលជាព្រូ និងអ្នកបើកបររថយន្ត។ ប៉ុន្តែរថយន្តដឹកឈើធុនធំ ១៩ គ្រឿងទៀត បានរួចខ្លួន ដោយសារបើកចូលទៅក្នុងទឹកដីប្រទេសវៀតណាម តាមច្រករបៀងផុតអស់ទៅ ។
ប្រភពព័ត៌មាន បញ្ជាក់បន្ថែមថា ក្រោយពេលអង្គភាពគយចល័ត និងកម្លាំងចម្រុះចុះក្តាប់មុខសញ្ញា ពីសកម្មភាពអំពើរត់ពន្ធឈើខុសច្បាប់នេះ ឈ្មួញឈើ និងអ្នកកាងឈើ ដែលជាមន្ត្រីយោធាវរការពារព្រំដែន ២០៤ បានកើតឡើងភាពតានតឹងជាបន្តបន្ទាប់ រវាងអង្គភាពគយចល័ត និងឈ្មួញទុច្ចរិតរកស៊ីឈើនៅចំណុចកាបី ក្នុងស្រុកស្នួល ហើយបន្ទាប់ពីកន្លងទៅថ្មីៗនេះ កម្លាំងគយចល័តសហការជាមួយកម្លាំងកងរាជអាវុធហត្ថលើផ្ទៃប្រទេស បានព្យាយាមចុះរឹតបន្តឹងទប់ស្កាត់ ការដឹកជញ្ជូនឈើឆ្លងដែនខុសច្បាប់ ដែលកំពុងកើតមានយ៉ាងសកម្ម និងគគ្រឹក គគ្រេងចេញពីព្រៃតំបន់អភិរក្សកាបី និងនាំយកមកស្ទុកទុកក្នុងក្រុមហ៊ុនវិនិយោគព្រៃសម្បទាន ប៊ិញភឿក (PTY) រួចដឹកចេញបន្តទៅប្រទេសវៀតណាម តាមច្រករបៀងមួយចំនួនក្បែរតំបន់នោះ ។ ការប្រកបរបររកស៊ី ខុសច្បាប់ របស់ក្រុមឈ្មួញឈើទុច្ចរិតទាំងនោះ មានសកម្មភាពច្រើនឆ្នាំមកហើយ ក្នុងនោះភាគច្រើន គេឃើញមានសមាសភាពយោធា នៃវរការពារព្រំដែនមួយក្រុមតូច ចំណុះឲ្យតំបន់ប្រតិបត្តិការសឹករងក្រចេះ ដែលឈរជើងនៅតាមខ្សែក្រវ៉ាត់ព្រំដែន២០៤។
បើតាម សេចក្តីរាយការណ៍ បានឲ្យដឹងថា ក្រោយពីមានការចាប់ឃាត់រថយន្តដឹកឈើធុនធំមួយគ្រឿងនេះ និងឈ្មួញវៀតណាមបីនាក់ សមត្ថកិច្ចក៏នាំទៅកាន់ស្នាក់ការគយប្រចាំច្រកទ្វារព្រំដែនអន្តរជាតិ ត្រពាំងស្រែ ក្នុងស្រុកស្នួល ដើម្បីរងចាំចំណាត់ការបន្ត។ ទន្ទឹមនឹងបញ្ហានេះ ក៏មានការសំណូមពរយ៉ាងទទូច ដល់សមត្ថកិច្ចគ្រប់លំដាប់ថ្នាក់ ជាពិសេស ក្រសួងការពារជាតិ និងអង្គភាពប្រឆាំងអំពើពុករលួយ មេត្តាមានវិធានការ ដល់មន្ត្រីយោធាដែលឈរជើងនៅតំបន់នោះ រកស៊ីកាងឈើខុសច្បាប់ ហើយនៅពេលសមត្ថកិច្ច ចុះបង្ក្រាប ពួកគេបាញ់រះ គ្មានខ្លាចញញើត គួរឲ្យព្រឺព្រួចបំផុត ៕