ពោធិ៍សាត់ ៖ សម្តេចតេជោ ហ៊ុន សែន បានស្នើឲ្យមានការផ្តន្ទាទោសចំពោះមន្ត្រីទាំងឡាយណាដែលបានរកឃើញថា បានកាងឲ្យឈ្មួញក្នុងការផ្តាច់មុខប្រមូលទិញកសិផលរបស់កសិករនៅ តាមឃុំ ឬស្រុកខេត្តណាមួយ ដោយមិនអនុញ្ញាតឲ្យមានអ្នកប្រមូលទិញផ្សេងចូលទៅក្នុងតំបន់ដែលពួគេកាង។
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានមានប្រសាសន៍នេះ នៅក្នុងពិធីបើកការដ្ឋានស្ថាបនាផ្លូវជាតិលេខ៥៥ នាព្រឹក ថ្ងៃទី៤ ខែឧសភា ឆ្នាំ ២០១៥ នៅខេត្តពោធិ៍សាត់ ។
សម្តេចតេជោបានមានប្រសាសន៍ថា ៖ វាមានបាតុភាពមិនប្រក្រតីខ្លះវាបានកើតមានឡើងនៅក្នុងប្រទេសរបស់យើង ហើយមិនត្រូវឲ្យវាមានទៀតទេប្រសិនជាវាមានពិតប្រាកដ៏នោះ រឿងនេះ វាមានការពាក់ព័ន្ធទៅតម្លៃកសិផល និងតម្លៃស្រូវ។ ពិតមែនហើយទីផ្សាយអន្តរជាតិវាចុះថ្លៃ ចុះថ្លៃទាំងប្រេង ទាំងស្បៀង ទាំងកៅស៊ូ អ្នកមិនផលិតស្បៀងសម្បាយចិត្ត ចំណែកអ្នកផលិតស្បៀងមិនសប្បាយចិត្ត។ ប៉ុន្តែអ្វីដែលត្រូវចៀសវាងឲ្យបានដែលក្រសួងកសិកម្ម បានលើកឡើងថា មានជើងកាងផ្តាច់មុខគ្រប់ទីកន្លែងទាំងអស់ ។
សម្តេចតេជោ បានថ្លែងទៅកាន់អស់លោកជាចៅហ្វាយខេត្ត ដែលបានចូលរួមនៅក្នុងពិធីនោះថា ចៅហ្វាយខេត្ត មកច្រើនណាស់ថ្ងៃនេះ ដូចនេះ សម្រាប់ចៅហ្វាយខេត្ត ដែលមិនបានមកមើលទូរទស្សន៍ឲ្យច្បាស់ ព្រោះមានអាជើងកាងកន្លែងខ្លះ ឲ្យផ្តាច់មុខប្រមូលទិញកសិផល ។ អាហ្នឹងត្រូវមើលកន្លែងហ្នឹងមានការខុបខិតគ្នាមួយ តំបន់ នោះវាមិនធំទេ វាតូចមួយ ឃុំ ឬ ពីរឃុំផលិតស្រូវ តែមានការខុបខិតឲ្យឈឈ្មួញតែម្នាក់ទេទិញតំបន់នោះ ខុសពី ឈ្មួញម្នាក់ហ្នឹង អ្នកដ៏ទៃមិនអនុញ្ញាតឲ្យចូលទៅប្រមូលទិញនៅកន្លែងនោះទេ ។ សូមលោកខេត្តមើលអាចំណុច នេះកុំចាំតែក្រសួងពាណិជ្ជកម្ម ឬ ក្រសួងកសិកម្ម រឿងនេះជារឿងធ្ងនធ្ងរ ត្រូវផ្តន្ទាទោសពួកមន្ត្រីដែលមានការខុប ខិតជាមួយឈ្មួញនោះ។ ហើយបើមានមន្ត្រីខុបខិតក៏ជាមន្ត្រីនៅមូលដ្ឋានដែរ ដូចនេះអាជ្ញាធរខេត្តត្រូវមើលបញ្ហា នេះឲ្យច្បាស់ ។
សម្តេចតេជោបានបន្តថា ទីផ្សារសេរីអ្នកណាចង់ទិញក៏បាន អ្នកណាឲ្យថ្លៃគឺលក់ឲ្យអ្នកនោះ។ សម្តេច បានបន្តថា មិនដឹងថានេះជារឿងពិត ឬមិនពិតនោះទេ ព្រោះលោកសមរង្សីក៏បានវាយ SMS មួយមកសម្តេចដែរ ពេលដែលលោកចុះទៅព្រៃគ្រី ហើយសម្តេច ក៏បាន Forword ទៅឲ្យលោក ស៊ុន ចាន់ថុល រដ្ឋមន្ត្រីពាណិជ្ជកម្ម ទៅឲ្យលោក អ៊ុក រ៉ាប៊ុន រដ្ឋមន្ត្រីក្រសួងកសិកម្ម និងទៅឲ្យ លោក អ៊ូន ព័ន្ធមុនីរត្ន រដ្ឋមន្ត្រីក្រសួងពាណិជ្ជកម្ម ។
សម្តេចតេជោ បានបន្តថា “រឿងនេះលោកក៏ធ្លាប់បានឮដែរ ករណីថ្នាំកូតាប នៅតាមដងទន្លេមេគង្គ ឆ្នាំទៅ យើងដាច់ឲ្យដេញថ្លៃ មន្ត្រីខុបខិតឲ្យអាឈ្មួញម្នាក់ផ្តាច់មុខ វាទៅសង្កត់ក លានអណ្តាត អ្នកលក់ដ្នាំកូតាប អញ្ចឹងបានជាខ្ញុំបញ្ជាឲ្យមានការលប់ចោលភ្លាម គេថាវាបង់ចូលរដ្ឋ១ លាន ខ្ញុំថាតិចណាស់ រដ្ឋបាន ១លាន តែវាបានរាប់លាន ហើយសង្កត់កប្រជាពលរដ្ឋ ឥឡូវអ្នកណាហានឲ្យថ្លៃលក់ឲ្យអ្នកនោះហើយជីក៏អញ្ចឹងដែរត្រូវពិនិត្យតម្លៃជី និងគុណភាពជី”។
គួររំលឹកថា ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីណែនាំដល់មន្ទីរកសិកម្មនានា ឲ្យពិនិត្យមើលករណីដែលឈ្មួញកណ្ដាល ដើរទិញស្រូវពីកសិករក្នុងតម្លៃទាបជាងតំលៃលើទីផ្សារសេរី ពោលគឺទិញតាមតម្លៃ ដែលឈ្មួញជាអ្នកកំណត់តាមអំពើចិត្តខ្លួនឯង។
សេចក្តីណែនាំចេញ កាលពីថ្ងៃទី៣ ខែឧសភា ដោយសារក្រសួងនេះ ទទួលព័ត៌មានបានថា ឈ្មួញខិលខូច រៀបចំវិធានការមិនស្របច្បាប់ និងខុសក្រឹតក្រមទីផ្សារសេរី ដោយបណ្តោយឲ្យក្រុមឈ្មួញកណ្តាលទិញស្រូវពីកសិករ ក្នុងតម្លៃថោក។
សម្តេចតេជោ បានមានប្រសាសន៍ដោយស្នើឲ្យមានការយកចិត្តទុកដាក់ចំពោះបញ្ហាតម្លៃនេះ ដោយយកយន្តការទីផ្សារជាអ្នកកាត់សេចក្តីអត់មានជើងកាង អត់មានជើងប៉ាវ បើមានអាហ្នឹង គឺខុសក្រឹតក្រមហើយ។ សម្តេចជម្នះធ្វើសេដ្ឋកិច្ចទីផ្សារតាំង ពីប្រទេសរុស្សី ប្រទេសចិន ប្រទេសវៀតណាម នៅជាសេដ្ឋកិច្ចផែនការម្ល៉េះ ៕