ភ្នំពេញ: ក្រសួងការងារ និងសហជីពកម្មករ នៅព្រឹកថ្ងៃទី១ឧសភានេះ បានប្រារព្ធពិធីជួបជុំផ្សេងគ្នា ដើម្បីសាទរទិវាពលកម្មអន្តរជាតិ ថ្ងៃ១ឧសភា។ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំកម្មវិធីជួបជុំអបអរសាទរ ខួបអនុស្សាវរីយ៍ លើកទី១២៩ ទិវាពលកម្មអន្តរជាតិ ១ឧសភា ក្រោមប្រធាន “សាមគ្គីភាព ផលិតភាព និងការងារ” នៅទីស្តីការក្រសួងការងារ។ ដោយឡែកសហជីពកម្មករ បានជួបជុំ នៅទីលានប្រជាធិបតេយ្យ និងនៅសួនច្បារ មុខវត្តបទុមវតី។
ពិធីជួបជុំសាទរទិវាពលកម្មអន្តរជាតិ ថ្ងៃ១ឧសភា របស់ក្រសួងការងារ បានបើកទូលំទូលាយឲ្យមានការចូលរួមពីគ្រប់តំណាងភាគីពាក់ព័ន្ធ ក្នុងវិស័យការងារ រួមមាន តំណាងក្រសួង-ស្ថាប័នរដ្ឋពាក់ព័ន្ធអង្គការវិជ្ជាជីវៈកម្មករនិយោជិត និយោជក អង្គការអន្តរជាតិខាងការងារ ( ILO ) និងអង្គការសង្គមស៊ីវិល។
សេចក្តីប្រកាសព័ត៌មានលើកឡើងថា ក្នុងពិធីជួបជុំនៅព្រឹកនេះ ក្រសួង ក៏រៀបចំនូវវេទិកាការងារ សំដៅពិភាក្សា និងស្វែងរកដំណោះស្រាយរួមគ្នាលើបញ្ហាកង្វល់ ឬសំណូមពរជាអាទិភាពរបស់បងប្អូនកម្មករនិយោជិត និងនិយោជក នឹងមានរៀបចំកម្មវិធីវប្បធម៌ការប្រឡងជ្រើសរើសកម្មការិនីសម្រស់ឯកផងដែរ។
ដោយឡែកសហជីពកម្មករ ដឹកនាំដោយលោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ ក៏បានប្រារព្វទិវាពលកម្មអន្តរជាតិ ថ្ងៃ១ឧសភា នៅទីលានប្រជាធិបតេយ្យ ក្នុងរាជធានីភ្នំពេញ។ បន្ទាប់ពិធីជួបជុំនោះ សហជីពកម្មករ ក៏គ្រោងនឹងដង្ហែក្បួនដាក់ញ្ញត្តិ នៅស្ថានទូតអាមេរិក សហភាពអឺរ៉ុប និងរដ្ឋសភា ពាក់ព័ន្ធនឹងសិទ្ធិសេរីភាព និងបញ្ហារបស់កម្មករផងដែរ ។
ចំណែកសហជីពកម្មកររបស់លោក អាត់ ធន់ បានជួបជុំប្រារព្ធទិវាពលកម្មអន្តរជាតិ ថ្ងៃ១ឧសភា នៅសួនច្បារ មុខវត្តបទុមវតី ក្នុងរាជធានីភ្នំពេញ ផងដែរ ៕