ភ្នំពេញ ៖ លោកស្រី ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច នៅរសៀលថ្ងៃទី២៩ ខែមេសា ឆ្នាំ២០១៥នេះ បានដឹកគណៈប្រភូមួយក្រុម អញ្ជើញទៅចូលក្នុងពិធីបុណ្យខួប ៤០ ឆ្នាំ នៃថ្ងៃរំដោះសាធារណរដ្ឋសង្គមនិយមវៀតណាម។ ការអញ្ជើញទៅចូលរួមនោះ តបតាមការអញ្ជើញរបស់សាធារណរដ្ឋសង្គមនិយមវៀតណាម។
ក្នុងពេលជូនដំណើរលោកស្រី ម៉ែន សំអន ជាតំណាងឲ្យប្រទេសកម្ពុជា នៅព្រលានយន្តហោះអន្តរជាតិភ្នំពេញ មន្ត្រីជាន់ខ្ពស់ នៃក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ច បានមានប្រសាសន៍ថា ខួប ៤០ ឆ្នាំ ( ៣០មេសា១៩៧៥-៣០មេសា២០១៥ ) គឺជាថ្ងៃរំដោះវៀតណាមខាងត្បូង ក៏ដូចជា រំដោះវៀតណាមទាំងស្រុងផងដែរ និងជាថ្ងៃបង្រួបបង្រួមវៀតណាមទាំងមូលផងដែរ។ ពិធីនេះ វៀតណាមបានប្រារព្ធពិធីធំណាស់ នៃការរួបរួមគ្នារវាងវៀតណាមខាងត្បូង និងវៀតណាមខាងជើងឡើងវិញ។ ទិវានេះ ក៏មានឥទ្ធិពលធំធេង មកលើឥណ្ឌូចិនទាំងមូល រួមទាំងប្រទេសឡាវ និងកម្ពុជា ផងដែរ។
មន្ត្រីជាន់ខ្ពស់រូបនោះ បានបន្តទៀតថា ក្នុងដំណើរអញ្ជើញចូលរួមខួប ៤០ ឆ្នាំនោះដែរ លោកស្រី ម៉ែន សំអន មានគម្រោងជួបជាមួយឧបនាយករដ្ឋមន្ត្រី វៀតណាម និងថ្នាក់ដឹកនាំកំពូលៗ នៃទីក្រុងហូជីមិញ ក្នុងន័យពិភាក្សាការងារ លើកិច្ចសហប្រតិបត្តិការ សេដ្ឋកិច្ច ពាណិជ្ជកម្ម រវាងកម្ពុជា-វៀតណាម។
មន្ត្រីរូបនោះ បានបញ្ជាក់ទៀតថា លោកស្រី ម៉ែន សំអន និងគណៈប្រតិភូ នឹងអញ្ជើញធ្វើមាតុភូមិនិវត្តន៍ មកព្រះរាជាណាចក្រកម្ពុជាវិញ នាល្ងាចថ្ងៃទី១ ខែឧសភា ឆ្នាំ២០១៥ តាមជើងយន្តហោះ នៅព្រលានយន្តហោះអន្តរជាតិភ្នំពេញ ៕