កំពង់ឆ្នាំង ៖ លោក សុខ នាង អាយុ៣៤ឆ្នាំ មានទីលំនៅក្នុង ភូមិបាញ់ឆ្គោល ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ដែលជាអ្នកដើរប្រមូលទិញ ក្អម ឆ្នាំង និងវត្ថុអនុស្សាវរីយ៍ផ្សេងៗ យកមកលក់ នៅក្នុងរាជធានីភ្នំពេញ និងតាមបណ្តាខេត្តនានា បាននិយាយថា គាត់បានប្រកបរបរដើរលក់ ក្អម ឆ្នាំងដី នេះ អស់រយៈពេលជិត១០ឆ្នាំ មកហើយ ដោយដឹកតាមរទេះគោ លក់នៅក្នុងរាជធានីភ្នំពេញ និងខេត្តនានា មានដូចជា ខេត្តព្រៃវែង ស្វាយរៀង និងខេត្តផ្សេងៗទៀត ។
លោកបានបន្តទាំងទឹកមុខ ស្រស់ស្រាយថា នៅឆ្នាំនេះ លោកបានដើរប្រមូលទិញក្អម ឆ្នាំងរបស់ប្រើប្រាស់ និងវត្ថុអនុស្សាវរីយ៍ ដែលស្មូនអំពីដីឥដ្ឋរបស់អ្នកភូមិអណ្តូងឫស្សី យកទៅលក់ ដោយក្នុងមួយជើងៗ ត្រូវចំណាយពេល ចាប់ពី ៣ថ្ងៃ ទៅ៧ថ្ងៃ ទើបត្រឡប់ទៅយកទៀត ដោយក្នុងនោះ បានទូទាត់ផាត់ថ្លៃហូបចុកចេញ បានសល់ប្រាក់ ពី៤០ ទៅ ៦០ ម៉ឺនរៀលដែរ។
លោកពូ មឿន ព្រមទាំងក្រុមគ្រួសារ ជាអ្នកប្រកបរបរធ្វើក្អមឆ្នាំងដី ដែលស្មូនពីដីឥដ្ឋ បានរៀបរាប់ថា ក្រៅពីជួយធ្វើ និងផលិតក្អមឆ្នាំងដី និងរបស់របរដែលស្មូនពីដីនោះ គឺរូបគាត់ក៏បានដឹកតាមម៉ូតូ រ៉ឺម៉ក យកមកលក់នៅរាជធានីភ្នំពេញដែរ ដោយក្នុងមួយជើង រូបគាត់ត្រូវចំណាយពេល ៣ ទៅ៥ថ្ងៃ ទើបត្រឡប់មកផ្ទះវិញ ហើយអាចចំណេញប្រាក់បាន ចាប់ពី ៨០ម៉ឺន ទៅ ១លានរៀន ឬលើសពីនេះ ក៏មានដែរ ព្រោះរបស់ទាំងនេះ គឺលោក និងក្រុមគ្រួសារ ផលិតដោយខ្លួនឯងផ្ទាល់ គ្មានទទួលទិញពីអ្នកភូមិណា យកមកលក់ ចំណេញក្បាលកាក់នោះទេ។
លោកបានប្រាប់ពីផលិតផល អំពីដីទាំងនោះថា ការផលិតរបស់របរអំពីដីទាំងនេះ គឺពួកគាត់បានចេះតៗគ្នា មកពីដូនតាច្រើនជំនាន់មកហើយ តែគ្រាន់ពីមុនធ្វើដោយដៃ ហើយប្រើដោយកម្លាំងសុទ្ធសាធ ប៉ុន្តែមកដល់សម័យឥឡូវ ជាសម័យជឿនលឿន មានការរីកចំរើនផ្នែកបច្ចេកវិទ្យាទំនើប និងមានរបស់របរប្រើប្រាស់ ដោយស្វ័យប្រវត្តិ ដោយអគ្គិសនីនោះ ហើយវាក៏អាចកាត់បន្ថយការប្រើប្រាស់ដោយកម្លាំង បានមួយភាគនោះ ម្យ៉ាងវាជួយឲ្យមានការរីកចំរើន បានច្រើនជាងមុនផងដែរ។
ពីមុនមកពេលមិនទាន់មានឧបករណ៍ស្វ័យប្រវត្តិ គឺការផលិត មានការយឺតយ៉ាវណាស់ ពេលធ្វើម្តងៗ ត្រូវដើរក្រឡឹង រាប់រយជុំ ទម្រាំធ្វើបានរបស់មួយៗ វាពិបាកណាស់ ទម្រាំបានរបស់នីមួយៗនោះ។
លោកបានបន្តថា ក្នុងក្អម ឬឆ្នាំង ក្នុងមួយ គឺមានតំលៃ ទៅតាមទំហំធំ ឬតូច ២.៥០០រៀល ទៅ ៤.០០០រៀល ហេតុនេះហើយ ទើបប្រជាពលរដ្ឋ និងអ្នកស្មូនឆ្នាំង នៅខេត្តកំពង់ឆ្នាំង នៅតែបន្តនាំគ្នា ការពារ និងអភិរក្ស រហូតមកដល់សព្វថ្ងៃនេះ។
ដោយសារតែការចេះផលិត ក្អមឆ្នាំង និងវត្ថុអនុស្សារីយ៍ ដែលជាមរតក ពីដូនតាខ្មែរ បន្សល់ទុកឲ្យប្រជាពលរដ្ឋ នៅខេត្តកំពង់ឆ្នាំង ដែលប្រកបរបរស្មូនឆ្នាំង ផលិតពីដីនោះ ពិតជាមានមោទនភាពណាស់ និងសូមថ្លែងអំណរគុណយ៉ាងជ្រាលជ្រៅទៅដល់ដូនតាជំនាន់មុន ដែលបង្កើតមុខរបរដ៍វិសេសវិសាល ដែលមិនអាចកាត់ថ្លៃបានមួយនេះ ទុកឲ្យកូនចៅជំនាន់ក្រោយ ប្រកបអាជីពសម្រាប់ចិញ្ចឹមក្រុមគ្រួសារទៅថ្ងៃអនាគត ៕