រាជធានីភ្នំពេញ ៖ លោកសម រង្ស៊ី ប្រធានគណបក្សសង្គ្រោះជាតិ បានថ្លែងនៅក្នុងពិធីសំណេះសំណាលជាមួយសមាជិក សមាជិកាក្រុមប្រឹក្សាឃុំ សង្កាត់រាជធានីភ្នំពេញ កាលពីព្រឹកថ្ងៃទី៣ ខែវិច្ឆិកាថា គណបក្សសង្គ្រោះជាតិ ទាមទារឲ្យទាល់តែបានអភិបាលរាជធានីភ្នំពេញ ។
មេដឹកនាំគណបក្សសង្គ្រោះជាតិ បានប្រកាសប្តេជ្ញាចិត្ត ក្នុងការទាមទារយកតំណែងអភិបាលរាជធានីភ្នំពេញ ឲ្យទាល់តែបាន ដែលបច្ចុប្បន្ន ស្ថាប័នមួយនេះ គ្រប់គ្រងដោយលោកប៉ា សុជាតិវង្ស ជាអភិបាល។ ការទាមទារតំណែងនេះ គឺដោយសារតែសំអាងថា គណបក្សសង្គ្រោះជាតិ ឈ្នះគណបក្សប្រជាជនកម្ពុជា នៅក្នុងរាជធានីភ្នំពេញ ដោយលទ្ធផល ៧ទល់នឹង៥ នៅក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៥។
លោកមានប្រសាសន៍ដូច្នេះថា ៖ “យើងទាមទារឲ្យទាល់តែបានអភិបាលក្រុងរាជធានីភ្នំពេញ មកពីគណបក្សសង្គ្រោះជាតិ ដើម្បីគោរពឆន្ទៈប្រជារាស្ត្រ ដូច្នេះសូមបងប្អូនទាំងអស់ ត្រៀមខ្លួនយើងជានិច្ច។ យើងត្រូវពង្រឹងកំលាំងរបស់យើងនៅមូលដ្ឋាន ពង្រឹងវិន័យ របស់យើង ស្មារតីយើង យើងប្រមូលកំលាំងរក្សាកំលាំងឲ្យកាន់តែទូលំទូលាយបន្ថែមទៀត ដើម្បីឈានទៅដល់ដំណាក់កាលមួយទៀត។ នៅភ្នំពេញ យើងបានឈ្នះដាច់លើគណបក្សប្រជាជន ដោយលើសពីរកៅអី យើង៧ គេ៥ ហើយបើគិតជាភាគរយយើងឈ្នះច្រើនណាស់” ។
លោកសម រង្ស៊ី បានបញ្ជាក់ថា “ភ្នំពេញ ជាបេះដូង ជាក្បាល មិនយូរមិនឆាប់ តែក្បាលទៅណាហើយ ខ្លួនប្រាណទាំងមូល និងទៅតាមគ្នាហើយ ដូច្នះតួនាទីយើងជាបេះដូង ជាក្បាល ដែលធ្វើជាអ្នកនាំមុខនោះ ឲ្យសឿងជាគំរូ ពីព្រោះយើងជាបេះដូង ជាក្បាល ជាអ្នកដឹកនាំ យើងត្រូវតែខ្លាំង ដើម្បីនាំខេត្តដែលនៅឆ្ងាយៗ បានផ្សព្វផ្សាយចំហាយពីភ្នំពេញ។ យើងឈ្នះកំពង់ចាម យើងឈ្នះភ្នំពេញ ព្រៃវែង កណ្តាល កំពង់ស្ពឺ ហើយនៅពេលបន្តិចទៀត ចំហាយនេះ និងទៅឆ្ងាយទៅ ឈ្នះទូទាំងប្រទេស យ៉ាងយូរមួយឆ្នាំ ពីរឆ្នាំទៀត យើងនឹងឈ្នះ យើងត្រូវយកអំណាចទាំងអស់”៕