សៀមរាប ៖ សមត្ថកិច្ចរដ្ឋបាលព្រៃឈើ ដឹកនាំដោយតំណាងអាយ្យការអមសាលាដំបូង ខេត្ត នៅព្រឹកថ្ងៃទី១០ ខែមីនា បានស្ទាក់ចាប់ឡានស៊េរីទំនើប ដឹកឈើគ្រញូងមួយគ្រឿង ត្រង់ចំណុចផ្លូវលំមួយខ្សែ ក្នុងភូមិទ្រាំង សង្កាត់ស្លក្រាម។
លោក ម៉ុង ប៊ុនលីម នាយផ្នែករដ្ឋបាលព្រៃឈើបន្ទាយស្រី បានឲ្យដឹងថា ឡានដឹកឈើគ្រញូង ដែលបង្ក្រាបម៉ាកនីសាន់ ណាវារា ពណ៌ខ្មៅគ្មានស្លាកលេខ។ ក្នុងពេលសមត្ថកិច្ចស្ទាក់ចាប់ អ្នកបើកបរ និងអ្នករួមដំណើរពីរនាក់ទៀត បានរត់ចូលព្រៃគេចខ្លួនបាត់។
លោកបន្តថា ពុំមាននរណាដឹងថា ឡានល្មើសខាងលើនេះ ដឹកឈើគ្រញូងចេញពីចំណុចណា ហើយបំណងឆ្ពោះទៅកាន់ទីណានោះទេ ពីព្រោះពេលកើតហេតុ ពួកគេបានរត់គេចខ្លួនអស់ទៅហើយ។
លោកបានឲ្យដឹងទៀតថា ឈើដែលបង្ក្រាបបាន មានចំនួន ១១៥ ដុំ មានទម្ងន់ ៦៧២ គីឡូក្រាម ស្មើ ០,៥៦ ម៉ែត្រគូប។ ឡាន និងឈើ ត្រូវបានយកទៅរក្សាទុក នៅថ្នាលបណ្តុះកូនឈើ ឃុំព្រះដាក់ ដើម្បីអនុវត្តបន្ត។
ទោះជាយ៉ាងនេះក្តី ព័ត៌មានបានឲ្យដឹងថា ឡានដែលរងការបង្ក្រាបនោះ គឺបានដឹកឈើគ្រញូង ចេញពីតំបន់ជើងភ្នំ ស្រុកអន្លង់វែង ខេត្តឧត្តរមានជ័យ។ ក្នុងពេលធ្វើដំណើរចេញពីគោលដៅ ចូលមកកាន់ខេត្តសៀមរាប សមត្ថកិច្ចតាមដងផ្លូវ បានស្ទាក់មើលដែរ តែអ្នកបើកបរប្រាប់ថា គឺជាសាច់មាន់ដឹកចេញពីច្រកជាំសាង៉ាំទេ ពុំមែនទំនិញអ្វីផ្សេងនោះឡើយ ។ ឮដូច្នេះ សមត្ថកិច្ចទាំងនោះ ទទួលតែប្រាក់បន្តិចបន្តួច ក៏ឲ្យបន្តដំណើរជាធម្មតា។ ប៉ុន្តែមិនដឹងថា រាសីស្រុតចុះយ៉ាងម៉េច បែរជាមកជួបមេព្រៃខេត្តសៀមរាប ហើយក៏ដេញប្រផាប់ចាប់ប្រភីង បានដោយជោគជ័យ ចាប់បានទាំងឡាន និងទាំងឈើ ដែលអ្នកបើកឡាន និងអ្នកជិះក្នុងឡាន ចាប់អត់បាន ទៅវិញ ៕
