ប្រភពសេចក្តីរាយការណ៍ពីស្រុកឆែបបានអោយដឹងថាទំនិញគេចពន្ធជាច្រើនប្រភេទសម្រុកឆ្លងដែនច្រកកំពុងស្រឡៅ ទៅប្រទេសឡាវ យ៉ាងស្ងាត់ស្ងៀមជារៀងរាល់ ថ្ងៃសកម្មភាពនៃការនាំទំនិញឆ្លង ដែនទៅប្រទេសឡាវបាននឹងកំពុងកើតមានយ៉ាងស្រាក់ស្រាំ ដោយមិនមាន សមត្ថកិច្ចណាត្រួតពិនិត្យឲ្យបានច្បាស់លាស់នោះឡើយ ។ ផ្ទុយទៅវិញវាជាគ្រានតែការត្រូវរូវគ្នារបស់ប្រធានច្រកកំពុងស្រឡៅដែលឈមជាមួយភាគីឡាវតែប៉ុណ្ណោះ។ ហើយនៅច្រកព្រំដែននេះមិនមានការត្រួតពិនិត្យឲ្យបានតឹងរឹងនោះឡើយ។មួយរយៈពេលនេះមានការផ្ទុះកក្រើកឡើងនូវបទល្មើសឆ្លងដែនខុសច្បាប់ ជាប់ព្រំដែនប្រទេសឡាវ តាមដងទន្លេ ក្នុងភូមិ សាស្ត្រច្រកកំពង់ស្រឡៅ ស្ថិតក្នុងភូមិកំពង់ស្រឡៅ ឃុំកំពង់ស្រឡៅមួយស្រុកឆែប ខេត្តព្រះវិហារ ដោយពុំឃើញសមត្ថកិច្ចជំនាញធ្វើការបង្ក្រាបនោះទេ។
បទល្មើសឆ្លងដែនខុសច្បាប់ ដែលកំពុងកើតមានឡើងនៅច្រកកំពង់ស្រឡៅសព្វថ្ងៃរួមមាន៖ *ទី១៖ ការនាំជនជាតិចិនឆ្លងដែនដោយខុសច្បាប់ទៅប្រទេសឡាវ*ទី២៖ ការនាំស៊ីម៉ង់ត៍ពីប្រទេសឡាវតាមទូក កាណូត ចូលមកប្រទេសកម្ពុជារាប់សិបតោនក្នុង១ ថ្ងៃៗ*ទី៣៖ ការនាំបារីទៅប្រទេសឡាវការនាំប្រេងឥន្ធនៈពីប្រទេសឡាវចូលមកប្រទេស កម្ពុជា…..ជាដើម។
តាមសេចក្តីរាយការណ៍ឱ្យដឹងថា សកម្មភាពនាំទំនិញខុសច្បាប់ដែលឈ្មួញនាំចូលពីប្រទេសឡាវ ចូលមកកម្ពុជាតាមច្រកកំពង់ស្រឡៅ ពុំមានសមត្ថកិច្ចជំនាញទប់ស្កាត់ ឫបង្រ្កាបនោះទេ ដែលទំនិញភាគច្រើនឈ្មួញនាំចូលទាំងព្រឹក ទាំងថ្ងៃ តាមទូក រួចលើកដាក់រថយន្តតែម្តង ដូចជាស៊ីម៉ង់ត៍ជាដើម។ គេសង្ស័យថា ការមិនបង្ក្រាបរបស់សមត្ថកិច្ចជំនាញ លើទំនិញឆ្លងដែនខុស ច្បាប់ទាំងនេះ ប្រហែលជាសមត្ថកិច្ចទទួលបានផលប្រយោជន៍ណាមួយហើយមើល ទៅ។
នៅច្រកកំពង់ស្រឡៅនេះគេខ្សិបថា លោកថៅកែកេនជាអ្នកម៉ៅផ្ដាច់ក្នុងការរកស៊ីដឹកទំនិញ ហើយមន្ត្រីមាន សមត្ថកិច្ចដែលឈរ ជើងនៅទីនោះមិនចាំបាច់ត្រួតពិនិត្យអ្វីឡើយ ។ ជាងនេះទៅទៀតលោកកេនគ្រាន់តែទាក់ ទងតាមទូរសព្ទជាមួយសមត្ថកិច្ចគឺទំនិញទាំងអស់នោះត្រូវបានដឹកជញ្ជូនឆ្លងដែនដោយសុវត្ថិភាព។ ប្រាកដណាស់ថាទំនិញ ភាគច្រើនមិនមានការបង់ពួននោះទេទាំងការនាំចេញនិងការនាំចូល។ ដូច្នេះវាជាផលប្រយោជន៍របស់ឈ្មួញនិងសមត្ថកិច្ចជំនាញនានានៅច្រកព្រំដែនកំពង់ស្រឡៅនេះ។
គេនិយាយថាច្រកកំពូលស្រឡៅជាប្រភព ហិរញ្ញវត្ថុរបស់អភិបាលខេត្តព្រះវិហារ និងលោកឧត្តមសេនីយ៍ស្នងការនគរបាលខេត្ត។ ដូច្នេះដើម្បីជម្រះមន្ទិលនេះគេសង្ឃឹម ថាលោកអភិបាលខេត្ត គឹម រិទ្ធីនិងលោកស្នងការ នឹងចាត់មន្ត្រីជំនាញចុះត្រួតពិនិត្យ និងបង្ក្រាបជាក់ស្តែង លើការនាំទំនិញដោយខុសច្បាប់ចូលមកក្នុងប្រទេសការច្រកកំពង់ស្រឡៅនេះផង។