ខេត្តកំពត៖ ប្រភពពីប្រជាពលរដ្ឋនៅភូមិព្រែកក្រឹស ឃុំព្រែកក្រឹស ស្រុកកំពង់ត្រាច ខេត្តកំពត បានឲ្យដឹងថា ម្ចាស់កាស៊ីណូយីហោ សុខ គីមម៉េង ច្រកតន់ហន់ នៅតែបើកឲ្យពលរដ្ឋខ្មែរចូលលេងល្បែងជល់មាន់និងល្បែងច្រើនប្រភេទទៀតយ៉ាងពេញបន្ទុកដោយគ្មានញញើតអ្វីទាំងអស់ព្រោះគេអាងមានខ្នងបង្អែករឹងមាំ។
មន្ត្រីអាជ្ញាធរ និងសមត្ថកិច្ចនគរបាលឃុំព្រែកក្រឹស ក៏ដូចជាមន្ត្រីអាជ្ញាធរ និងសមត្ថកិច្ចនគរបាល ស្រុកកំពង់ត្រាច មិនហ៊ានប៉ះពាល់បុគ្គលឈ្មោះ សុខ ចាយ ដែលបើកល្បែងជល់មាន់ បៀ អាប៉ោង យូគី នៅក្នុងកាស៊ីណូយីហោ សុខ គីមម៉េង នោះទេ។ សូម្បីតែលោក ម៉ៅ ច័ន្ទមធុរិទ្ធ ស្នងការដ្ឋាននគរបាលខេត្តកំពត និងលោក ម៉ៅ ធនិន អភិបាលខេត្តកំពត ក៏មិនហ៊ានប៉ះពាល់ដែរបណ្ដោយឲ្យម្ចាស់កាស៊ីណូយីហោ សុខ គីមម៉េង នៅច្រកតន់ហន់ធ្វើអ្វីៗតាមអំពើចិត្តដែរ។
បេីតាមប្រភពពីអ្នកធ្លាប់ចេញ ចូលទៅលេងបានអះអាងថាសង្វៀនជល់មាន់ និងវង់បៀ អាប៉ោង យូគី ក្នុងកាស៊ីណូយីហោ សុខ គីមម៉េង អ្នកចូលទៅលេងល្បែងក្នុងកាស៊ីណូ នេះសុទ្ធតែជាពលរដ្ឋខ្មែរ គឺគ្មានជនបរទេសនោះទេ?ដោយក្នុងមួយថ្ងៃៗមេល្បែងស៊ីសងឈ្មោះ សុខ ចាយ ប្រមូលលុយបានយ៉ាងច្រើនសន្ធឹកសន្ធាប់។
ជាក់ស្តែងពលរដ្ឋខ្មែរមកពីគ្រប់ទិសទី សម្រុកចូលលេងល្បែងក្នុងកាស៊ីណូយីហោ សុខ គីមម៉េង យ៉ាងគគ្រឹកគគ្រេងដោយមិនខ្លាចជំងឺឆ្លងរាលដាលកូវីដ ១៩ នោះទេ ហើយមានអ្នកចាញ់អស់រហូតឈានទៅដល់ប្រចាំទ្រព្យសម្បត្តិផ្សេងៗទៀតផង។ ចំឡែកអ្នកឈ្នះស្រែកហ៊ោរកញ្ជ្រៀវទ្រហឹងអឹងកងមិនខ្វល់អ្វីទាំងអស់(សុភាសិតខ្មែរពោលថាអ្នកឈ្នះមុខខ្លាញ់អ្នកចាញ់មុខសេះអស់ដំរេះអង្គុយទាយ)។
ប្រភពខ្លះបានបង្ហើបឲ្យដឹងថា មានមន្ត្រីធំៗនិងសមត្ថកិច្ចក្នុងខេត្តកំពត មួយចំនួនដែលប្រព្រឹត្តអំពើពុករលួយទទួលផលប្រយោជន៍ពីម្ចាស់កាស៊ី ណូយីហោ សុខ គីមម៉េង ទើបអ្វីៗអាចប្រព្រឹត្តទៅយ៉ាងរលូន។
ប្រជាពលរដ្ឋបានអំពាវនាវឲ្យថ្នាក់ដឹកនាំក្រសួងមហាផ្ទៃ និងនាយឧត្ដមសេនីយ៍សន្តិបណ្ឌិត នេត សាវឿន អគ្គស្នងការនគរ បាលជាតិ ចាត់វិធានការទប់ ស្កាត់ភាពមិនប្រក្រតីក្នុងកាស៊ីណូយីហោ សុខ គីមម៉េង ជាបន្ទាន់ ដើម្បីកុំឲ្យម្ចាស់កាស៊ីណូនេះ បំពានច្បាប់តាមអំពើចិត្តតទៅទៀត។
មហាជនរិះគន់ចំៗថាលោក ម៉ៅ ច័ន្ទមធុរិទ្ធ ស្នងការដ្ឋាននគរបាលខេត្តកំពត និងលោក ម៉ៅ ធនិន អភិបាលខេត្តកំពត មិនយកចិត្តទុកដាក់បង្ក្រាបល្បែងស៊ីសងដើម្បីពង្រឹងសន្តិសុខសង្គមឲ្យស្របតាមគោលនយោ បាយភូមិឃុំ មានសុវត្ថិភាពទាំង៧ចំណុចដែលរាជរដ្ឋាភិបាលដាក់ចេញដោយក្រសួងមហាផៃ្ទនោះឡើយ៕មានត
