ព្រៃវែង ៖ ប្រភពពីក្រុមឈ្មួញ ដឹកទំនិញឆ្លងកាត់ស្ថានីយ៍ជញ្ជីងថ្លឹងរថយន្តព្រែកព្នៅ លើផ្លូវជាតិលេខ៨ បញ្ជាក់ថា សព្វថ្ងៃនេះប្រធានជញ្ជីងថ្លឹងរថយន្ត កំពុងសប្បាយចិត្តប្រមូលលុយចែកគ្នាធ្វើមានធ្វើបាន យ៉ាងសុខស្រួល បើទោះរថយន្តធំៗផ្ទុកមិនលើសទទម្ងន់ ក៍ត្រូវតែបង់លុយតាមការកំណត់របស់ប្រធានអោយខានតែបានមិនអាចតវ៉ាបាននៅតែអាចធ្វើសកម្មភាពទាំងយប់ទាំងថ្ងៃ។ ចំណែកលោក ស៊ុន ចាន់ថុល រដ្ឋមន្ត្រីក្រសួងសាធារណៈការនិងដឹកជញ្ជូននិងលោកសេង ឈួនប្រធានជញ្ជីងថ្លឹងរថយន្តទូទាំងប្រទេសបែរជាធ្វើមិនដឹងមិនឮអ្វីទាំងអស់។មេឈ្មួញធំៗ និងអាជីវករដែលដឹកជញ្ជូនទំនិញ ចេញ ពីស្រុកយួន តាមច្រកទ្វារអន្តរជាតិព្រំដែន មុឺនជ័យ និងច្រកទ្វារអន្តរជាតិព្រំដែនត្រពាំងផ្លុង ឆ្លងកាត់ផ្លូវ ជាតិលេខ៨ ក្នុងស្រុកពារាំង បានឲ្យដឹងថាបើទោះបីពួកគេផ្ទុកលើសទម្ងន់ ឬមិនលើសទម្ងន់យ៉ាងណាក៏ដោយ ក៏ត្រូវតែបង់លុយតាមការកំណត់របស់ក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តផ្លូវជាតិលេខ ៨ ក្នុងភូមិព្រែកព្នៅ ឃុំព្រែកព្នៅ ស្រុកពារាំងខេត្តព្រៃវែងមិនអាចអាក់ខានបានឡើយ។
ប្រភពក្រុមឈ្មួញនិងអាជីវករមួយចំនួនបានបន្ថែមទៀតថា ពួកគាត់ដឹកជញ្ជូនទំនិញ ឬកសិផលផ្សេងៗមកពីខេត្តនា នា ឆ្លងកាត់ស្ថានីយ៍ជញ្ជីងថ្លឹងរថយន្តព្រែកព្នៅ ស្រុកពារាំង ដោយគោរពតាមច្បាប់កំណត់ក៏នៅ តែចៀសមិនផុតពីបង់លុយ ឲ្យក្រុមមន្ត្រីពុករលួយ និងបក្សពួកប្រចាំស្ថានីយ៍ជញ្ជីងថ្លឹងរថយន្តនោះដែរ ។
ដូច្នេះហើយទើបមានការអំពាវនាវឲ្យលោក ជា សុមេធី អភិបាលខេត្តព្រៃវែងក៏ដូចជាលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹក ជញ្ជូន ចាត់វិធានការទប់ស្កាត់អំពើពុករលួយរបស់ប្រធាន មន្ទីរ សាធារណៈការនិងដឹកជញ្ជូនខេត្តព្រៃវែងនិងប្រធានជញ្ជីងថ្លឹងរថយន្តនិងក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តភូមិព្រែកព្នៅ ជាបន្ទាន់ផង ។
ប្រភពពីមន្ត្រីក្នុងមន្ទីរសាធារណការនិងដឹកជញ្ជូនខេត្តព្រៃវែងបានឲ្យដឹងថា ការដែលក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តព្រែកព្នៅ តាមបណ្តោយផ្លូវជាតិលេខ៨ ចំណុចស្រុកពារាំងគាបយកលុយពីឈ្មួញនិងអាជីវករតាមអំពើចិត្តគឺមានការឃុបឃិតបើកដៃពីមន្ត្រីធំៗនៅខាងលើផងដែរ។ជាការពិត ឈ្មួញមួយចំនួនបានប្រើប្រាស់រថយន្ត វ៉េអងធំៗ រថយន្តសណ្ដោងកន្ទុយសណ្ដោងរ៉ឺម៉កផ្ទុកទំនិញលើសទម្ងន់ បើកបរឆ្លងកាត់មុខមន្ត្រីប្រចាំស្ថានីយ៍ជញ្ជីងថ្លឹងរថយន្តព្រែកព្នៅ ដោយគ្មានការព្រួយបារម្ភ ផ្ទុយទៅវិញមន្ត្រីទាំងនោះ គ្រាន់តែតម្រូវឲ្យម្ចាស់រថយន្ត ខ្នាចធំដឹកជញ្ជូនទំនិញលើសទម្ងន់ចូលបង់ លុយតាមការកំណត់ គឺជាការស្រេចដោយមិនខ្វល់ពីរឿងរថយន្តទាំងនោះ ធ្វើឲ្យខូចផ្លូវខូចស្ពានឡេីយ ។
ប្រភពពីប្រជាពលរដ្ឋរស់នៅភូមិព្រែកព្នៅ ឃុំព្រែកព្នៅ្រ ស្រុកពារាំង បានឲ្យដឹងថា ពេលរថយន្តធំៗ ដឹកទំនិញលើសទម្ងន់បើកបរឆ្លងកាត់មុខស្ថានីយ៍គឺតែងតែឃើញព្រូឡាន តៃ កុងឡានរត់យ៉ាងប្រសេចប្រសាចទៅបង់ លុយឲ្យប្រធានស្ថានីយ៍ជញ្ជីងថ្លឹងនឹងក្រុមមន្ត្រីប្រចាំស្ថានីយ៍ព្រែកព្នៅ អោយបង់លុយតាមការកំណត់ដោយមិនអាចតវ៉ាបាន។
ប្រសិនបើឈ្មួញឬអាជីវករណាម្នាក់ហ៊ានតវ៉ាប្រាកដជាត្រូវក្រុមមន្ត្រីប្រចាំស្ថានីយ៍ជញ្ជីងថ្លឹងរថយន្តលើផ្លូវជាតិលេខ ៨ ក្នុងភូមិព្រែកព្នៅ ឃុំព្រែកព្នៅ ស្រុកពារាំង ខេត្តព្រៃវែង រករឿងឲ្យរើទំនិញចុះឡើងតាមទំនេីងចិត្ត របស់ពួកគេជាមិនខាន់ឡើយ ។ ហេតុនេះហើយទើបរថយន្តធំៗដឹកជញ្ជូនទំនិញលើសទម្ងន់រាប់តោនហូរហៀរខុសលក្ខណៈបច្ចេកទេសនៅតែអាចបើកបរលើផ្លូវជាតិលេខ៨យ៉ាងគគ្រឹកគគ្រេង បណ្ដោលឲ្យខូចផ្លូវខូចស្ពាន ជាបន្តបន្ទាប់ ។
បញ្ហានេះដែលលោកស៊ុន ចាន់ ថុលរដ្ឋមន្ត្រីក្រសួងសាធារណ ការនិងដឹកជញ្ជូននិងលោកសេង ឈួន ប្រធានជញ្ជីងថ្លឹងរថយន្តទូទាំងប្រទេស មិនគួរមើលរំលងតទៅទៀតនោះទេព្រោះក្រុមជញ្ជីងថ្លឹងរថយន្តលើ ផ្លូវជាតិលេខ៨ ស្រុកពារាំង កំពុងប្រែក្លាយទៅ ជាជញ្ជីងថ្លឹងលុយហើយ៕
