ខេត្តមណ្ឌលគិរី៖ មន្ត្រីនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃម្នាក់ប្រចាំការនៅខេត្តមណ្ឌលគីរីបានប្រើអាវុធបាញ់បំបែក កង់គោយន្តច្នៃ ដឹកឈើខុសច្បាប់មួយគ្រឿងសង្ស័យចរចាថ្លៃមិនត្រូវគ្នា។
ប្រភពពីខេត្តមណ្ឌលគិរីបានរាយការណ៍ មកថា នៅវេលាម៉ោងប្រហែល២២: ១០ នាទីយប់ថ្ងៃទី២២ ខែ ឧសភា ឆ្នាំ២០២៣ កម្លាំងជំនាញនាយកដ្ឋានប្រឆាំងបទល្មើសសេដ្ឋកិច្ចក្រសួងមហាផ្ទៃប្រចាំការ ខេត្តមណ្ឌលគិរី ឈ្មោះ ទិន វាសនា បានឃាត់គោយន្តកែច្នៃចំនួន១ គ្រឿងដែលកំពុងតែដឹកជញ្ជូនឈើប្រភេទសុក្រំចំនួន៧ដុំ នៅចំណុចចម្ងាយ២គឺឡូម៉ែត្រពីកន្លែងកិនថ្ម ស្ថិតនៅក្នុងភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី។
ការចុះទៅចាប់នោះគឺលោក ទិន វាសនា ដែលជាមន្ត្រីនគរបាលប្រឆាំងបទល្មើសសេដ្ឋកិច្ចទើបនិងមកដល់ថ្មីធ្វើសកម្មភាព តែម្នាក់ឯងប៉ុណ្ណោះ។
ប្រភពបន្តថា បន្ទាប់ពីមន្ត្រីនគបាលសេដ្ឋកិច្ចនោះស្ទាក់ឃាត់គោយន្តច្នៃខាងលើរួចក៏បាន ចចារតម្លៃគ្នាជាមួយម្ចាស់គោយន្តឆ្នៃ ប៉ុន្តែការទាមទារនោះច្រើនពេក ម្ចាស់គោយន្តគ្មានលទ្ធភាពបង់ឲ្យ ក៏ស្រាប់តែលោក ទិន វាសនា ផ្ទុះកំហឹង ទាញអាវុធអាកា បាញ់បំបែកកង់គោយន្តតែម្តង។
ម្ចាស់គោយន្តដឹកឈើល្មើសច្បាប់ក៏គេចខ្លួនបាត់ស្រមោលភ្លាមៗដែរដោយទុក គោយន្តនិងឈើនៅនឹងកន្លែងកើតហេតុនោះតែម្តង។
ប្រភពបន្តទៀតថា ក្រោយពីឈ្មួញរត់បាត់ស្រមោលរហូតវេលាទៀបភ្លឺលោក ទិន វាសនា បានទំនាក់ទំនងស្នើសុំកម្លាំងបរិស្ថានប្រចាំ ការនៅស្នាក់ការរងអូររាំងនៃដែនជម្រកសត្វព្រៃកែវសីមាជួយអន្តរា គមន៍បន្ត។
កម្លាំងបរិស្ថានបានបន្ត សុំសហការជាមួយកម្លាំងអធិការដ្ឋាននគរបាលស្រុកអូររាំង និងកម្លាំងប៉ុស្តិ៍នគរបាលរដ្ឋបាលសែនមនោរម្យ ចុះដល់កន្លែងកើតហេតុខាងលើឃើញគោយន្តកែច្នៃនោះបែកកង់២គ្រាប់កង់មុខនិង កង់ក្រោយផ្នែកខាងស្តាំ។
វត្ថុតាងមានឈើប្រភេទសុក្រំ០៧ដុំមិនទាន់វាស់វែងក្រុម ការងារបានប្រទះឃើញសំបកគ្រាប់កាំភ្លើង AK ចំនួន ០១គ្រាប់ដែលស្ថិតនៅចម្ងាយប្រហែល៤០ ម៉ែត្រពីគោយន្តកែច្នៃ។
កម្លាំងបរិស្ថានប្រចាំការនៅស្នាក់ការរងអូររាំងបានឲ្យដឹងថា ឈ្មោះ ទិន វាសនា បានបាញ់បំបែកកង់ចំនួន ០៣គ្រាប់ដែលបណ្តាលគោយន្តកែច្នៃនោះបែកកង់តែម្តង។
ប្រភពបន្ថែមថា ដោយសារតែការចរចាទារ លុយពីម្ចាស់គោយន្តមិនត្រូវ ថ្លៃគ្នាទើបលោក ទិន វាសនា សម្រេចចិត្តបាញ់បំបែក កង់គោយន្តកែច្នៃនោះ ហើយហៅមន្ត្រីបរិស្ថានឲ្យមកយកគោយន្តនិងឈើរក្សារ ទុក្ខនៅស្នាក់ការអូរាំង។
ប្រភពថាលោក ទិន វាសនា ក្រោយធ្វើសកម្មភាពក៏បានត្រឡប់ទៅកន្លែងរបស់ខ្លួនវិញដោយមិនខ្វល់ខ្វាយថាមានរឿងអ្វីកើតឡើងនោះឡើយ។
ពាក់ព័ន្ធករណីនេះ គេហទំព័រ(www.enn-tv.com)មិនអាចសុំការពន្យល់បកស្រាយពីលោក ទិន វាសនា បាននៅឡើយទេ ព្រោះគ្មានលេខទូរស័ព្ទ៕បឋម