ព្រះសីហនុ៖ តាមប្រភពពីក្រុមឈ្មួញ និងអាជីវករដឹកជញ្ជូនទំនិញឆ្លងកាត់ផ្លូវជាតិ លេខ៤ ខេត្តព្រះសីហនុ ចូលមករាជធានីភ្នំពេញ បានឲ្យដឹងថា បើ ទោះបីពួកគេដឹកជញ្ជូនទំនិញផ្ទុកមិនលើសទម្ងន់ក៏ត្រូវបង់ លុយតាមការកំណត់ របស់ប្រធាន ក្រុមស្ថានីយ៍ជញ្ជីងថ្លឹងរថយន្តអូរចំណារ និងស្ថានីយ៍ជញ្ជីងថ្លឹងស្ទឹងច្រាលដដែលទេ។ គ្មានឈ្មួញនិងអាជីវករណាហ៊ានតវ៉ាបានឡើយ ព្រោះប្រធានក្រុមស្ថានីយ៍ជញ្ជីងថ្លឹងរថយន្តទាំង២កន្លែងនោះតែងយកឈ្មោះលោក បូរី វង្សសានិត្យ មកបិទបាំងទង្វើរបស់ខ្លួនរហូតមក។ ចំណែករថយន្តដឹកទំនិញធំៗ និងរថយន្តដឹកខ្សាច់ដឹកថ្ម ផ្ទុកលើសទម្ងន់អាចបើកបរឆ្លងកាត់មុខស្ថានីយ៍ជញ្ជីងថ្លឹងរថយន្តទាំង២កន្លែងនោះយ៉ាងរលូនអោយ តែព្រូឬតៃកុងរថយន្តចូលបង់លុយតាមការកំណត់ដោយមិនបាច់ចូលថ្លឹងក៍បានដែរ។
ការដែលប្រធានស្ថានីយ៍ជញ្ជីងថ្លឹងរថយន្ត អូរចំណារ ផ្លូវជាតិលេខ៤ ស្រុកព្រៃនប់ និងប្រធានស្ថានីយ៍ជញ្ជីងថ្លឹងរថយន្តស្ទឹងច្រាល ផ្លូវជាតិលេខ៤ ស្រុកកំពង់សិលា ហ៊ានប្រែក្លាយជញ្ជីងថ្លឹងរថយន្តអោយទៅជាជញ្ជីងថ្លឹងលុយយ៉ាងត្រជាក់ចិត្តគឺដោយ សារមានការបើកដៃពីលោក បូរី វង្សសានិត្យ ប្រធានមន្ទីរសាធារណការនិងដឹកជញ្ជូនខេត្តព្រះសី ហនុផងដែរ។
ប្រភពពីមន្រ្តីនៅក្នុងមន្ទីរសាធារណការ និង ដឹកជញ្ជូនខេត្តព្រះសីហនុ បានខ្សឹបខ្សៀវឲ្យដឹងថា បើគ្មានការបើកដៃពីសំណាក់លោក បូរី វង្សសានិត គឺប្រធានស្ថានីយ៍ជញ្ជីងថ្លឹងរថយន្តអូរចំណារ និងប្រធានស្ថានីយ៍ជញ្ជីងថ្លឹងរថយន្តស្ទឹងច្រាលមិនហ៊ានធ្វើអ្វីៗតាមអំពើចិត្តបានឡើយ។ ចំណែកឯលោក សេង ឈួន ប្រធានជញ្ជីងថ្លឹងរថយន្តទូទាំងប្រទេស មិនគួរបណ្ដោយឲ្យប្រធានស្ថានីយ៍ ជញ្ជីងថ្លឹងរថយន្តអូរចំណារ និងប្រធានស្ថានីយ៍ជញ្ជីងថ្លឹងរថយន្តស្ទឹងច្រាល ធ្វើអ្វីៗតាមអំពើចិត្តនោះទេ។
ប្រភពពីមន្រ្តីនៅក្នុងមន្ទីរសាធារណការ និង ដឹកជញ្ជូនខេត្តព្រះសីហនុ ដដែលបានអោយដឹងទៀតថា ចាប់តាំងពីទទួលបានតំណែងជាប្រធានមន្ទីរសាធារណការខេត្តព្រះសីហនុ រហូតមកដល់បច្ចុប្បន្ននេះគឺលោក បូរី វង្ស សានិត្យ តែងតែបណ្ដោយអោយប្រធានស្ថានីយ៍ថ្លឹងរថយន្តអូរចំណារ និងប្រធានស្ថានីយ៍ជញ្ជីងថ្លឹងរថយន្តស្ទឹងច្រាល ធ្វើអ្វីៗតាម អំពើចិត្តប្រព្រឹត្តរបៀបអំពើពុករលួយ។
ហេតុនេះលោក ស៊ុន ចាន់ថុល រដ្ឋមន្រ្តីក្រសួងសាធារណការ និងដឹកជញ្ជូន ព្រម ទាំងលោក សេង ឈួន ប្រធានជញ្ជីងថ្លឹងរថយន្តទូទាំងប្រទេសគួរតែពិនិត្យឡើងវិញខ្លះផង។ ដូច្នេះលោក ឱម យ៉ិនទៀង ប្រធានអង្គភាពប្រឆាំងអំពើពុករលួយគួរបើកការស៊ើបអង្កេតឲ្យបានស៊ីជម្រៅទៅលើអំពើពុករលួយរបស់ប្រធានស្ថានីយ៍ជញ្ជីងថ្លឹងរថយន្ត អូរចំណារនិងស្ថានីយ៍ជញ្ជីងថ្លឹងរថយន្តស្ទឹងច្រាលដែលប្រែក្លាយទៅស្ថានីយ៍ជញ្ជីងថ្លឹង លុយតាមអំពើចិត្តនោះផង៕មានត
