ភ្នំពេញ ៖ ទីតាំងកែច្នៃឈើប្រណីត មួយកន្លែងឋិតនៅជាប់របងវត្ដសំរោងអណ្ដែត ក្នុងភូមិច្រែស សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ត្រូវបាន កម្លាំងសង្កាត់រដ្ឋបាលព្រៃឈើរាជធានីភ្នំពេញ ដែលដឹកនាំដោយព្រះរាជអាជ្ញា រងអមសាលាដំបូងរាជធានីភ្នំពេញ លោក គឺ ប៊ុណ្ណារ៉ា បានចុះទៅបង្ក្រាបបន្ទាប់ពីទីតាំងកែច្នៃមួយកន្លែងនេះមិនមានច្បាប់ អនុញ្ញាតធ្វើអាជីវកម្មត្រឹមត្រូវ ។
ប្រតិបត្ដិការបង្ក្រាបទីតាំងកែច្នៃឈើ មួយកន្លែងនេះបានប្រព្រឹត្ដនៅវេលាម៉ោង៣រសៀល ថ្ងៃទី២៨ ខែកក្កដា ឆ្នាំ២០១៤ នៅចំណុចកើតហេតុខាងលើ ដោយក្នុង នោះសមត្ថកិច្ចបានរឹបអូសយកឈើកែច្នៃ បានជាង១០ម៉ែត្រគូប និងម៉ាស៊ីកែច្នែ ឈើ៥គ្រឿងយកទៅរក្សាទុកនៅទីតាំង សង្កាត់រដ្ឋបាលព្រៃឈើរាជធានី ។
លោក ហ៊ុន វណ្ណារិទ្ធ នាយសង្កាត់រដ្ឋបាលព្រៃឈើភ្នំពេញ បានមានប្រសាសន៍ថា ទីតាំងកែច្នៃឈើមួយកន្លែងនេះ កន្លងមកសមត្ថកិច្ចធ្លាប់បង្ក្រាបម្ដងហើយ បន្ទាប់ពីដឹងថា បានធ្វើអាជីវកម្មខុសច្បាប់ ដោយមិនព្រមទៅសុំច្បាប់ពីអាជ្ញាធរមាន សមត្ថកិច្ចនោះឡើយ
លោក អ៊ុន វណ្ណារិទ្ធ បានឱ្យដឹងទៀតថា ម្ចាស់ទីតាំងកែច្នៃឈើមួយកន្លែងនេះ ជាកម្មសិទ្ធិរបស់លោកឧត្ដមសេនីយ៍ទោ ហាញ់ ចំរ៉ុង ជាមន្ដ្រីនគរបាលក្រសួងមហា ផ្ទៃ ហើយនៅពេលចុះទៅបង្ក្រាបម្ចាស់ទីតាំង ក៏ដូចជាកម្មករ មិនត្រូវបានឃាត់ខ្លួននោះទេ ព្រោះមុនពេលសមត្ថកិច្ចទៅ ដល់ ពួកគេបានគេចខ្លួនបាត់ ។
ទោះ យ៉ាងណា លោក អ៊ុន វណ្ណារិទ្ធ បានអះអាងឱ្យដឹងថា ទីតាំងកែច្នៃឈើ ដែលមានលោកឧត្ដមសេនីយ៍ទោ ហាញ់ ចំរ៉ុង ជាម្ចាស់ទីតាំងមួយនេះ កន្លងមក ហាក់ដូចជាគឃ្លើននឹងសមត្ថកិច្ច និង អាជ្ញាធរដែនដី ក្នុងការធ្វើអាជីវកម្មកែច្នៃ ឈើរំខានដល់អ្នករស់នៅជិតខាង ក៏ដូចជា មិនគោរពច្បាប់ទម្លាប់ ព្រោះអាងខ្លួនឯង មានបុណ្យស័ក្ដិថ្នាក់ឧត្ដមសេនីយ៍ ។ ប៉ុន្ដែភាពគឃ្លើននេះត្រូវបានសមត្ថកិច្ចសង្កាត់ រដ្ឋបាលព្រៃឈើរាជធានីភ្នំពេញស្នើសុំចុះ ទៅបង្ក្រាប ទើបឈានទៅដល់រឹបអូសបានឈើកែច្នៃប្រភេទធ្នង់ និងនាងនួនជាង១០ ម៉ែត្រគូបយ៉ាងដូច្នេះ ៕
