ភ្នំពេញ ៖ សហព័ន្ធសហជីព កម្មករចំនួន ១៨ស្ថាប័ន បានប្រកាស តវ៉ាជាថ្មី ដោយដឹកនាំកម្មកររោងចក្រ កាត់ដេរ ធ្វើកូដកម្ម មិនធ្វើការចាប់ពី ថ្ងៃទី១៧ ខែមេសាដល់ថ្ងៃទី២២ខែមេសា។ជាការតវ៉ាដើម្បីទាមទារឱ្យតុលាការដោះ លែងបាតុករ ២១នាក់ ដែល កំពុងជាប់ឃុំនៅពន្ធនាគារ ត្រពាំងផ្លុង និងស្នើឱ្យមានការចរចា ដំឡើងប្រាក់ ឈ្នួល គោល ១៦០ ដុល្លារក្នុងមួយខែ ដល់កម្មកររោងចក្រ កាត់ដេរ ។
លោកស្រី ម៉ម ញឹម ប្រធាន សហព័ន្ធសហជីពជាតិ នៃឧស្សាហកម្ម វាយនភណ្ឌកាត់ដេរកម្ពុជា ស្ថិតក្នុង ចំណោម សហព័ន្ធសហជីពកម្មករទាំង ១៨ បានឱ្យដឹងថា មកដល់ពេលនេះ សហជីពសមាគមបានចែកខិត្ដប័ណ្ណដល់កម្មករ រោងចក្រកាត់ដេររួចរាល់ ហើយ ដើម្បីជូនដំណឹងដល់កម្មករ រោងចក្រកាត់ដេរឱ្យចូលរួមកូដកម្មតវ៉ា ។ នោះគឺជូន ដំណឹងដល់កម្មករ រោងចក្រឱ្យបន្ដឈប់សម្រាកចាប់ពីថ្ងៃ ទី១៧ ខែមេសាដល់ថ្ងៃទី២២ ខែមេសា។ ពោលគឺកម្មករ រោងចក្រកាត់ដេរនឹង បន្ដឈប់សម្រាកពីបុណ្យចូលឆ្នាំខ្មែរ នៅថ្ងៃទី១៤ ថ្ងៃទី១៥ និងថ្ងៃទី១៦ ខែ មេសាតទៅ ។
លោកស្រី ម៉ម ញឹម បន្ដថា យុទ្ធនាការឈប់សម្រាកមិនចូលធ្វើការ រយៈពេល៧ថ្ងៃខាងមុខ គឺក្រុមសហ ជីពកម្មករ និងសមាគមទាំង១៨ស្ថាប័ន តវ៉ាស្នើឱ្យតុលាការដោះលែងជនជាប់ ចោទទាំង២១នាក់ ស្នើរដ្ឋាភិបាល និង សមា គម រោងចក្រកាត់ដេរចរចាដំឡើង ប្រាក់ឈ្នួលកម្មករឱ្យបាន១៦០ដុល្លារ ព្រមទាំងដកបម្រាមនៃការជួបជុំ និង ស្នើ និយោជកដកបណ្ដឹងប្រឆាំងថ្នាក់ ដឹកនាំសហជីពជាដើម ។
ប៉ុន្ដែលោក វ៉ាន់ ស៊ូអៀង ប្រធាន សមាគមរោងចក្រកាត់ដេរនៅកម្ពុជា បានចាត់ទុកថា សេចក្ដីប្រកាសតវ៉ាជាថ្មី របស់សមាគមសហជីពកម្មករខាងលើ នេះ គឺជាមតិភាគតិចដែលមិនតំណាងឱ្យសហជីពនិងកម្មកររោង ចក្រកាត់ ដេរ ដែលព្រមទទួលយកនូវការដំឡើងប្រាក់ ខែកម្មកររោងចក្រនៅឆ្នាំ២០១៤ ចំនួន យ៉ាងតិច១០០ដុល្លារនោះទេ ។
លោក ស៊ូអៀង បានបញ្ជាក់ថា មិនមានការចរចាឡើងវិញលើការ ដំឡើងប្រាក់ខែកម្មកររោងចក្រកាត់ដេរ នៅឆ្នាំ ២០១៤នេះទេ ។ ការប្រកាសធ្វើ កូដកម្មតវ៉ាជាថ្មីនោះ នឹងមិនមានកម្មករ ចូលរួមច្រើនឡើយ ដូចករណីកូដកម្ម តវ៉ា ពីរបីលើកន្លងមក គឺកម្មករភាគច្រើន គេចង់ធ្វើការ ។
យ៉ាងណាក៏ដោយ សហព័ន្ធ សហជីពកម្មករបានផ្ញើលិខិតជូនដំណឹង នៃយុទ្ធនាការតវ៉ាមិនចូលធ្វើការជាថ្មី ចាប់ពី ថ្ងៃទី ១៧ ខែមេសា ដល់ថ្ងៃទី២២ ខែមេសា ជូនលោក វ៉ាន់ ស៊ូអៀង ប្រធានសមាគមរោងចក្រកាត់ដេរ នៅកម្ពុជា ហៅកាត់ថា អៅំជ កាលពីថ្ងៃទី៣ ខែមេសា ។
សូមរំលឹកថា ក្រុមសហជីពកម្មករ កាលពីចុងឆ្នាំ២០១៣ និងដើមឆ្នាំ ២០១៤ បាននាំគ្នា ធ្វើកូដកម្ម និងបាតុកម្ម តវ៉ា ទាមទារដំឡើងប្រាក់ខែឱ្យបាន១៦០ ដុល្លារ ក្នុងមួយខែ ប៉ុន្ដែកាលណោះ បានទទួលរងការបង្ក្រាបដោយហិង្សា ពី កងកម្លាំងរដ្ឋាភិបាល ។
យ៉ាងណាក៏ដោយ រដ្ឋាភិបាល និងសមាគមរោងចក្រកាត់ដេរបាន សម្រេចដំឡើងប្រាក់ខែ១០០ដុល្លារដល់ កម្មករ រោងចក្រកាត់ដេរសម្រាប់ឆ្នាំ ២០១៤ នេះ ។
បាតុកម្មតវ៉ារបស់ក្រុមកម្មករកន្លង មកបានធ្វើឱ្យរោងចក្រកាត់ដេរនៅកម្ពុជា បានប្រកាសថាខ្លួនខាតបង់ទឹកប្រាក់ ប្រមាណ៧៥លានដុល្លារហើយចំពោះការ លក់ចេញវិញគឺបានខាតបង់ប្រមាណ ២០០លានដុល្លារ ។ ចំណែក បាតុករ ២៣នាក់ ត្រូវបានចាប់ឃុំខ្លួន ៕
