ភ្នំពេញ: សេចក្តីប្រកាសព័ត៌មាន ចុះថ្ងៃទី១៨ ខែធ្នូ ឆ្នាំ២០១៣ ស្តីពី លទ្ធផលនៃកិច្ចប្រជុំបញ្ញត្តិកម្ម ដើម្បីជំរុញការអនុវត្តដំណាក់កាលទី២ តាមខ្លឹមសារនៃលិខិតលេខ ១៨៨៨ សជណ ចុះថ្ងៃទី២១ ខែវិច្ឆិកា ឆ្នាំ២០១៣ របស់ទីស្តីការគណៈរដ្ឋមន្ត្រី បង្ហាញថា គោលបំណងចម្បង នៃសេចក្តីសម្រេចរបស់រាជរដ្ឋាភិបាលនេះ គឺដើម្បីការពារផលប្រយោជន៍របស់វិនិយោគិន អ្នកប្រើប្រាស់ និងចំណូលរបស់រដ្ឋ តាមរយៈការធានាបាននូវការប្រកួតប្រជែងដោយស្មោះត្រង់ ការទទួលបានតម្លៃសមរម្យនិងសេវា ប្រកបដោយគុណភាពល្អប្រសើរចំពោះអ្នកប្រើប្រាស់។
ក្រសួងប្រៃសណីយ៍ និងទូរគមនាគមន៍ បានចេញសេចក្តីប្រកាសព័ត៌មានមួយ ដើម្បីគូសបញ្ជាក់ដល់សាធារណៈជន អំពីការអនុវត្តសេចក្តីសម្រេចកំណត់តម្លៃសេវាទូរស័ព្ទ នៅគ្រប់ប្រព័ន្ធ។ ក្នុងនោះ ក្រសួងក៏បានគូសបញ្ជាក់ថា ក្រុមហ៊ុនទូរស័ព្ទ ទាំងអស់ ក៏នឹងសិក្សា ដើម្បីកំណត់តម្លៃសេវាហៅទូរស័ព្ទ ឲ្យចុះទាបជាងសព្វថ្ងៃ។
សេចក្តីប្រកាស ក៏បានលើកឡើងថា ក្រសួងប្រៃសណីយ៍ និងទូរគមនាគមន៍ និងបញ្ញត្តិករទូរគមនាគមន៍ សូមសម្តែងការពេញចិត្ត ចំពោះលទ្ធផលនៃកិច្ចប្រជុំ កាលពីថ្ងៃទី១៣ ខែធ្នូ ឆ្នាំ២០១៣ ដែលអាចចាត់ទុកថា ជាជំហានវិវត្តទៅមុខថែមទៀត ក្នុងការឈានទៅរកដំណោះស្រាយសមស្របមួយ ដែលធានាទាំងការប្រកួតប្រជែងដោយសេរី និងយុត្តិធម៌ និងតម្លៃសេវាសមរម្យផង ដើម្បីឆ្លើយតបតម្រូវការ និងបំណងចង់បានរបស់អ្នកប្រើប្រាស់។
ក្រសួងប្រៃសណីយ៍ នក៏បានលើកឡើងថា ការបន្ទាបតម្លៃដែលក្រុមហ៊ុនខ្លះ ទំលាក់មកស្ទើរសូន្យនោះ គឺជាការបង្ខូចតម្លៃ ហើយសង្គ្រាមតម្លៃនេះ នាំឲ្យប៉ះពាល់ដល់គុណភាពសេវា។ ក្នុងនោះ ការបន្ទាបតម្លៃហួសហេតុនេះ ក៏បើកឱកាសឲ្យឧក្រិដ្ឋកម្ម និងបទល្មើសនានាក្នុងវិស័យទូរគមនាគមន៍កើនឡើងព្រមទាំងនាំដល់ ការខាតបង់ចំណូល របស់ក្រុមហ៊ុន ដែលបានទទួលអាជ្ញាបណ្ណប្រតិបត្តិការ និងចំណូលរបស់រដ្ឋ។
ក្នុងសេចក្តីប្រកាសដដែល បានរម្លឹកថា រយៈពេល ៤ ឆ្នាំ កន្លងទៅនេះ រាជរដ្ឋាភិបាល បានចូលធ្វើអន្តរាគមន៍ ការកំណត់តម្លៃ អប្បបរមា នៃសេវាទូរស័ព្ទ បន្ទាប់ពីបានពិនិឃើញមានការប្រព្រឹត្តល្មើសនឹងគោលការណ៍ប្រកួតប្រជែង ដោយសេរី និងយុត្តិ ធម៌ របស់ប្រតិបត្តិករទូរគមនាគមន៍មួយចំនួន ធ្វើឲ្យយន្តការទីផ្សារនេះ ជួបនឹងហានិភ័យខ្ពស់ឡើងៗ ការដួលរលំក្រុមហ៊ុនមួយចំនួនជាបន្តបន្ទាប់ និងការកកើតប្រព័ន្ធទូរស័ព្ទអន្តរជាតិខុសច្បាប់កាន់តែច្រើនឡើង ( SIMBOX )។
ក្រសួងប្រៃសណីយ៍ ក៏បានប្រកាសថា ប្រតិបត្តិករ ( ក្រុមហ៊ុនទូរស័ព្ទ ) ត្រូវយកចិត្តទុកដាក់យ៉ាងខ្លាំងលើបញ្ហាគុណភាពសេវា ចៀសវាងការប្រកួតប្រជែងគ្នា តាមសង្គ្រាមតម្លៃ។ ក្នុងនោះ បណ្តាប្រតិបត្តិករទាំងអស់ នឹងចាប់ផ្តើមយ៉ាងឆាប់បំផុត ក្នុងការដាក់ចេញនូវគម្រោងការងារ ( Framework ) កាលបរិច្ឆេទ និងរកឲ្យបានការឯកភាពគ្នារវាងបញ្ញត្តិករទូរគមនាគមន៍កម្ពុជា និងបណ្តាប្រតិបត្តិករទូរស័ព្ទ ដើម្បីធ្វើការសិក្សា ព្រមទាំងកំណត់រូបមន្តសម្រាប់គណនារកថ្លៃដើម ( Cost Base Modeling ) មុននឹងដាក់ជូនអន្តរក្រសួង ពិនិត្យសម្រេច និងឈានទៅធ្វើកំណែសម្រួលបទប្បញ្ញត្តិ ស្តីពី ការកំណត់ថ្លៃសេវាទូរស័ព្ទនេះ។
ក្នុងសេចក្តីប្រកាសនោះ ក៏បានបង្ហាញថា ប្រតិបត្តិករទូរស័ព្ទទាំងអស់ នឹងមានគម្រោងរៀបចំបង្កើតនូវសមាគមទូរគមនាគមន៍មួយ ( Telecom Association ) ដើម្បីជាប្រយោជន៍ក្នុងការជជែកគ្នា ដោះស្រាយវិវាទរវាងគ្នា និងធ្វើឲ្យមានតម្លាភាពរវាងគ្នា ព្រមទាំងប្រកាន់យកការបញ្ចេញនូវសំឡេងតែមួយ សម្រាប់ធ្វើការជជែកពិភាក្សា ជាមួយបញ្ញត្តិករទូរគមនាគមន៍កម្ពុជា និងរាជរដ្ឋាភិបាល ៕
