លោក កែត ស៊ីវិនី ប្រធានថ្មីផ្សារដើមគ ត្រូវគេបានរិះគន់ធ្ងន់ៗ និងបានបើកកកាយពីអំពើពុករលួយកឹប កេងលុយ ទាំងក្នុង និងក្រៅប្រព័ន្ធចំណូលថវិការដ្ឋដោយលក់ផ្លូវជុំវិញផ្សារមុខផ្ទះប្រជាពលរដ្ឋអស់ទាំងស្រុង យកលុយចែកគ្នា និងបានចាត់តាំង មនុស្សជំនិតឱ្យដើរជម្រិតប្រមូលលុយពីអាជីវករគ្មានបញ្ជីស្នាមវិក្កយបត្រ ហើយពេលខ្លះ បានប្រើពាក្យសំដីជេរ ប្រមាថអ្នក លក់ ដូរយ៉ាងឃោរឃៅទៀតផង ។ ដោយសារអំពើឃោរឃៅនោះ ហើយទើបបានបង្កឱ្យមានការកាប់សន្តិសុខម្នាក់ បណ្តាល ឱ្យ រងរបួសជាទម្ងន់កាលពីពេលថ្មីៗនេះ ។
ប្រមុខរាជរដ្ឋាភិបាលបានដឹងពីការកេងប្រវ័ញ្ចថវិការដ្ឋការប្រើអំណាចបង្ខំទារលុយពីអាជីវករដោយគ្មាន វិក្កយបត្រក្នុងមួយខែៗរាប់សិបលានរៀល ។
ប្រភពព័ត៌មានឱ្យដឹងថា ប្រធានផ្សារឈ្មោះ កែត ស៊ីវិនី គាត់ជាមនុស្សចូលចិត្តប្រើអំណាចផ្តាច់ការបង្កើត ក្រុមរបស់គាត់ដែល មានអ្នកខ្លះធ្វើជាប៉ូលិស ហើយបន្ថែមការងារសន្តិសុខទៀត ។ លោកប្រធានផ្សារនូវបានបង្កើត ឱ្យមានអ្នកលក់ សាច់ជ្រូក សាច់គោ សាច់មាន់ សាច់ត្រី ពាសពេញផ្លូវលេខ ៣៣៦ រកតែដើរក៏ពុំរួចផងដែរ សព្វថ្ងៃនេះផ្លូវ ៣៣៦ ក្លាយទៅជាទីផ្សារ មួយ ទៀតចំណុះឱ្យផ្សារដើមគ គឺចាប់តាំងពី ៨ព្រឹក រហូតដល់ ៨យប់ ប្រជាជនដែលមានផ្ទះនៅតាមផ្លូវលេខ ៣៣៦ នេះ បាន រអ៊ូរទាំរិះគន់យ៉ាងខ្លាំងដោយសារពួកគាត់មិនអាចធ្វើដំណើរ ចេញចូលផ្ទះបានឡើយ ។
កន្លងមក ពលរដ្ឋបានធ្វើការតវ៉ាយ៉ាងខ្លាំងក្លាដែរ ប៉ុន្តែទាំងប្រធានផ្សារទាំងសាលាក្រុង គេមិនអើពើឡើយ ហើយថែម ទាំង ដើរយកលុយពីអ្នកលក់ក្នុងមួយកន្លែងចាប់ពី ២.០០០រៀល ដល់ ៥.០០០រៀល ក្នុងមួយថ្ងៃមិនតែប៉ុណ្ណោះ គេប្រើសំដី មកលើ ក្រុមអាជីវករ យ៉ាងសាហាវទៀតផង ។
ការគ្រប់គ្រងផ្សារជំនាន់ថ្មីនេះលុយពុករលួយដែលប្រធានផ្សារដើមគ លោក កែត ស៊ីវិនី បានស៊ុមគ្រលុំជាមួយមន្ត្រីថាក់ក្រោម និងមនុស្សជំនិតប្រមូលបានជិត ៤០លានរៀល ក្នុងមួយខែៗ ។ មន្ត្រីថ្នាក់ក្រោម និងមនុស្សជំនិតដែលត្រូវតែបង់លុយ ប្រចាំ ខែឱ្យលោកប្រធានដ៏មហិមារូបនេះរួមមាន ៖ ១-លោក សំ ភក្តី, ២-លោក គឹម អាន, ៣-លោក ផេង លឹម, ៤-លោក ជុយ លឹមអេង, ៥-លោក ឡេង លុយ, ៦-លោក វ័ន្ត, ៧-លោក សយ ធា, ៨-លោក ញឹក សាវី, ៩-លោក សុខ លី ។
ប្រភពដែលបន្ថែមទៀតថា ជំនាន់លោក ជុំ សារឿន ធ្វើជាប្រធានផ្សារគាត់បានពុះច្រៀកចិញ្ចើមផ្លូវលេខ ២៣៥ និងផ្លូវ ក្រោយ រោងកុនចេនឡា បានប្រហែលជាង ៥០កន្លែងលក់ ក្នុងមួយម៉ែត្របួនជ្រុងតម្លៃ ៣.០០០ដុល្លារ ហើយត្រូវបង់សេវាលក់ដូរ ប្រចាំថ្ងៃពី ២.០០០ទៅ ៥.០០០រៀល និងបង់ប្រចាំខែជិត ៤០ដុល្លារបន្ថែមទៀត ។
ប្រភពបន្តថា មិនដឹងថា ទឹកប្រាក់ដែលគេប្រមូលបានយ៉ាងច្រើនសន្ធឹកសន្ធាប់បែបនេះជាបទបញ្ជារបស់ សាលាក្រុង ឬគេឃុប ឃិតគ្នាជាខ្សែចង្វាក់ប្រព្រឹត្តអំពើពុករលួយនោះទេ ។ ប្រភពដដែលបានបញ្ជាក់ថា ផ្លូវតូចមួយខ្សែនៅក្រោយរោងកុនចេនឡា និងផ្លូវខាងកើតផ្សារដើមគ ត្រូវគេលក់តាំងពីយូរណាស់មកហើយ គឺតាំងពីរជ្ជកាលលោក ជុំ សារឿន ជាប្រធានផ្សារ និងលោក កែប ជុតិមា ជាចៅហ្វាយក្រុងម៉្លេះ ។
បច្ចុប្បន្ននេះ លោក កែត ស៊ីវិនី បានលាក់បាំង និងអនុវត្តតាមគន្លងចាស់របស់លោកទាំងពីរនាក់ ខាងលើយ៉ាងហ្មត់ចត់ ដោយ បន្តជម្រិតយកលុយពីអាជីវករប្រចាំថ្ងៃប្រចាំខែ មិនលើកលែងនរណាម្នាក់ឡើយ ។ បើចង់ដឹងច្បាស់សូមស៊ើបសួរជាមួយ ប្រជាពលរដ្ឋដោយ ស្ងាត់ៗផ្ទាល់មាត់តែម្តងទៅនឹងដឹងច្បាស់ហើយ ។
ប្រភពបន្តថា ផ្លូវលេខ ៣៣៦ ត្រូវលោកប្រធាន កែត ស៊ីវិនី បានបើកដៃឱ្យគេលក់ទាំងថ្ងៃទាំងយប់ គឺពេលថ្ងៃលក់សាច់ជ្រូក មួយកញ្ច្រែងត្រូវបង់ជូនកូនចៅលោក បេ វណ្ណា ៥.០០០រៀល ក្នុងមួយថ្ងៃ ត្រីមួយឡាំង ៥.០០០ ទៅ ១០.០០០រៀល ក្នុង មួយថ្ងៃ ។ ពេលថ្ងៃត្រួតត្រាដោយលោក បេ វណ្ណា ពេលយប់លោក សំ ភក្តី ដែលទាំងពីរនាក់ស៊ីស្មើគ្នាឯអាជីវករចាំតែស្លាប់ ៕
