នៅក្នុងវីដេអូខ្លីមួយដែលលោកសម រង្ស៊ី បានបង្ហោះនៅក្នុងគេហទំព័រ Facebook ក្រោយពីកិច្ចប្រជុំ មេដឹកនាំបក្សប្រឆាំងបានអំពាវនាវឲ្យពលរដ្ឋមកចូលរួមធ្វើបាតុកម្ម ជាមួយគណបក្សសង្គ្រោះជាតិដើម្បីសម្រេចការទាមទាររបស់ខ្លួន។
ការសម្រេចនេះបានធ្វើឡើងបន្ទាប់ពីគណៈកម្មាធិការអចិន្ត្រៃយ៍គណបក្ស សង្គ្រោះជាតិបានបើកកិច្ចប្រជុំមួយ កាលពីល្ងាច ថ្ងៃសុក្រទី ១៣ ធ្នូ។ ចាប់ផ្តើមពីថ្ងៃអាទិត្យ ទី១៥ ធ្នូ ចុងសប្តាហ៍នេះ ទៅ គណបក្សសង្គ្រោះជាតិនឹងធ្វើបាតុកម្មជារៀងរាល់ថ្ងៃជាប់រហូតដោយ ឥតឈប់ឈរដើម្បីទាមទារឲ្យមានការរៀបចំបោះឆ្នោតឡើងវិញ។ នេះបើយោងតាមការប្រកាសឲ្យដឹងរបស់លោក សម រង្ស៊ី ប្រធានគណបក្សសង្គ្រោះជាតិតាមបណ្តាញសង្គមហ្វេសប៊ុកកាលពីល្ងាច ថ្ងៃសុក្រ។
ប៉ុន្តែ លោក ស ខេង ឧបនាយករដ្ឋមន្ត្រីនិងជារដ្ឋមន្ត្រីក្រសួងមហាផ្ទៃបានបញ្ជាក់ប្រាប់ ក្រុមអ្នកកាសែតកាលពីពុធថា ការបោះឆ្នោតឡើងវិញមិនអាចប្រព្រឹត្តទៅបានឡើយពីព្រោះការទាមទារនេះ គ្មានមូលដ្ឋានគ្រប់គ្រាន់។ ក្រសួងមហាផ្ទៃបានអនុញ្ញាតឲ្យគណបក្សសង្គ្រោះជាតិធ្វើបាតុកម្មនៅ ថ្ងៃអាទិត្យនៅលើទីលានប្រជាធិបតេយ្យ ប៉ុន្តែ មិនអនុញ្ញាតឲ្យដើរហែក្បួនតាមដងផ្លូវទេ។ យ៉ាងណាក៏ដោយ គណបក្សប្រឆាំងទំនងជាមិនគោរពតាមការណែនាំនេះឡើយ។
កាលពីមុននេះ គណបក្សសង្គ្រោះជាតិបានប្រកាសថានឹងធ្វើបាតុកម្មជារៀងរាល់ថ្ងៃអាទិត្យ តែប៉ុណ្ណោះចាប់ពីថ្ងៃអាទិត្យទី ១៥ ធ្នូនេះតទៅ។ ប៉ុន្តែ ឥឡូវនេះ គណបក្សប្រឆាំងបានផ្លាស់ប្តូរផែនការរបស់ខ្លួនមកធ្វើបាតុកម្មជា រៀងរាល់ថ្ងៃវិញ។ លោក សម រង្ស៊ីអះអាងថា នឹងទាមទារឲ្យទាល់តែបានជាដាច់ខាតនូវការបោះឆ្នោតឡើងវិញ ក្នុងពេលឆាប់ៗខាងមុខនេះ។ គោលដៅនេះត្រូវបានមេដឹកនាំបក្សប្រឆាំងសង្ឃឹមថាអាចសម្រេចបានជោគជ័យ តាមរយៈការប្តេជ្ញាចិត្តរបស់អ្នកចូលរួមបាតុកម្មម្នាក់។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានអះអាងនៅថ្ងៃសៅរ៍នេះថានៅ មិនទាន់បានទទួលសេចក្តីជូនដំណឹងណាមួយពីគណបក្សសង្គ្រោះជាតិនៅឡើយទេ។ លោកបានអំពាវនាវឲ្យបក្សប្រឆាំងគោរពតាមបែបបទនីតិវិធីក្នុងការ ធ្វើបាតុកម្ម ហើយបានអំពាវនាវឲ្យប្រជាជនក្នុងរាជធានីប្រុងប្រយ័ត្នចំពោះសវត្ថិ ភាពក្នុងករណីដែលមានបាតុកម្មខុសច្បាប់កើតឡើង៕
