ខេត្តបាត់ដំបង ៖ សម្តេចនាយករដ្ឋមន្ត្រី ហ៊ុន សែន តែងប្រកាសជាសាធារណៈថា ករណីបទល្មើសនេសាទក្នុងតំបន់អភិរក្ស មិនត្រូវឱ្យមានជាដាច់ខាត ។ បើមានជនល្មើសប្រព្រឹត្តផ្ទុយពីបទបញ្ជាត្រូវចាប់យកមកផ្តន្ទាទោសទៅតាមច្បាប់ ទោះបីប្រមុខរាជរដ្ឋាភិបាលបានប្រកាសដកហូតឡូត៍នេសាទនៅជុំវិញបឹងទន្លេសាប សម្តេចអនុញ្ញាតឱ្យប្រជា នេសាទប្រកបមុខរបរនេសាទប្រើឧបករណ៍ស្របច្បាប់មិនអនុញ្ញាតឱ្យប្រជានេសាទប្រើឧបករណ៍ខុសច្បាប់នោះទេ ។
ទោះជាយ៉ាងនេះក្តីមានជនខិលខូចមួយចំនួននៅតែប្រើប្រាស់ឧបករណ៍ចាប់ត្រីខុសច្បាប់ដដែល ។ តួយ៉ាង ដូចលោក តែ ប៊ុនយីម ប្រព្រឹត្តល្មើសច្បាប់បានដាក់បណរ៉ាវ នៅចំណុចព្រែកបាក់ស្នរ ជាតំបន់អភិរក្ស ស្ថិតនៅក្នុង ភូមិដូនទ្រី ឃុំជ្រៃ ស្រុកមោងប្ញស្សី ខេត្តបាត់ដំបង ។ តែ ប៊ុនយីម ល្មើសបទបញ្ជាសម្តេចតេជោ ហ៊ានដាក់បណរ៉ាវ នៅពីក្រោយខ្នង ។ បានចាយវាយលុយកាក់ឱ្យមន្ត្រីជំនាញៗពាក់ព័ន្ធនៅក្នុងតំបន់នេះ ។
ប្រភពប្រជាពលរដ្ឋបានឱ្យ ដឹងថា តែ ប៊ុនយីម ជាមនុស្សពូកែអែបអបមន្ត្រីគ្រប់លំដាប់ថ្នាក់តាំងពីថ្នាក់ក្រោមរហូតដល់ថ្នាក់លើ ។ ហេតុដូច្នោះហើយមន្ត្រីពាក់ព័ន្ធ ទាំងនេះបណ្តែតបណ្តោយ និងឃុបឃិតបណ្តោយឱ្យ តែ ប៊ុនយីម ចូលទៅដាក់បណរ៉ាវ ក្នុងតំបន់អភិរក្សតាមតែ អំពើចិត្តនោះឡើយ ។
សេចក្តីរាយការណ៍បានបន្តថា ក្នុងឃុំជ្រៃមានសហគមន៍ភូមិដឹកនាំដោយលោក សែន បូរ តែមិនដឹងជាយ៉ាងណា បានជាប្រធានសហគមន៍នេះ មិនខ្វល់ពីជនល្មើសច្បាប់ដាក់បណរ៉ាវក្នុងដែនអភិរក្ស ដូច្នេះ ឬមួយក៏បានទទួលសំណូកពីអ្នកប្រប្រឹត្តបទល្មើសទាំងអស់នោះ ។
ចំណែកសង្កាត់រដ្ឋបាលជលផលក៏មានទីស្នាក់ការនៅទីនោះ គឺលោក តោ ថាវី ជានាយសង្កាត់។ ការមើលថែ រក្សាតំបន់អភិរក្សនោះ ហាក់បូដូចជាលោក តោ ថាវី ទទួលលាភសក្ការ”ៈពីបទល្មើស ទាំងនេះ បានជាលោកមិនបង្ក្រាប ។
ប្រជាពលរដ្ឋសំណូមពរ ឯកឧត្តម ឧបនាយករដ្ឋមន្ត្រី យឹម ឆៃលី គួរចុះទៅមើលនៅកន្លែងនេះតែម្តងទៅ ហើយចង្អុលបង្ហាញឱ្យលោកអភិបាលខេត្តបាត់ដំបង ចុះត្រួតពិនិត្យសកម្មភាពបទល្មើសនេសាទ កំពុងតែបំផ្លាញនៅ ក្នុងស្រុកមោងប្ញស្សី ខេត្តបាត់ដំបង ។ នៅពេលថ្ងៃខាងមុខ ពូជមច្ឆជាតិ និងត្រូវបាត់បង់អស់ជាមិនខានឡើយ ៕