ខេត្តរតនគិរីៈ គណកម្មការចំរុះ របស់ខេត្តបាន ចុះពិនិត្យ សកម្មភាពកាប់បំផ្លាញ ព្រៃស្រោង នៅដែនអភិរក្ស រមណីដ្ឋានប្រវត្តិសាស្ត្រ ធម្មជាតិ អូរស៊ិនលែរ៍ ចំនូន ១០ ហិកតា ស្ថិតនៅភូមិ កាឡែង ឃុំកាឡែង ស្រុកលំផាត់ បន្ទាប់ពីត្រូវបាន សារព័ត៌មានចេញផ្សាយ ជាបន្តបន្ទាប់ អំពីការកាប់បំផ្លាញព្រៃឈើ នៅដែនរមណីដ្ឋាននោះរួចមក ។
ប្រភពពត៌មាន ពីសាលាខេត្តរតនគិរី បានអោយដឹងថា កាលពីព្រឹក ថ្ងៃទី៣១ ខែតុលា ឆ្នាំ២០១៣ ឯកឧត្តម ប៉ាវ ហមផាន អភិបាលខេត្ត បង្កើតគណៈកម្មការចំរុះ ដឹកនាំដោយ ឯកឧត្តម មុំ សារឿន អភិបាលរងខេត្ត ដឹកនាំសហការ ជាមួយរដ្ឋបាល ព្រៃឈើ មន្ទីរបរិស្ថាន ស្នងការនគរបាល ខេត្ត បានធ្វើដំណើរចុះទៅពិនិត្យកន្លែងកើតហេតុរួចហើយឃើញសកម្មភាព ការកាប់បំផ្លាញ ព្រៃឈើ នៅតំបន់នោះ យ៉ាងរង្គាល ដោយគេអង្កន់ជាឡូៗ ចែកគ្នាដោយយកលេស ជាដីសំរាប់ធ្វើអគារ របស់រដ្ឋ ប៉ុន្តែផ្ទុយទៅវិញ គេពុះដីទាំងនោះ ដើម្បីចែកគ្នាតែប៉ុណ្តោះ ។
យោងតាមប្រភពបានឲ្យដឹងទៀតថា ដីដែលគេបានកាប់ បំផ្លាញនោះមានចំនួន ១០ ហិកតា គេបែងចែកជាដី ឯកឧត្តម ប៊ូ ឡាំ ក្បាល ៤០ ម៉ែត្រ ដីសាលារៀន ២០០ ម៉ែត្រ ដីសាលាស្រុកលំផាត់ ១០០ ម៉ែត្រ ដីសាលាឃុំ១០០ម៉ែត្រ ដីភូមិបាល៦០ម៉ែត្រដីប៉ុស្តិរដ្ឋបាល និងឃុំ ១០០ ម៉ែត្រ ក្រុម ប្រឹក្សាឃុំ១០០ម៉ែត្រ ដីទេសចរណ៍១០០ម៉ែត្រ ដីចាស់ទុំ៨០ម៉ែត្រដីសហគមន៍៨០ម៉ែត្រ ក្បាលដីហើយ អ្នកដែលបែងចែកដីទាំងអស់នោះរួមមានលោក មេឃុំ ចាស់ទុំ សហគមន៍ រួចធ្វើសំណើរទៅអភិបាលស្រុក ទើបនៅ ថ្ងៃទី៣១ ខែសីហា ឆ្នាំ២០១៣ លោកអភិបាលស្រុក លំផាត់ចារលិខិតមួយមក លោក មឹង មិនធិន ប្រធានការិយាល័យនគរដែនដីរូបនីយកម្ម និងសំណង់ស្រុកលំផាត់ ចុះពិនិត្យ និងធ្វើរបាយការណ៍ជូនមកស្រុកវិញ ។
គួរបញ្ជាក់ការចុះត្រួតពិនិត្យរបស់គណកម្មការរបស់ខេត្ត គេមិនបានសង្កេតឃើញវត្តមានលោក ង៉ែត វិទូ ប្រធានមន្ទីរទេសចរណ៍ លោក គង់ ស្រ៊ុនអភិបាលស្រុកលំផាត់ និងលោក មឹង មិនធិន ប្រធានភូមិបាលស្រុកចូលរួមនោះទេ ។
លោក ផាន់ ភឺន នាយរងខណ្ឌរដ្ឋបាលព្រៃឈើ ខេត្តមានប្រសាសន៍ថា ដីព្រៃឈើ ដែលត្រូវបាន អភិស្រុកលំផាត់រក្សាមិនមានអ្នកណាម្នាក់មានសិទ្ធិបែងចែក និងផលអនុផលព្រៃឈើធ្វើអាជីវកម្មបានឡើយ ហើយបើយោងតាមមាត្រាទី៩៧ ជនដែលប្រព្រឹត្តិត្រូវផ្តន្ទាទោសដាក់ពន្ធ នធាគារ ៥ ទៅ ១០ ឆ្នាំ និងពិន័យជាប្រាក់ចំនួន ៤០០ ដុល្លា សហរដ្ឋអាមេរិក ហើយដាំដើមឈើ ឡើងវិញ និងដកហូតដីនោះ ជាសម្បត្តិរដ្ឋ ហើយដីដែលចុះពិនិត្យ មានទំនាស់បី ចំណុច ចំណុចទី២ មាន៤,១៥៣ ត្រូវដាក់ពាក្យ បណ្តឹង ទៅតុលាការ ចំណុចទី១ និងទី៣ កំពុងសើបអង្កេតបន្ត ដើម្បីរកមុខជនល្មើស យកមកផ្តន្ទា ទោសតាមផ្លូវច្បាប់ ។
មហាជនទូរទៅ រង់ចាំមើល តើអាជ្ញាធរខេត្ត និងសមត្ថកិច្ច អាចវែកមុខជនល្មើស មកផ្តន្ទាទោសតាមច្បាប់បានទេ នៅពេលខាងមុខ ហើយបើ អាជ្ញាធរ និងសមត្ថកិច្ច ជំនាញ មានចេតនា ចង់រកមុខជនល្មើស កាប់បំផ្លាញ ព្រៃឈើយកដី មកផ្តន្ទាទោស មិនពិបាកដូច រកម្ជុលនៅបាត សមុទ្រនោះទេ ៕