ភ្នំពេញ ៖ មានល្បែងភ្នាល់គ្រប់ប្រភេទនៅក្នុងទឹកដីខណ្ឌមានជ័យ ។ ល្បែងទាំងនោះ មានល្បែងកន្ទុយលេខនិងល្បែងភ្នាល់បាល់ជ្រកនៅក្រោមស្លាកតុកាហ្វេទូដូរមាស នៅតាមផ្ទះនានា និងនៅក្នុងផ្សារច្បារអំពៅផងដែរ ។
យោងតាមសេចក្តីរាយការណ៍ពីប្រជាពលរដ្ឋរស់នៅសង្កាត់ស្ទឹងមានជ័យ បានឱ្យដឹងកាលពីពេលថ្មីៗនេះថា ផ្ទះមេឆ្នោតឈ្មោះ ថា ដែលមានសំយាបដាក់ពីឈ្មោះ មាន សុខឃៀង ស្ថិតក្នុងសង្កាត់ស្ទឹងមានជ័យ កន្លែងកត់កន្ទុយលេខ និងទទួលការភ្នាល់បាល់ដ៏ធំមួយកន្លែង មិនត្រូវបានសមត្ថកិច្ច ឬក៏អាជ្ញាធរសង្កាត់ធ្វើការបង្ក្រាបនោះទេ ។
សេចក្តីរាយការណ៍ដដែលបានឱ្យដឹងទៀតថា ជារឿយៗប្រជាពលរដ្ឋសង្កេតឃើញមានប៉ូលិសប៉ុស្តិ៍រដ្ឋបាល សង្កាត់ស្ទឹងមានជ័យចេញចូលផ្ទះនោះដែរ គឺគ្រាន់តែចូលរួចចេញមកវិញតែប៉ុណ្ណោះ ។ ការចេញចូលរបស់ប៉ូលិសប៉ុស្តិ៍ នោះ ទំនងជាចូលទៅយកប្រាក់ថ្លៃការពារប្រចាំខែ និងប្រាក់ខែលោកចៅសង្កាត់ស្ទឹងមានជ័យជាថ្នូរទៅនឹងការ បង្ក្រាបដែលជាឆ្នាំងបាយរបស់អាជ្ញាធរ និងសមត្ថកិច្ចមូលដ្ឋាន ។
ប្រភពពីប្រជាពលរដ្ឋរស់នៅសង្កាត់ច្បារអំពៅ II ក៏បានឱ្យដឹងផងដែរថា នៅតាមផ្ទះ និងទូរដូរប្រាក់នៅមុខ ផ្សារច្បារអំពៅក៏មានសកម្មភាពល្បែងកន្ទុយលេខ និងភ្នាល់បាល់នេះផងដែរ គឺសម្បូរទៅដោយមនុស្សគ្រប់ស្រទាប់ ទាំងអស់ដែលនាំគ្នាលេងល្បែងស៊ីសងទាំងអស់នោះ ។
ប្រភពដដែលបានឱ្យដឹងទៀតថា មិនត្រឹមតែនៅមុខផ្សារច្បារអំពៅនោះទេ នៅជុំវិញ និងនៅក្នុងផ្សារក៏ មានអ្នកទទួលកត់លេខឆ្នោត និងភ្នាល់បាល់ផងដែរ ។ ល្បែងទាំងអស់នេះ កំពុងតែរីកសាយភាយឡើងវិញ ទូទៅ នៅក្នុងរាជធានីភ្នំពេញមិនថា តែខណ្ឌមានជ័យនោះទេ ។ ក៏ប៉ុន្តែអាណាចក្រខណ្ឌមានជ័យ ស្ថិតនៅក្រោមការគ្រប់ គ្រងរបស់លោក គួច ចំរើន អភិបាលខណ្ឌនោះ គឺលោកចង់ដឹកនាំឱ្យមានឈ្មោះល្បីជាងខណ្ឌ ៧មករា ដែលសម្បូរ ទៅដោយបនល្បែង និងលេខវាម៉ាស្សាកោសជប់ ដែលបង្កប់ទៅដោយមុខរបររកស៊ីផ្លូវភេទ ។
ប្រភពដដែលបានឱ្យដឹងទៀតថា ពេលនេះលោក គួច ចំរើន កំពុងតែល្បីល្បាញឈ្មោះថា ជាអ្នកដឹកនាំខ្លាំង ក្លាមួយរូបផ្នែកខាងបង្កើតឱ្យមានបនល្បែងស៊ីសងគ្រប់ប្រភេទ និងសេវាផ្លូវភេទជ្រកក្រោមស្លាកម៉ាស្សាកោសជប់ ឱ្យលើសពីខណ្ឌ៧មករា ដែលល្បីល្បាញខាងផ្នែកនេះ ។
ប្រជាពលរដ្ឋយល់ឃើញថា នយោបាយភូមិ-ឃុំ សង្កាត់មានសុវត្ថិភាពត្រូវបានលោក គួច ចំរើន រុញទៅដាក់ នៅក្នុងលូទឹកសំអុយ ហើយលោក ប៉ា សុជាតិវង្ស ជាអភិបាលរាជធានីភ្នំពេញ ដែលឡើងកាន់តំណែងជិតមួយឆ្នាំនេះ ប្រហែលជាពុំបានដឹង ឬបានដឹងហើយតែលោកធ្វើជាមិនដឹងក៏អាចនិយាយបានដែរ ពីព្រោះទង្វើអ្វីដែលប្រាសចាកពី ច្បាប់កំណត់នោះ គឺជាប្រភពនាំមកនូវប្រាក់ចំណូលសម្រាប់ដាក់ក្នុងហោប៉ៅបុគ្គល និងបក្ខពួក មួយក្តាប់តូចដែលនិយមយកច្បាប់ធ្វើអាជីវកម្មនោះ ៕