េកាះកុង ៖ សេចក្តីរាយការណ៍ ពីខេត្តកោះកុង បានឲ្យដឹងថា ក្នុងមួយថ្ងៃៗ មានទូក ដឹកប្រេង គេចពន្ធ ក៏ដូចជា ទំនិញចម្រុះត្រូវបានក្រុមឈ្មួញដឹកជញ្ជូន មកពីស្រុកសៀម ចូលទឹកដីខេត្តកោះកុង តាមដែនសមុទ្រ យ៉ាងអនាធិបតេយ្យបំផុត គេមិនដែលឃើញជំនាញ គយរបស់លោក ប៉ាង វ៉ាន់ថន និងសមត្ថកិច្ចពាក់ព័ន្ធយកចិត្តទុកដាក់បង្ក្រាបការរត់ពន្ធទំនិញ ខុសច្បាប់នេះទេ។
មេឈ្មួញដ៏មានឥទ្ធិពលម្នាក់ឈ្មោះ យឹម ផេង ហៅរស្មី ជាមន្ត្រីនគរបាលពាក់ស័ក្តិ៤ មានតួនាទីជានាយរងទទួលបន្ទុកផែនកណ្តាលយុត្តិធម៌ នៃស្នងការដ្ឋាននរគបាលខេត្តកោះកុង បានក្លាយជាមេឈ្មួញធំជាងគេ ក្នុងការរកស៊ីនាំ ចូលប្រេងសាំងតាមដែនសមុទ្រយកមកលក់ចែកចាយនៅពាសពេញខេត្តកោះកុង គ្មាននរណាហ៊ានបង្រ្កាប់ឡើយ។
លោក យឹម ផេង បានបើកស្ថានីយ៍លក់ប្រេងគេចពន្ធដ៏ធំមួយកន្លែង ស្ថិតនៅតាមដងផ្លូវជាតិលេខ៤៨ ដោយយកឈ្មោះក្រុមហ៊ុនប្រេងស្របច្បាប់មកធ្វើជាខែល ប៉ុន្តែរឿងពិតគឺស្ថានីយ៍ប្រេងឥន្ធនៈមួយនោះ លក់ចែកចាយប្រេងសាំងគេចពន្ធ ដែលលោក យឹម ផេង នាំចូលតាមដែនសមុទ្រ ក្នុងមួយថ្ងៃៗរាប់ម៉ឺនលីត្រ ដោយដឹកជញ្ជូនតាមទូកធំៗ។
ក្រៅពីជំនួញនាំចូលប្រេងសាំងគេចពន្ធ គេដឹងថាលោក យឹម ផេង ក៏មានពាក់ព័ន្ធនឹងការនាំចូលគ្រឿងទេស និងទំនិញចម្រុះមកពីស្រុកសៀម យកមកលក់ចែកចាយលើទឹកដីខេត្តកោះកុង ដោយមិនមានការបង់ពន្ធជូនរដ្ឋឲ្យបានត្រឹមត្រូវនោះទេ គឺរាប់សិបឆ្នាំមកហើយ ដែលលោក យឹម ផេង រួមទាំងភរិយារបស់គាត់បានក្លាយជាមេឈ្មួញរកស៊ីដឹកជញ្ជូនទំនិញគេចពន្ធដ៏មានឥទ្ធិពល គ្មាននរណាហ៊ានប៉ះពាល់ក៏ព្រោះតែលោក យឹម ផេង បានចាត់ចែងចំណាយលុយកាក់បង់ជូនជំនាញគយ និងសមត្ថកិច្ចពាក់ព័ន្ធដើម្បីកុំឲ្យទៅរំខានអាជីពរកស៊ីនាំចូល ទំនិញគេចពន្ធរបស់គាត់។
សូម្បីតែលោកគយចល័តដែលប្រចាំការលើផ្ទៃសមុទ្រ នៅចំណុចមាត់ច្រកប៉ាក់ខ្លង គឺលោក ឱម ស៊ីនួន និងលោក ម៉ៅ ទ័រ រួមទាំងសមត្ថកិច្ចប្រចាំច្រកព្រំដែនទាំងនោះ សុទ្ធតែទទួលបានផលប្រយោជន៍ពីអាជីពរកស៊ីនាំចូលទំនិញគេចពន្ធរបស់លោក យឹម ផេង ទើបមិនដែលមាននរ ណាហ៊ាន ឬសមត្ថកិច្ចពាក់ព័ន្ធណាមកបង្រ្កាបបានឡើយ ៕