ភ្នំពេញ ៖ ក្រុមសមត្ថកិច្ច បានដាក់ពង្រាយកង កម្លាំងរាប់រយនាក់ និងឡានទឹកជាច្រើនគ្រឿង នៅម្ដុំវត្តស្ទឹងមានជ័យ ដើម្បី រារាំង មិនឲ្យក្រុមកម្មករដើរដង្ហែក្បួនទៅមុខ និងបានបង្ក្រាបក្រុមបាតុករដោយបាញ់ទឹក ចំណែកក្រុមបាតុករ ក៏តបតទៅវិញ ដោយមានគប់ដុំថ្មដាក់សមត្ថកិច្ច បណ្តាលស្រ្តីម្នាក់ស្លាប់ និងរបួស ចំនួន ៥ នាក់ ។
ហេតុការណ៍នេះ បានកើតនៅព្រឹកថ្ងៃទី ១២ ខែវិច្ឆិកា ឆ្នាំ ២០១៣ ខណៈពេលក្រុមកម្មកររោងចក្រកាត់ដេរ SL រាប់រយនាក់ ដែលបានដើរហែក្បួន ទៅសុំអន្តរាគមន៍ពី សម្តេចហ៊ុនសែន នៅផ្ទះរបស់សម្តេច នៅវិមានឯករាជ្យ បានប៉ះទង្គិចជាមួយនឹង ក្រុមសមត្ថកិច្ចប៉ូលិស នៅចំណុចស្ពានស្ទឹងមានជ័យ។ ការប៉ះទង្គិចនោះ មានការគប់ដុំថ្មដាក់គ្នា ហើយក្រុមកម្មករ បានវាយ ឡានប៉ូលិសផងដែរ។ ឡានប៉ូលិស ១ គ្រឿង ត្រូវបានគេដុតឆេះ នៅមុខវត្តស្ទឹងមានជ័យ។
ប៉ូលិសមួយចំនួន ដែលបានប្រើអំពើហិង្សា វាយលើក្រុមកម្មករ បានរត់ចូលវត្តស្ទឹងមានជ័យ។ រីឯកម្មករជាច្រើនរយនាក់ បាន ហ៊ុំព័ទ្ធ ចាប់ប៉ូលិស។ ម៉ូតូប៉ូលិសជាច្រើនគ្រឿង ក៏ត្រូវកម្មករវាយកម្ទេច និងអូសយកទៅដុតចោល ជាមួយនឹងឡានប៉ូលិស ដែល កំពុងឆេះ ផងដែរ ។
រហូតដល់ម៉ោងប្រមាណជិត ១២ នាព្រឹកថ្ងៃទី១២ ខែវិច្ឆិកានេះ កងកម្លាំងមានសមត្ថកិច្ច បានបាញ់កាំភ្លើងខ្លី និងបាញ់គ្រាប់ បែកផ្សែង នាំឲ្យរបួសបាតុករ ៥នាក់ ក្នុងនោះ មានបាតុករ ដែលជាកម្មករកាត់ដេរ ពីរនាក់ រងរបួសធ្ងន់ម្នាក់ត្រូវគ្រាប់ត្រង់ភ្លៅ និងម្នាក់ទៀត ត្រូវគ្រាប់ចំដើមទ្រូង បន្ទាប់ពីការបង្ក្រាបដោយបាញ់ទឹក មិនសូវមានប្រសិទ្ធភាពនោះ។
នៅក្នុងពេលផ្ទុះអំពើហិង្សានោះ ស្ត្រីម្នាក់ ជាអ្នកលក់បាយ នៅខាងមុខផ្សារស្ទឹងមានជ័យ ឈ្មោះ អេង សុខុម បានស្លាប់ដោយ សារត្រូវគ្រាប់កាំភ្លើង នៃការបង្រ្កាបរបស់សមត្ថកិច្ច លើហ្វូងបាតុករ។
សភាពការណ៍នេះ សមត្ថកិច្ចបានធ្វើការបង្រ្កាបហ្វូងបាតុករ ហើយបានចាប់ខ្លួនបាតុករ ជាជនស៊ីវិល និងព្រះសង្ឃប្រមាណជា ៣០ អង្គ ក្នុងនោះ មានព្រះសង្ឃគង់នៅវត្តស្ទឹងមានជ័យចំនួន ១២ អង្គ ត្រូវបានចាប់ខ្លួន បញ្ជូនទៅអាជ្ញាធរមានសមត្ថកិច្ច ដើម្បីធ្វើការ សាកសួរ ពាក់ព័ន្ធការប្រើអំពើហិង្សាគប់ដុំថ្ម ទៅលើសមត្ថកិច្ច និងដុតបំផ្លាញរថយន្ត និងម៉ូតូរបស់សមត្ថកិច្ច ។
គួរបញ្ជាក់ថា ជម្លោះនៅរោងចក្រកាត់ដេរ SL នៅភូមិឫស្សី ក្នុងសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បានកើត ឡើងជាង ៣ ខែមកហើយ ដែល ក្រុមកម្មករ ទាមទារឲ្យមានការដកប្រធានរដ្ឋបាលរោងចក្រចេញ រួមទាំងលក្ខខណ្ឌ ជាច្រើន ទៀត ៕
